تسجيل الدخول

مشاهدة النسخة كاملة : قصيدة : أم الفضايح



د هاني ابوالفتوح
05-05-2011, 11:34 PM
أُمُ الفَضَايِحٌ
(وَالذينَ هُم لأَمانَاتهم وَعَهدِهِم رَاعُون ,وَالذينَ هُم بشهَادَاتهِم قَائمُون )
صدق الله العظيم
فى كُل لِيلَة وكُل يُوم
نِسمَع حِكايات العَجب
بَس حِكَايتنا من الهموم
صَعبان عَليها تِنكَتب
………………
كُل شيء وِلُه تَمَن
وِلُه مِيعَاد
حَتى لَو شَرَف الوَطن
بَقى فى المَزاد
مين هَيدفَع .. مين هَيطلَع
مين يِبيع ويشِترى
فى دِين العِبَاد
………………
دا كُلُه إيه ؟.. دا كُلُه ليه ؟
قَتَلنَا خُوفنَا وضَعفِنا
قَتَلنَا لَحظِة جُبنِنَا
وِعَدونا
صَبَح فى ليلة مِطَيِنَه
أَغلَى المُرَاد
عَلَشان نِسينَا إللي خَلَق
إللي رَزَق
رَب العِبَاد
…………………
أَكتِب فى مِين ولَلا مِين
وأَنا قَلبى مِتقَطَع حَزين
أَكتِب فى جَرح
عَايِش سِنين
أَكتِب فىِ ضَعف
مَلان أَنِين
أَكتِب وَأقُول
وَأفضَح بِلاد
خَانِت عِباد
خَانِت عُهود
خَانِت رَسُول
أَفضَح أُلُوف
قَتَلها خُوف
وقلوبهَا عَاميَه
إِزَاى تِشُوف
وِطَريقها ضَلمَة
وسِكَة سَد
وِرسَالة مَكتُوبَة بحرُوف
بِتقُول نِهَاية كُل ظَالم
كُل خَاين
بُكرَة لازِم يِندَبَح
دَبح الخَرُوف
…………………
كُل يُوم فِيه نَاس تِمُوت
وِنَاس تِفُوت
وِنَاس بِتُصرُخ بِأَعلى صُوت
اِلكُل خَاين
لَو بِصَمت أَو سُكُوت
مِستَني يَاكُل لَحم أَخُوه
لَو بِالكَلام
لَو بِالحَرام
كُل المُنَى
إِمتَى يِمُوت
………………
العَهد أَقوى مِننَا
كِلمَة وقَالهاَ رَبِنَا
حَتى الأَمانَه الكُل خَانها
فى وِسطِنا
بَقَت الخيانَة فى طَبعنا
وِف دَمِنا
الكُل خَان
الكُل هَان
حَتى الهَوان
مَكسوف لِنا
………………
وَاحد يِخون نَفسه
خَان يُومه
خَان أَمسه
وَاحد يِخون عَهده
وَاحد يِخون بَلدُه
وَاحد يِبيع عَرضُه
وَاحد يِبيع أَرضُه
وإحنا كِده بَرضُه
نِنسَى ولا نِقسَى
وبجَرحِنا لِسه
نِطمَع فى رَب كَريم
وَلانِفتِكر فَرضُه
وَلانِفتِكر حَدُه
أَضرَب مِثال تَاني
إِيه إللِي خَلاِني
مَجرُوح ومن جُوَه
عَايش فى أَحزَانى
……………
أَسمَع كَلام قَالُه
وَاحِد بِأَحوالُه
فَاكِر الحَياه لِعبَة
وِالخَلق مَوالُه
شُوف بينَادي
وبصُوت عَالي
تعالوا نِرُوح على سُوق الجُمعَة
بِيبِعُوا فيه الدين والسُمعَة
خَلوا كِلاب الأَرض تِيجي لنَا
وِف أَراضِينا مَاشية بِترعَى
وِوَاحد تَانِي
شُفتُه أَنَانِي
بِيقُول قَرب مِنى ياغَالي
إِوعى تفَكر لَحظة فى حَالك
وللا فى حَالِي
كُل حَياتنا غِش فى غِش
صَاحبي أَقَابلُه بِمليُون وِش
وِلو عَندَك كِرش
أَقدر أَبيع لَك خَمسَة بِقِرش
أَبُويا وِعَمى وِخَالي وِخَالتِى
وِجِدِي كَمَان إللي مَاخَلِفش
إِجري إِقتِلهُم وَاحِد وَاحِد
وِبجُثِتهُم إِبنِى فى عِش
دَا مَبدأ وَاحِد
مِحتَاج وَاحِد
يِجرِي يِدُوسُه بِأَسرَع وِنش
……………………
وِف دُنيِتنَا قِصَص وِحَكَاوي
هَتشُوف يَاما فيها بَلاَوي
وِعَلَشَان أَنا مِن جُوايا غَاوي
أَفضَح فِيهُم
وَلا أَخلِيهُم
إِسمَع مِنى وِقَرب شُوف
كُل كَلامنا عَ اَلمَكشُوف
……………………
شُفت رَئِيس كَاتِم عَلى شَعبُه
الدِين مَالهوش ذَرة فِى قَلبُه
يِدبح يِقتِل
عُمرُه فِى مَره
ماَخَاف مِن رَبه
……………
وِشُفت بُولِيس
فَاكِر نَفسُه فُوق الخَلق
عُمرُه فِى مَرَة
مَاخَاف مِ الحَق
………………
وِشُفت وَزِير أَكبَر زِير
وبتَأشِيره وِسَهرَة وِبِيرَة
أَحَل الخَمرَة والخَنِزير
………………
وِشُفت مَشَايِخ
قَلبِها شَايِخ
وِالقُرآن جِواها دَايِخ
بِيخَافُوا لَو مِن كِلمِة لأَ
لَيِطلَع مُخبِر كَان مِتخَبي
فىِ أَصغَر شَق
يِبقَى إِزاي يِنصَح وِيقُول
فىِ القُرآن وِكَلام اَلله
وِأَحَاديث صَح
وِقَالها رَسُول
………………
وِشُفت جِيُوش
وَقت السِلم
سَلام مَرعُوش
وَقت الحَرب
تِنسَى الضَرب
تِرُوح تِتفَرج وَللاَ تِحُوش
وِشُفت اِلقَادَة
لاَزِم نِشرَب عَلى ذِمتهُم
قَهوَة وِ سَادَة
ِتضِيع اِلدَولَة
نِقُول وَلاحَولَ
وَقت الرَشوَة
تِجرِي تِعَبي وِتِملا كُرُوش
وِمَع خِيانِتهَا
تِضِيع دَولِتهَا
وِبتِتغَير يَامَا عُرُوش
………………
وِشُفت شَبَاب
ضَايِع تَايه
عِيشتُه هِبَاب
بَقى تَفكِيرُه كُلُه فِى سَهرَة
وَللاَ بَنَات وَاقفِين عَ البَاب
عُمرُه مَافَكَر مَرَة فِى دِينُه
أَو لِلآخرَة عَمَل لُه حِسَاب
…………………
وِشُفت بِيُوت
تِشعُر فِيها كَإِنَها قَبر
الِكُل سِكُوت
تِرمِي الإِبرَة
مَاتِسمَع صُوت
اِلقُرآن مَادَخَلهَاش
حَتى وَلَو بِشرِيط مَحطُوط
وِبيُوت تَانيَة
صَلاَتها فِى ثَانيَة
وِرَب اِلبِيت
وَقت الصَلاه تِلقَاه مَشغُول
إِما بِمَاتش
وِتِلِيفزيُون شَغَال عَلى طُول
……………………
وِمشِيت أَعَدد فِى الخِيَانَات
لِحَد الوَقت مَا عَدا وِفَات
وَأَسمَع صُوت لِمُؤَذِن صَاحِي
يِنَادِي حَي عَلى الصَلوَات
قُمت جِرِيت عَ المَسجِد جَري
لَقِيت المَسجِد مَليَان خِير
وِفِيه نَاس صَاحيَه
مُش أَموَات
وِمَع تَكبِيَرة اَللهُ أَكبَر
قُدَام عِينى لَقِيت قُرآن
وِبَعض آيَات
فُوق اِلجُدرَان
كَمِلت صَلاَتِي
وِقَعَدت أَدعِي بِالدَعَوَات
قُلت يَارَب
يَاعَالِم بِحَالِي
وِحَال كِتِير
سِهِرُوا الَليَالِى
يِدعُوُك فِى لِيل
طَوِل وِطَال
لَو كَان لِى فِى الدُنيَا سُؤَال
لَسَأَلتَك إِنتَ بِرَحمِتَك
تِرحَمنَا فِى يُوم اِلسُؤَال
" تمت بحمد الله تعالى "
الأحد أول يونيه 2003
د.هانى أبوالفتوح
هذه شهادتي للتاريخ وهذا أملي في الله تعالي والله المستعان
ملحوظة هامة : هذه القصيدة كتبت منذ ثمانية سنوات

آمال المصري
06-05-2011, 08:48 AM
وِرسَالة مَكتُوبَة بحرُوف
بِتقُول نِهَاية كُل ظَالم
كُل خَاين
بُكرَة لازِم يِندَبَح
دَبح الخَرُوف

وبعد ثلاثين عاما ينتصر الحق ويرتدي أحدهم البدلة الزرقاء
وفي انتظار الحكم على باقي الخراف
نص مطول فاره استنطق مداد الأقلام
فصرخ على الأوراق هذا الألق
كتبت فأبدعت
تقديري والأوركيد

ربيحة الرفاعي
07-05-2011, 06:22 AM
وإحنا كِده بَرضُه
نِنسَى ولا نِقسَى
وبجَرحِنا لِسه
نِطمَع فى رَب كَريم
وَلانِفتِكر فَرضُه
وَلانِفتِكر حَدُه

شكرا لدفقة النور التي سمحت بها في آخر القصيدة فلقد أغلق تعداد الخيانات علينا المنافذ
حتى كنت أجد الدنيا مظلمة ظالمة

قصيدة جميلة شاعرنا

دمت بألق

د هاني ابوالفتوح
16-05-2011, 12:43 PM
وِرسَالة مَكتُوبَة بحرُوف
بِتقُول نِهَاية كُل ظَالم
كُل خَاين
بُكرَة لازِم يِندَبَح
دَبح الخَرُوف

وبعد ثلاثين عاما ينتصر الحق ويرتدي أحدهم البدلة الزرقاء
وفي انتظار الحكم على باقي الخراف
نص مطول فاره استنطق مداد الأقلام
فصرخ على الأوراق هذا الألق
كتبت فأبدعت
تقديري والأوركيد
نعم استاذتنا القديرة الرائعة ينتصر الحق دائما ولو طال والشمس تشرق من جديد والفجر يعود وستظل مصر الأبية هامة في جبين الأمم لكم كل التقدير والود على كلماتك العذبة ومرورك بالقصيدة

د هاني ابوالفتوح
16-05-2011, 12:46 PM
شكرا لدفقة النور التي سمحت بها في آخر القصيدة فلقد أغلق تعداد الخيانات علينا المنافذ
حتى كنت أجد الدنيا مظلمة ظالمة

قصيدة جميلة شاعرنا

دمت بألق

الشكر كل الشكر والتقدير الكبير لقامتكم استاذتنا ولو رأيتم تاريخ كتابة القصيدة وماكان يعتمل الأمة وقتها من تآكل وحروب وفتن لكان تعدد الخيانات أقل من واقعها المؤلم ولكن طاقة النور بالقصيدة ظعرت بعد ثمانية سنوات لأن رحمة الله تعالى لاتغيب مهما طال الزمان لكم كل التقدير والود والإحترام لشخصكم الجليل