صفحات الأديب و الشاعر الشربيني خطاب رحمه الله تعالى .

[نادية بوغرارة]

السيد الأديب الشربيني خطاب

تاريخ الميلاد March 13, 1948

تاريخ التسجيل 12-11-2006

إجمالي المشاركات: 674

آخر مشاركة:

تنهيدة 00!! 30-09-2007 07:02 AM

[نادية بوغرارة]

فص توت
الإهداء 00
إلي فرعون مصر 00توت عنخ آمون السائح في بلاد الفرنجة
:sb:
يا اللِّي نايم
تحت سرداب أو هرم
مستني روحك ترجع للتابوت
عسل أبيض يا توت
*******
يا اللِّي نايم
بين ضلوع الأرض
مادد عروقك ف شراقي القوت
عسل أبيض يا توت
*******
يا اللِّي نايم
فوق بحور الشوق
شايل خوفك في بطن حوت
عسل أبيض يا توت
*******
يا اللِّي نايم
فوق غصون الشجر
حاضنه جفونك أحلام البيوت
عسل أبيض يا توت
*******
مستحلي نومك
تحت الحجر
ولاَّ انت لسَّه
ها تنتظر حكم القدر
ينفد فيك قبل المعاد
الشمس 00
أهي رجعت م السفر
سألت عليك وعن الولاد
قالوا لها خايف يفتكر
سنين القحط اللِّي فات
خايف يجيلنا ليكون
فرعون موسي عاد
بعد يوسف ما مات
******
ماخلاص يا توت
راح زمن الآهات
جفت آبار الصبر
ونشفت ع الخد
الضحكة ودموع البنات
والنيل لساه بيحبي
في عيون الأهرامات
قوم يا توت وبلاش عناد
نفض تراب القبر عن بدنك
وهدْ جدران السكوت
عسل أبيض يا توت
*******
إيه اللِّي قسَّاك وخلاَّك
تهجر أهلك وناسك
وقلبي اللِّي هواك
هو الكدر في الغربة
طرح جَفَا في حِشاك
ولاَّ انت ناسي
كاسك وكاسي
أبو طعم شهد
وسكر نبات
لسَّه فاكر ولاَّ نسيت 00!!؟
بذرة الشوق اللِّي زرعناها
علي رمل الشطوط
من يومها قلبي
لسَّه راسي
في حضن المواني
فارد شراعه
لنسمة شاردة
من هواك لما تفوت
عسل أبيض يا توت
*******
مش كنت واعد لما تعود
ترجع لعش الغرام تاني
وترد شوقي
اللِّي سبقني وسافر
علي جناح الأماني
ورد خدي اللِّي زرعته
يوم لقانا الأولاني
مشتاق ضمة مدي
عطشان نقطة ندي
تحي الغرام اللِي دبل
ع الغصون وقرَّب يموت
عسل أبيض يا توت
*******
لو حنْ قلبك مرة
لفص توت 000!!؟؟
أو حنْ خوفك لخوفي
ما تخفشْ من رعشة كفوفي
لما تفوت 000!!!
تحضن إيدينا بكرة
ونقطَّع خيوط العنكبوت
عسل أبيض يا توت
الشربيني خطاب

[نادية بوغرارة]

نظرة وداع

صالحت روحي
قبل منامي
وحنيت بكره
بحفانى
قلت لنفسي :
ما تفرقشي
لو دفنوا أملي
وعمري
بين ضلوعي
اللِّي زنقاني
أو حنطوني
مميا ف تابوت
دفونه ف أشجاني
أو سابوا بدني
علي موجة هادره
في بحرعاتي
شيلاني
ما تفرقشي 000!!!!

ما بين لحظة والتانية
ها يجي الموت
علي فرسه
معاه حرسه
وأكفاني00
سحاب مطوي
وماء غسلي 000
دموع ملايكة
محوطاني

تخرج روحي
مرضية
من دنيا فانية
غرَّاني
أمد الشوف
حواليَّه
وألقاني
بنظرة راضية
بودَّع
ذنوب قلبي
وخلاَّني


يا خدني شوقي
في ثانية
هناك
في السما العالية
أشوف قصري
وبستاني
أمد الخطوة
وأتمني
تكون توبتي
سبقاني
تناجي المولي
يرحمني
وأبدأ عمري
من تاني
الشربيني خطاب

[نادية بوغرارة]

علي باب الله 00شعراء عاميَّة


تجمع ف حروف
وقعَّها الريج
في بلاد الغربة
و نجوع الريف
ترسمها حارة
تشبه لمغارة
ملهاش رصيف
***
أو بنت شقية
بعيون عسلية
ودم خفيف
كتبوها قصيدة
حروفها شجية
وغزلها عفيف
***
أو وردة نديَّة
حضنه صبحيَّة
أو نسمة صيف
فايته علي فناره
يهدوا بها حيارى
مطاريد أشكيف
***
أو تبقي غيطان
قمح ومواويل
أو نص رغيف
نعمل به وليمة
تكفي كم عيلة
ومعاهم ضيف
***
رسموها عكاز
وكلام ألغاز
ساحب ف كفيف
أو فلكه شيخ
فاتح كُتَّاب
أو جوزة كيف
***
تطلع أغنية
أو ثورة عفية
أو قلب وسيف
ونشيد ملاغية
يسند في عجوز
عيان وضعبف

[نادية بوغرارة]

ترابنا تبرْ

:os: :0014: :0014: :tree:
ترابنا تبر
مدفون ف حفرة
الغوط شبر
ورد وسنابل
وشوق وصبر
لو حتى مرة
فتحنا قبر
نلاقي تاريخنا
زتون وتمر
ومادنه عاليه
ونار وجمر
علي الأعادي
يد واحده
شيخ وحبر

[نادية بوغرارة]

أحلام في العولمة00!!؟
:hat: :NJ: :014:
أهو بعد الجات والعولمة
قالوا: وفروا المصاريف
الأكل في مواعيد مرتبة
في الوجبه نص رغيف
والنوم من غير الغطا
شتا وخريف وصيف
فنمت من غير غطا
زي ما قالوا خفيف
طمعان أزور الملايكة
وأنزل عليهم ضيف
آكل وأشرب معاهم
كفيار علي بلو بيف
*****
حلمت وأنا وياهم
حلم الهنا والخير
قال إن الملك أمر
جناب معالي السفير
يعمل لي عقد عمل
وفيزة ضامنها أمير
لوظيفة في مملكة
مضحك ملك ووزير
*****

عقد شروطه مححفة
فيه بند صعب عسير
أنسي كرامتي هنا
قبل ما سافر واطير
وألبس بدلة مدندشة
بسيور قصب وحرير
وأجرس جناح الحريم
بفوطة وشال بشكير
وأمسك عصايه طويلة
أنظم بها الطوابير
وإن حد قال مظلمة
أو ثار وعمل مكلمه
أخزم ودانه بحبل
وأجره جر الحمير
وأشد قاضي قضاه
علي جناح الطير
يعمل فتوى محكمة
نلجِّم بها الجماهير
****
وأحضر مع السلطان
مجعوص كما المشاهير
جلسات عموم الديوان
وأهز راسي موافق
ع الفاضى و المليان
لكل أمر يقوله
أو حكم أو فرمان
يصلح به حال الرعية
لو أمر لها بعطية
أو قال رقبتها نطير
وإذا عظمته سألني
وقال يا وزير دبَّرني
أرد وأنا راسي محني
لله يا طويل العمر
الأمر والتدابير
*****
فرصة وشغلة سهلة
مش محتاجه تأخير
الأجرة مبلغ عال
فلوس ها تملا شوال
دولارات علي دنانير
مراتي وكوم العيال
والذل عند البقال
خلُّوني مضيت ف الحال
كدة من غير تفكير

*****
بعد ما جاني الفرج
قلت اشتري عمارة
وسوق الفاكهة الكبير
و محلات الجزارة
واسطبل خيل وحمير
واشتري نضارة
والبس عباية موهير
وأعمل كبير في الحارة
*****
من فرحتي منا داري
تايه في بحر أمالي
اتعري الغطا ولباسي
خنفرت وعلا الشخير
سمعه القاصي والداني
وحرمنا وابني سمير
واللِّي ما تتسمي حماتي
قايمة تحرَّض مراتي
صحي الوزير م النوم
إبنه يا حبة عيني
نازل سباحة وعوم
هي المجاري طفحت
ولاَّ السرير مخروم

[نادية بوغرارة]

I] زمن القرود 000!!![/I]
:os: :os: :tree: :os: :tree:
القانون في الغابة قوة
قوة مالهاش حدود
المخالب والنياب
زي طلقات البارود
تنهش عضمك وروحك
والعظام ويَّا الجلود

قوة غاشمة قوة ظلمة
حرب دامية ع الحدود
لو يموت ف أي دشمة
أي طور ما لهش لازمة
يرعي ف بدنه الضعيف
سوس بينخِّر ويَّا دود

الغضنفر اللِّي حاكمنا
وارث نصايح الجدود
دستور و نظام حياتنا
البيادة وحبة وعود
مكتوب علي جلد حمار
الأسد لو يوم يعجِّز
تلعب علي ضهره القرود

[نادية بوغرارة]

حَالةْ شجنْ
:os: :0014: :tree: :tree:
ساعة نزول الملايكة
لحظات ألم سكراتك
يبقي الكفن م الجنَّه
مسك ختام حياتك
أو يبقي قبرك حفرة
تسكنها حتي قيامك
وعشان تطيق آلامك
ويطيب ثراك ومُقامك
احضن بحب وشوق
أمل حياتك وخوفك
******
من بين صفحات كتابك
لم الندي في كفوفك
اتوضي وطهَّر جروحك
اغسل هواك وذنوبك
واقطف ورق الجناين
اتحنَّي وداري عيوبك
******
تصبح كما درويش
ساجد علي سجادة
هايمه روحك ف الفضا
فاقت المدي وزيادة
مشتاقة ترجع للبدن
هيمانة وف حالة شجن
تميل شرق نشوانه
تبوس شمس وعصفورة
ونجمة فجر حيرانه
تهمس همس جوه القلب
تميل غرب ندمانه
ما بين اللحظة والتانية
تعيد الكرة كذا نوبه
تلاقي نفسك الفانية
تناجي المولي خجلانه
تميل تاني كمان نوبة
تقول يا رب أنول توبة

[نادية بوغرارة]

دنيــَّــــــــــــــــــ ـــــا
:os: :os: :0014: :tree:
خلِّي بالك يا صاحبي
ما خدت منها منابي
خدت ضحكتي مني
وأهلي واحبابي
ساعات لحظة صفا
أطالبها بحسابي
ترقص شويه شويه
ولكل واحد شويه
تغمز بعين تلعبِّي
يسيل أنا لعابي
أركب بساط الريح
أشطح مع المراجيح
ألقاها بتقول لي
لو بتحبني بصحيح
هات لي كم نجمة
****
أطير في الهوا أرمح
أرضي اللِّي خبلاني
أمسك حبلالي الدايبة
أنزل علي سناني
تحرن وتزعل مني
وتعمل مخصماني

[نادية بوغرارة]

اقتــراح 00!!؟
سألوا بغل ف الخلا
نفسك ف إيه قبل الممات ؟
قال : حبة أسئلة محرجة
أبويا مين؟
حمارومات0!؟
كان أجير ولاَّ حمار زلق؟
ولا َّحمار جباسه ؟
ماشي ف خط مستقيم
بينحت ف صخر ؟
ولاَّ بياكل حشيش ؟
عريان ف الصيف والشتا
ولاَّ متغطي بقش وخيش ؟
ولاَّ لابس بردعه م الخلق ؟
*****
هو جدي
كان حمار طحين ؟
داير في دايرة
ملهاش نهاية ؟
شعره شاب ولاَّ اتحرق ؟
وامي التعيسة
المتشخلعة
لمَّا حافرها ف يوم اتفلق
ليه جوِّزوها للحصان؟
مسكين يا ناس
اتهد حيله في السبق
فما قمش بالواجب تمام
*****
والشمس غرقانه ف الشفق
قاموا شخلعوها ربع ساعة
وجوزها نتفة حمار !!
عشان تخلف بغل همام
يشيل همومنا ليل نهار
دماغه ناشفه بيرفص كلام
*****
كانت النتيجة المؤلمة
وصمة ف رقبة كل الحمير
أشيلها أنا ذل وهوان
مخلياني حاسس بالخنق
فطلبت من حاكم الديار
بدل ما يطلقوا الرصاص
علي راسي أنا الناشف
يجيبوا
لكل واحد م البغال
مدفع رشاش
وحزام ناسف
ويطلقونا
خلايا ف الجبال
نلف الدنيا
شرق وغرب
ندمَّر صفوف العساكر
اللِّي جابين بالحرب
كل الخراب والدمار

[نادية بوغرارة]

I]
يــا أنـــاني 00!!؟؟[/I]
:1a (85):
دلو مرة رميت شوقي
علي الوحده وع التنهيد
ونام الخد علي كفك
وسرحنا سوي لبعيد
ورسمت الفرحة في عنيا
حلم قلبي بيوم العيد
فبانت بسمة خلانة
رخيت رمشي
تقول يا قاسي لقلبي
ما تحلمشي 00!!
أنا هامشي
نسيت شوقي وحناني
ظلمت حبي وظالمني
وبتقولي أنا الجاني
ياقسوة قلبك الجامدة
يا ناكر حبي يا أناني
ما هو الفرق اللِّي ما بينا
سماحة نفسي ووجداني
إن قلت يا روحي سمحيني
راح أسامحك
وأبدءأحبك من تاني

[نادية بوغرارة]

فلاح فصيح
وسمعت صوتك
يا حبيبتي
وانت بتندهيلي
اكتب تاريخك
علي حجر رشيد
فرحت أجيب القلم
من العلبة أزمير
وقلت لايدي
وانت بتكتبى أول نشيد
قولي لحبيبتي المخلصة
كل أغاني العاصفير
*****
مع كل دقة بالشاكوش
رتيبي المشاوير
وازرعي
كل شطوط الغدير
ورد ونخيل
تلقي المسافات
اتحددت بين السطور
ألأب حابي
في أعالي النيل
عاشق نجمة
الشوق اليماني
وألأم مصر إيزيس
اللي مجنناني
لما خطبها سدنا العالي
نزل شوقها فيضان
وخيوط دهب و حرير
*****
فاتولدت أنا من تاني
علي جدران المعابد
والأهرمات
ونسجت من خيوط الشمس
مواويل وآهات
ورسمت القمر مكسوف
علي خدود البنات
وزرعت أرضك وليلك
القمح والنجمات
******
في الضلمة قلبي دليلك
وشراعك ف نوة ريح
وغنوة هوي صيف
ترطب قلوب مجاريح
فاكتبي اسمي عصفور
في صفحة تاريخ
وقولي للخلايق
إن البداية والنهاية
في كتابة النور
كان فلاح فصيح

[نادية بوغرارة]

مقالب زمــــــــــــــــــااااا اااان
:008:
صوت الأذان يا بلال
قلده ديك سهران
وحَّا الفراخ في العشة
تبدأ في الصحيان
قبل الشمس ما تطلع
أو صبحها يبان
****
سابوا لصاحب الخزانة
البيض من غير بذرة
أو حتي كتكوت هفتان
قالوا ف جلسة ومناظرة
سبب القلب التعبان
صاحب الخزانة نايم
مش داري بالهربان
العشة سكنها تعلب
متصاحب علي تعبان
خدعوه بحتة مقلب
كان عمله فيهم زمان

[نادية بوغرارة]

وحدووووووه
بعد التعب مرتاح
نايم علي اكتافي
فيه ف السما افراح
ملايكه كتير شيلاني
لمَّا الغراب قام ناح
حان الأجل وأواني
****
يا رب يا مجيب الدعا
يا عالم بأحوالي
خشبة شايلها أربعة
مسكين صُرعي ولجامي
ماشيه و متسربَّعه
شايله البعيد الفاني
عريان من غير بردعه
زي أمي ما ولداني
*****
سايب عيالي ومراتي
ورزم مالي وخلاّّني
دفنوني وحكموا الغطا
حتى العزا حلاواني
ماجابوا شيخ قرُّوه
ولا قالوا وحدوووه
يا خلق شوفوا المره
من تاني يوم نسياني
لابسه و متزوقه
ومنشِّنه ع التاني

[نادية بوغرارة]

حضن الأم
حضن يساعك
يا ولدي
ويساع الكون
نايم يا فوزي
علي اكتافك
فين ما تكون
دا حضن الأم
يا صاحبي
براح وحنون
تحضن بكره
و صغارها
بنظرة عين
لا شوك جفا
يمنعها
ولا حتى
خوف وأنين
تنسي آلامها
و أوجعها
وحزن دفين
****
تاخد بلهفة
ف احضانها
غلبان مسكين
محتاج حنان
وتتهدد
شمال ويمين
محتاج ترتاح
وتتمدد
بين الدرعين
وإذا كنت عاوز
الجنة
ما هي الجنة
بين القدمين
لأبن صالح
وفْي
نال رضا
الوالدين
***
طب بس إنت
ادعي لها
من قلبك
دعوة أو اتنين
وأنا أرفع
إيدي للمولي
ودمع العين
أقول من قلبي
وأردد
يا رب آمين

[نادية بوغرارة]

فلفسوف بصحيح

مبسوط يا عم
انت وهو
من تحت راسكم
وراس جحا
أكلت علقة سخنة
من غير سبب
فوق الرصبف
****
أنا كنت واقف
ذي غير
في طابور طوله
يجي ألف ميل
بشتري لكوم العيال
وامهم كم رغيف
****
فشفت حمار عفي
يشبه حمار جحا
جارر في كارو
متزوقة
ولابس نضيف
أنا قلت أداعبه
وأذيح عن قلبي
حبة هموم متكومه
فخرجت
من الصف السخيف
****
وهمست
في ودن الحمار
: علفك في مخلة
متعلقة في طوقك
يا حظك يا بختك
مين هو بسْ
اللي جاب هولك
لحد عنك
تاكل براحتك
لمَّا تشبع
مين فينا حظه
يقدر يطولك
****
بصراحة حسدته
همَّه علي بطنه
ومش شاغل روحه
بكم قضية
من غيظي قلت
محظوظ يا حمار
عندك لمشاوير عربية
مش محتاجة بنزين
وسواق يسوق لك
ابن أصل دمه خفيف
*****
إبن اللذينّا
العربجي
عفاريته قالت
كربجي
ضهر الأفندي
اللي فاكر
نفسه ظريف
كسلان بليد أرزقي
طول عمره نايم
في الخلا والريح
لو فاكر نفسه
فلفسوف بصحيح
يخبز في داره
لقمته
بدل ما يقول
لحمار جحا
كلام سخيف

[نادية بوغرارة]

حب ليلة صيف

لمَّا حبيبي هجرني
ع البعد ونساني
دبل ورد الخدود
فرسم لي أحزاني
امتي الهوي يعود 00؟
يا اللي انتي نسياني

****
بينا كلام وعهود
وآمال كتير ووعود
لمَّا الربيع يرجع
يحمرِّوا من تاني
دعيت و قلت يا ربي
كل البنات عشقاني
لكن انتي توأم روحي
وانتي اللي أسراني

*****
فحلمت ليلة صيف
طيف م السما جاني
معاه أنوار وملايكة
جايبه النهار بدري
وملونة خدوده
إشي أحمر
وإشي بمبي
ومزوقه عوده
بسمار ولون خمري
ومنبِّه ع الشمس
تفضل هنا جنبي
جايبه حبيب الروح
اللي هجر قلبي
يسقي الهوي المجروح
حنيَّة وماء وردي

[نادية بوغرارة]

إدعي لي والنبي

ساعة الرحيل يا أمه
مش كنتي وعداني
طيفك يجي يزورني
ليلاتي في أحلامي
أهو عدا عمري يجري
ولا أنتي فاكراني
تكونيش زعلانه مني
طب ليه بقي نسياني 0؟
****
لمَّا الربيع جه زارني
زوِّد لي أشجاني
قام ورده باس خدي
نزلت دموع أحزاني
****
أحلم كتير وأنا صاحي
وأمشي وأكلم روحي
لمَّا الخلايق لموني
قالوا دي عين وصابتني
ادعي لي والنبي يا أمه
ناس كتير حسداني

[نادية بوغرارة]

الدور 00 الدور

ما فضلش
من الشجر
المتعري
غير ورقة
توت
مدارية الخوف
الجدر بموت
وولاد الأيه
كسروا النبوت
***
وأنا قال
في وسط العتمة
مكسوف
من ضلّي
قال يعني خيالي
وشْ كسوف 00!!
خايف من إيه00؟
من حبة نور 00؟
لتشوف خوفك
وكسوفك
و لونك المخطوف
****
نن عينك
الراكع مذلول
علي سدرك
مش ده ضلعي
و درعك
الحامي لقلبي
ولقلبك
أهو راخر
مكسور
****
وأنا وإنت مرمي
في الكون
الدامي
قلبك حامي
وأنا قلبي مجروح
فاقد روحي وعزمي
كلي حبة عضم
علي كوم
الشقي و الهم
متلقَّح مرمي
كل الملموم حواليَّا
كم ديب مسعور
بيسعفوا فيَّا
وحبة غربان وحدادي
ف السما بتدور
تصرخ وتنوح
مستنظره موتي
لمَّا أفقد ذاتي
إصحي وفووق
الظاهر أنا وإنت
يا صاحبي
اللِّي علينا الدور

[نادية بوغرارة]

الله وأكبر

الله وأكبر
من عنيكمْ
ياللِّي بتعدُّوا
اللِّي جالنا
بالحواسب
وصوابع إيديكمْ
****
من الحسد
وعين عزول
قلبي
فقد صوابه
واتقسم فلقتين
ارقيني بسرعة
يا امة
بالكرسي
وسورة ياسين
****
خرَّمي جسم
الليِّ حاسد
وعنين حتى
اللي جابه
شفتوا قلبي
واللِّي نابُه
يا أخوانَّا
دا حرام عليكمْ
****
اللي قبلنا
كانوا قالوا
ما يحسد
المال الكتير
إلا ناسه
أو صحابه

[نادية بوغرارة]

عيد ميلادي
في يوم ميلادي
تبقوا تجيبوا لي
عروسة قشطة
صغيَّرة
ضحكتها
ميه مقطره
بنت أصل
و مأصله
تسقيني
حب وغندره
****
و تجيبوا تورته
متزوقه
طعمه وحلوة
ومسكَّره
وتكون كبيرة
ومدُّورة
من غير شموع
منُّوره
بعدد سنيني
اللي ورا
****
العمر عدي
كم سنه
سنين كتير
شعر وغنا
وسنين عذاب
ويَّا ضنا
لكن لحظات الهنا
دول بالمقاس
والمسطرة
أكونش غلطان
في العدد
ولاَّ شهوري
صغيَّرة؟

[نادية بوغرارة]

دستورالدساتير
سبب فساد الغابة
دستور شريعة الغاب
فرضاه ملوك الديابة
يالبطش والإرهاب
قطعان وعايشه غلابة
هايبه قطع الرِّقَاب
والحل إيه ياجماعة
لوتعرفوا الأسباب
منكم ناخد مشورة
واللِّي استشار
ما خاب
****
رأي ونال الموافقة
قاله الحكيم أبو ناب
نعمل نظام ودولة
ومؤئسسة واحزاب
تحكمنا سلطة ذاتية
مش وحش م الاغراب
تبقي الأمور متداولة
بمجلس عموم نواب
خدوا م البشر عبرة
وعيشوا بقي احباب
نقل الخبر والبشري
هدهد ومعاه غراب
****
قال الحكيم واتوصي
نعمل حكومة أونطا
وزارة من غير سلطة
تعمل إدارة وخطه
لعبة وتلات ورقات
****
ونجيب لها وزرا
كم فار مكار و قطة
وأرنب عنده زغطه
بيمشي كما الخواجات
****
ولكل وزير أورطة
ومكتب كبير ويافطه
وكيس كبيرو شنطه
يلموا فيها الإتوات
وكرسي حديد بدور
وفاكس و تليفونات
****
ونكلِّفها بمهمه
تشرف بصفة عامة
علي إنتحاب الأمة
وتحل الإشكلات
*****
تحضر آخر جلسة
في البرلمان خلسة
تنخنس رزي عرسة
وتوزع البركات
*****
لزقوا علي الأشجار
منشور كبير وبيان
اللي ماصادش فريسة
من كام يوم وجعان
فتحوا باب المنافسة
علي مقعد الحيوان
مشهور بكرسي العرسة
أبو شمخة وهليمان
****
هربت تعالب خايبة
وقطيع من الخرفان
وديابة مزعوره خايفه
من اللي جري وكان
عركة وها تبقي حاميَّه
الفايز فيها خسران
بين فار سنانه غارزة
في ديل القط الجبان
وقرد ضوافره كابشه
فرعين من الأغصان
مع أسد نيابه بارزة
م اللّي جري غضبان
****
زحفت حيَّة سامَّه
مع ضفدعه وتعبان
صحوُّا البهايم النايمة
بصوت بغبغان غلبان
شاعوا ف الغابة كذبة
قال إيه حصلت زمان
قرد ضحك علي لبوة
راكبها كما الحصان
وفار عربيد وسكري
بيسرق أكل الجيران
وأسد ظبطوه ف خلوة
مع فاره كان سهران
****
من نهش السيرة لحمة
صاب القطيع هيجان
طلبوا مناظره حرة
في سهرة وتكون أمان
علي ضوء قمر وخضرة
يحكمها أبو قردان
مسموح لكل عضو
يشرح ويقول بيان
****
قال الأسد بمناورة
خد لك راجع وعيرة
ساعة ما تيجي تختار
دنا برضه ملك الغابة
حامي العرين والغار
سلطان ولي مهابة
يا ما قالوا فينا أشعار
وحنيِّن قوي ع الغلابة
حتى أسألوا الحمار
****
القرد خطب وقال
طول عمرنا احباب
ومهما عليت وكبرت
أصلي عنكم ما غاب
أنا جدي أصله غول
رمز لعهود إرهاب
وابويا نسناس عجوز
ساكن في خص غاب
بيسرح يلعب يوماتي
من غير قميص ألعاب
****
بنيت نفسي عصامي
وسرقت عش الغراب
لو وقفتي جنبي
ونجحت في الإنتخاب
أنا أطلع شجر عالي
بسهولة من غير عذاب
أجيب لكم جوز هند
وموز وعيش وكباب
****
وقف الفار المكار
ف الخطبة قال أسرار
فَتشْ عيوب الغابة
وزوُّد في العيَّار
قال إحنا قد الخلايق
ملايين كتير ف جحار
دا غير ملاين بتدرس
في معامل الشطَّار
ضمنين مكسبنا بكره
وفوزنا ف الإختبار
واللِّي ناوي يعادينا
ها نلَّعب في عبه فار
جدي ميكي الأمريكي
وحش مرعب جبَّار
****
ما تغروكوش القوة
ماهو كل أسد فتوة
ف عرينه كم لبوة حلوة
لابد لهم في الدار
****
والقرد ابو شقلباظ
اهبل وعقله طار
في ضهرة حته حمره
عريانه لعيون اشرار
إزاي نختاره قدوة
يا ادي الفضيحة والعار
دققوا وانتوا بتختاروا
قبل ما تخدوا قرار!!

[نادية بوغرارة]

يا يا أبن الجزاراعمل حسابي
أنا لي كوم ف المعجزة دي
همَّا بيتين عشان ولادي
وأعمل عزومه لناس صحابي
أشرح تاريخ المسألة دي
إزاي صلاح وحد جيوشنا وألأمم
وإزاي نعيد أمجاد بلادي
****
أنا هانتظر لمَّا القصيدة
تبان عروقها و تنكشف
حبة عقول خامله بليدة
خلاياها ماتت م الأشف
نضَّفْ يا شاعر كل الخلايا
واكحت مرضنا اللِّي اتعرف
****
جراح وشاطر مش جزار
شق وفصل عرق الورمْ
علَّم بمشرط فِّهمْ حمار
حُكَّام كتير صابهم بجمْ
غاية المني أموت أنا
رافع هاماتي والعلم

[نادية بوغرارة]

لو كنت أعرف
يا صاحبي
إن برجك
برضه حوت
كنت فضلت
في السما
بعت عمري
واشتريت لك
مجرة كاملة
إنما 00000
خطفتني نجمة
صغيرة
خبتني جوه
قلبها المسحور
ففضلت أدور
حواليها
في الفضا
ايام كتير
وشهور
****
أعمل إيه مسحور
وده حكم القدر
توهت يا صاحبي
في مدار عنيها
قول نسيت
سكة رجوعي
وبحاول دايماً
افتكرْ
بيتنا اللي كان
جنب بيتكم
من زمان
قدامه زهرة
و شجرة خضرة
وفوقه
ساكن القمر

[نادية بوغرارة]

رفات الأسري

قوم بينا يا قاضي
نعدي أنا وانت البر التاني
نلم عضم ولادنا اللي بنادي
يااااااااه
مش دي جتة أبويا
اللي فقدناه
كان نفسي يعود
معلِّم أنا ضحكته بسنته الدهب و اللولي
وعضمه المحني والضلع اللي كان مكسور
جنب حجابه الحاجز
حلمه المشروع
ملزوق في سقف بطنه
من الخوف الجوع
وأنا لسه يدوب مولود
أنا فاكر لمَّا امي بعت له ف سينا جواب
وقالت له يا أبو أحمد ما تحملش الهم
اللي من صلبك
ف غيابك ها عمل له حفله و سبوع
*****
وأنا ببدء تاتا و هحبي واخطي العتبة
قالوا لي أبوك مفقود
يمكن مات وشبع موت
ف الغربة وأكله الدود
أو نهشه الديب المفجوع
وكلاب الصحرا السعرانه
آه يا نا
الرمل خبي حبابي عنيه
طلعها شجره وضله تطرح لولاده اللي مشافهمش
ثمرة لبكرة
لما نعدي يا سعادة البية
وندُّور علي أسرانا ف ألف طريق
نرتاح تحت ضلتها من الحر
ونرطب الجوف الحامي ونبَّلْ الريق
ولمَّا أنا وانت نرسي علي بر
نطفي في قلب امي نار الشوق
ساعتها يا قاضي لمَّا هاتنبش ف الماضي
أرتاح وترتاح أمي ف طربتها
مدفونه معاها حصرتها
ها تروق وتخف
بحق وحقيق
لمَّا ها تبدأ يا جناب القاضي
في كتابة رأيك ف التحقيق
هل أبويا جبان
كان بيدافع عني
ولاَّ باعني وخان
وإن كان الهمجي مدان
في البحر العاتي لص وقرصان
بدمه البارد قتل الإنسان
مين يا جناب القاضي
ها يجيب حق الغلبان !!؟

[نادية بوغرارة]

صيد العصاري

والله يا أمه
ما غوِّيته
هو اللِّي هواني
كده لوحده 0!؟
عصفور وشافني
قصاد بيته
غمز لي 00!!
قام قلبي ارتاح له
*****
الضحكة بانت
في عيوني
زقزق وطار
كده علي راحته
رميت عليه
سهم برمشي
شغلت قلبه
و جرحته
غني ورفرف
بجناحه
بطرف عيني
أنا لمحته
ما همه تعبه
ولا جروحه
قال الحقيني
وأنا لحقته
****
مديت إيديا
أخد إبده
حضن كفوفي
كده ف راحته
و قال كلام
هزْ مشاعري
عجباني يا أمة
قوي صارحته
عاهدني قال :
ها طلب إيدك
وعدني يا أمه
وأنا صدقته
والله يا أمه
ما زقيته
هو اللِّي وقع
كده لوحده !؟

[نادية بوغرارة]

شيَّال هموم
يا نبيل يا بن مصيلحي
اجمل مافيك حبك ليَّا
يا رب يديم لي حبك
يفضل يطير كده حواليَّا
****
شيَّال من ضمن الشيالين
وبشيل هموم ناس طيبين
عايشين علي شمال الحياة
ف الآخرة من أهل اليمين
****
ع النده جاهز أشيل لهم
بلوي ومصيبة جت عليهم
لو سبتهم مش تبقي عيبة
أمال مين غيري ها يدلهم
أسند إيديهم ع الطريق
علي كتفي واكتاف بعضهم
****
لو سبتهم شوف كم غريق
يغرقوا في بحر ملوش قرار
والرحلة دايماً تحتاج ونس
يلاقوه ساعة الألم و المرار
أحن عليهم م الأخ الشقيق
****
يا ريت يا صاحبي
تساعدني
وتشيل معايا بقلب سليم
شفت اللي قبلك
دخل يشيل م السوق
حبة حمول
أخوك أحمد أبو إبراهيم
مع إن شايل ف قلبه
حبة هموم
رمي حموله علي ربه
ودخل يشيل م السوق
ولا همه تعب قلبه
ما بين الناس الطيبين
يروح همة
من دعوي صالحة يا صاحبي
يطيب و يروق

[نادية بوغرارة]

ورد الأمهات
ورد الحنان يا أمه
دبلان علي الرف
حتي شجر الجناين
والورد والحنَّة
متدلدله أغصانه
وعصفورة مراسيلي
هي وعصافير الجنة
شوقها لحنينك هف
****
فغنت لحن حزين
لمت كل الآهات
دمعة ف نن العين
و أنا و اليتامي والصبر
في عيد الربيع والحب
واقف علي مقامك
ملايي كتيرة صف
*****
ما فضلش من ريحتك
غير طبطبة من خالة
من كل حين وحين
حبة حنان وقواله
نازل مع دفا القلب
سيل دموع ودعا
طالبه من ربها
يغفر و يرحم أختها
ويخلِّي الجنة مثواها
****
تميل عليَّا بعطفها
وتقول لي ياضنايا
أحمد واشكر ربنا
دايماً علي كل حالة
أختي قبل الرحيل
سابت وراها رجالة

[نادية بوغرارة]

مسابقة وجوايز

موضه وطالعة
إعلان لسلعة
بايرة وبايظة
أو حتى فاسدة
***
نغري زبونها
ببنت حلوة
بيضة ولاَّسودة
أو حتي كوده
قايده المفاتن
وتمللِّي والعة
****
شوف البضاعة
آخر حَمَار
من بسْ لمسه
تطلَّع شرار
شعاع ونار
م الخد طالعه
****
خد لك صورة
سته ف تسعة
صورة بس إيه
تكسب ياسيدي
سُمْعه وشهرة
وخضار سُوتيه
تبيعه بكره
بمليون جنيه
بس البداية
آخد غداي
وحاجة للعيال
خمسين جنيه
دول مش كتير
جرب يا بيه
****
وأدي خبَّاز
يخبز رغيف
بقشْ وجاز
ناشف وجامد
زي القزاز
****
قال من حلاوته
و كمان طعامته
لو تاكله حاف
يجيلك زوغطه
روحك ف ورطه
لو ورك وزة
أو حتى بطه
وخضار بدمعة
عليه شطة
الحق منابك
واقطع لقمة
تيجي ودن قطه
****
قادم وغمسْ
حبة خُضار
لمَّا قطعت
حرف الرغيف
لقيت فيه
حاجه طريه
بصله ناشفه
و رجل لفار
****
رحت اشتكيه
لبتاع الصحة
أتاريه تعبان
داخل مصحة
مهدود حيله
وعنده كحة
****
قال يا سيدي
بصوت ضعيف
عاملين مسابقة
في ألف شنطه
بحق وحقيقي
وماهيش أونطه
اللي هايجمع
جته لفار
ملهش ملة
كبير صغير
طويل قصير
أو قد عجلة
ندي له جايزة
معزة وجاموسة
وكمان حمار
****
ابعت جوابك
آخر النهار
وفيه منابك
صاحب المدار
عامل مسابقة
حرة ونزيهة
ماهش قمار

[نادية بوغرارة]

سوق عكاظ

وانا نايم علي السرير
فتحت برموتي الجهاز
هامت روحي ف الفضا
ف الشام وغزةوالحجاز
ف العراق الدم سايل
ناس ضحايا بارود وغاز
متقطعين جزلْ نساير
معروضه ف يتارين إزاز
لشيخ قبيلة م القبايل
صاحب آبار ميَّة وجاز
*****

كم قناه بتبيع رسايل
كل ليلة ف سوق عكاظ
تستضيف يوماتي قاتل
اللٍّي كادني أكيد وغاز
المذيع أبو ضحكة صفرة
اللِّي شايل ميت جواز
داير يتاجر بالقضية
ف شاشات ألفين محطة
يسأل ويخدع ناس عزاز
ليه قتلت حلم البلاد
إرجوك تجاوب بإيجاز
*****

زي ما تكون تمثلية
يرد ضيفه بدم بارد
دول جماعة إرهابية
ف قلوبهم صهد شارد
ونور معادي للساميَّة
ومن خوفه شافه مارد
محتاج لعصبة عسكرية
قمنا أعلنا بصارحة
دي مصيبة إنسانية
واللِّي لينا جي يساعد
له معونة وكم هدية
قمت أشارك بمداخلة
جوه شاشة الفضائية
قبل ما أغرز فيه سناني
قال مذيع ف وقت تاني
بعد فترة إعلانية
*****

بعد فاصل شفت ساقطة
ف المهنة إستاذة شاطرة
عريانة بترقص لي رقصة
بحلقت فيها بنظره عابرة
توهت ونسيت القضية
*****

ليقت نفسي ف محاضرة
فيها درس عظيم لواعظ
بالغضب شحن عواطفي
خلاَّ روحي لمَّا خدتني
زي طور مذعور ساقتني
أرفص واعض ف الوليَّه
*****

بعد لحظة سمعت شاعر
طايره روحه في الفضا
عزف نغم هز المشاعر
وفرد بساطه علي المدي
شاور بإيده قلت اسافر
للنجوم فوق في السما
أرسم علي وش القمر
قلب حبيبتي وصورتي فيه
وأرسم كمان رايه وعلم
وأكتب عليه كم شعار
ده نصيبي وحكم القدر
دا اللِّي هزمني وذل الأمم
شعار حزبه فيل وحمار

[نادية بوغرارة]

نخب الإهانة

ما هو ده قدرنا
اللي حاكمنا
وماسك لجامنا
فاكرنا حبة حمير
من يوم ما قلنا
عهد و سلام
بان عجزنا
وطلع لنا
من تحت باط
الأُلعبان
تعبان كبير
غارز نيابه الطوال
في لحمنا
وبشد روحنا
لنهاية المصير
****
أصل واهظنا
الحنبلي والأمام
كان قال لنا
وانتوا ضعاف
ما تشحتوش السلام
من ناس لئام
إن جنحوا وانت
كنت القوي
مد إيدك بالسلام
فنسينا حكمة ربنا
سلَّط علينا
اللي ما بيرحم
دموع عنينا
مجرم يهودي
صهين فرسان
المعابد الصليبي
دخلوا بيتي
شدوا رقابنا
من اللجام
مذلول أنا
فطلبت
من تاجرالخيانة
هدنة وسلام
وبصمت مرغم
علي صك هزيمتي
أنا والحمار
وشربنا سوا
نخب الإهانة

[نادية بوغرارة]

الحب مش كلمة

الحب يا روحي
مش كلمة
متزوقة بلحن
وغنوة
من بين شفايفك
كده تنقال
*****
الحب فعل
وله معني
تلقاه ف بسمة
باينه في نظرة
تخلِّي الخدود
الدبلانة
تطرح ورودها
الخجلانه
أزاهير حمرة
ورنة خلخال
*****
وسهام رموشها
الفتاكة
عاشقة وجارحة
من غير نبال
تصيب قلبك
بعيون ساحرة
بدلال ورقة
تلقي الحلوة
تخطب ودك
وتدخلك
لحظة الجنة
كده ف الحال
*****
الحب قالوا
شهد وسكر
أحلاه سلام
أول لمسة
خد الجميل
لو حن ومال
زي النسمة
ونامت أماله
علي خدك
ساعة اللمسة
يرتاح البال
*****
لمَّا العنين
تهمس همسة
تطير روحك
حالمة ورسمة
نجمايا عاشقة
آهة ف موال
يا خدها شوقها
هايمة وطايرة
من غير كسوف
تحضن ف هلال

[نادية بوغرارة]

الكيت والكيت


تركة ميراث الجدود
الكيت والكات والكوت
إبن المقفع ف كليلة
طلع لنا كتوت
خوُّف به حكُّام بلدنا
ماتوا ف جلودهم موت
مع إن جناحه ضعيف
لو هزه في الهوا يبقي
سيف للفتونه ونبوت
*****
ورسم لنا العنزة
رمز الكفاح والصبر
مع إنها زعرة
مفضوحة طول العمر
صبحت مثال للشرف
في البار والحانة
ساعة هجوم السكاري
ترقع لها ميت صوت
****
اتغمزوا الغمازة
واتامزوا تاميز
قالوا كلام باللهجي
ماهوش فصيح دغري
مره شامي ومره نبطي
ومره شعبي علي عامي
وصف وشرح الحالة
ديك البرابر قال لي
الفرخة جنب الميضة
ولدت سرب كتاكيت
من غير مشيمه أو بيضة
نازلين صوصوه وصويت
بيغنوا للكيت الكات
واللي فضح العنزة
واللي واد البنات
واللي أكل البطة
واللي دبح القطة
سب وضرب العروسة
يوم الفرح شلُّوت

[نادية بوغرارة]

عنيك 00قصة وقصيدة
عنيك

قصة وقصيدة
لمَّا قريتها
علي ضوء
قمر فضي
لقيت بحر
وموج عالي
نزلت بشوقي
قال أعدي
لبرك وشطك
التاني
لا ليقت شط
يرسِّيني
ولا مينا
ترسي فيه
مراكبنا
ونوه شوق
سحبه قلبي
وشراعي
لبحرغريق
وخداني
اسيب روحي
للموجة
ألقاني
منش فاهم
ولا كلمة
أرجع و أقرا
سطورالحب
من تاني

[ربيحة الرفاعي]

الله الله ايتها النادية
ما اروعك في وفائك
وما أجملك في عطائك

شكرا لهذا الجهد في تجميع نصوص الفقيد

دمت بألق

[نادية بوغرارة]

شال الحمام حط الحمام

:0014: :0014: :003: :0014: :0014:

حط الحمام ف قلبي
وعلي كتفي اليمين
زي نور الصبح
برد وسلام
فشربت أنا قهوتي
فنجانين
*****
نظرة عنيكي
من غير كلام
زي غناوي العشق
للعاصفير
لها ضحكة ساحرة
متلحنه أنغام
لو تعزفيها
يبان ف خدود الورد
غمَّازتين
*****
قام قلبي طار
ف الفضا حيران
من نشوته، زقزق
و قرب نحيتك
شاف بسمتك
احتار يروح فين
لرمش عينك النايم
بين كحلتك
ولا لغصن خدودك
اللي من ضحكتك
طرح وردتين
****
فرد قلبي جناحه
وحضن ندي نسمتك
لمح الأمل والنهار
ف طرف عينك
حبة خجل علي شوق
وتنهدتين
شدين شراع مركبك
كما مجدافين
لنور قلبي اللي طار
تاني ناحيتك
قلبك فنار
أشواق ونار
ساحرة مهجتي
من نظرتين
بقيت أسير الهوي
محبوس
في نن العين

[نادية بوغرارة]

نظرة عين
مالك 00؟
واخد علي خاطري
وزعلان
من إيه0؟
سيباني واقف
هنا وحدي
قلقان حيران
مستني قمري
اللي بيطلع
في نن عنيكي
يظهر ويبان
****
القمر اللي انتي
ياما خدتيني ليه!!
أنا فاكر لما سحرني
تاه عقلي ولقيتني
وأنا مش داري
بحالي
غرقان في النور
بحضن في الدفة
ومتبت
في شراعي المكسور
وبعافر شوقي الجامح
للورد الطارح
علي خدك
أحمر مكسوف
خلاَّني قطفت
كم وردة
شوقي الملهوف
غمضتي عنيكي
وداريتي
تحت جفونك
قمري الخجلان
وهربتي
لمَّا جريتي 00
أنا فاكر ساعتها
قلتي 000
ابقي استناني
نقطف من تاني
انا وانت
زهر البستان
****
طب أعمل إيه ؟
واقف من مدة
مستني قمري
اللي واحشني
يطلع ويجيني
أتاريه من بدري
واقف ويَّايا
بواسيني
وبقول لي
إسألها
متأخره ليه00؟
****
أتاريكي
واقفة واريا
وأنا مش واخد بالي
عامله روحك
مش شيفاني
خايفة لعيوني
تيجي في عنيكي
ونغرق سوا من تاني
حيرانه وبتتلفتي
علي إيه ؟
****
مشغولة يا غالية
بنجوم تانية
بتبصي ليه
الناحية التانية؟
مين شاغلك مين
دأنا والشوق
من ساعة
واقفين
بنستناكي
بتبصي ليه
شمال ويمين ؟
مع أني
واقف قدامك
مش شايفه
حبك وغرامك
ولا قادرة
تنطقي بلسانك
كلمة شوق
وحنين
راح فين 00؟
حبك وحنانك
راح فين 00؟
الغزل المتعافي
لورد الجنَّة
وللياسمين
مع إني 000
واخد علي خاطري
لكني
بحبك يا حلوة
غصبنْ عني
****
أنا راجع بكره
هنا تاني
وف نفس معادي
هاستناكي
بس انت تعالي
المره الجايه
القاكي
واقفة الناحيه دي
و اقفه قصادي
بيني وبينك خطوة
أو خطوتين
لو تمشي الأولي
أنا التانية
و يمكن
أمشي الأتنين
لو صالح
قلبك قلبي
بكلمة واحدة
ونظرة عين
ساعتها
أقول للقمر
من تاني
في نفس معادنا
وماكنَّا
يطلع بكره
ويستناني
بس انتي تعالي

[نادية بوغرارة]

ربك مقدَّرني

من تحت السما الزرقا
بنده عليك بحرقة
ليه رحتي وسبتيني
ويَّا العذاب والفُرقة
***
فين حضنك الدافي
واللَّمسه ف كفوفي
يا نورعيني وقلبي
ونبضي من جوه
***
أضحك
وأداريآلامي
ولا حد داري بيَّا
أخبي
عن الناس دموعي
لتبان ف عنيَّا
يفرح فيَّا حاسد
أو يشمت عزول فيَّا
****
أنا كنت هاطلع لك
فوق وأشرحلك
عن حالي واحوالي
واللِّي جري ليَّا
لكن اللِّي صبَّرني
ربك مقدَّرني
أحفظ دعاكي ليَّ
المولي يسترني
ف الآخرة والدنيا

[نادية بوغرارة]

قرْ00 و توب

بيني وبينك
يا ابن الإية
اللي يحب
يبان ف عنيه
وانت يا صاحبي
جي تنصحني
ولاَّ تقول لى
حكايتك إيه ؟
***
جي تتمحّك
في المكتوب
قر. و توب
ْوقول للدنيا
أيوه باحب
واللي يحب
يبان ف عنيه
***
واللي باحبه
ده ملوعنِّي
ساعة يصفالي
وساعة يلعبِّي
قمت خاصمته
وجبت ساعتها
الحق عليه
***
جاي تسالني
وتاخد رايي
مين غلطان
ومين كان فيكوا
الحق عليه ؟
ومدام عارف
ليه بقى تانى
جي تتعبني
وتسأل ليه ؟
***
هي نصيحة
روح لحبيبتك
يالله إرضيها
وامسح خوفك
جوة عنيها
يمكن بكره
ترضي تصالحك
ومَّا تقابلك
تبقي تصارحك
لمَّا تسامحك
تلقي المولي
يرضي عليك

[نادية بوغرارة]

الضحكـــــة الصافيـــــــة
D: D: D
طول عمري من صغري
مافي مرة يوم بوِّزت
مهما لاموا الأحباب
ولا ف زماني عبت
ولا قلت كلمة عتاب
لحظة غضب ولعنت
ولا اشتكيت من قدري
لو حتى مال بي البخت
هاتفيد بإية شكوتي
مهما بكيت أو ثورت
D: D: D
أوعي يا صاحبي تظن
إني ماليش احساس
مخلوق وزي البشر
كلمة جفا تجرحني
أضحك في وش الناس
وادارس المي وحزني
بضحكة رايقة وصافية
تغسل هموم جوايا
وذنوب كتير وخطايا
ع القلب كانت نايمة
اصل اللِّي رامية خلاصي
فشِّتها كانت عامية 00!!

[نادية بوغرارة]

الله يسامحك

ها نقول إيه
ولاَّ إيه ولاَّ إيه
الهوي
لوشاف دموعك
يغرغر
الدمع ف عنيه
***
أنا يا صاحبي
عارفك
القساوة
مش في طبعك
واللي خان
ودك و هجرك
صاب يا روحي
قلبك وجرحك
لو في يوم
حنْ و رجعلك
ما تقلش مالك
راجع ليه 00؟
من غير ملام
أو صد و عتاب
ابقي قول له
الله يسامحك
تلقي
قاضي الغرام
يجيب
الحق عليه

[نادية بوغرارة]

[CENTER]دستور في غبيط !!
حبة قوانين
بكلام مكَّار
كلها فهلوة
وفكْر حويط
أصل الدستور
صنعوه شطَّار
كتبوه بالليل
ذي الوطاويط
****
دستور ع الكيف
عفي وجبار
فقرات مطاطة
تنشد تساع
لباس البيه
طوله ألف دراع
واسع دوَّار
له كرش كبير
و ضهر حمار
لمَّا بيضحك
يطلع ينزل
زي المنشار
بيا كل ويجزْ
في عضم ولحم
ودم وأفكار
****
قوانين هلامية
فك وتربيط
ربطوا المربوط
خاف السايب
أصل المربوط
قالوا طور خايب
ربطين له عنيه
ف بطنه ورجليه
عقدة وشنيط
****
داير ف الساقية
ومتغمِّي
أهبل وعبيط
أصل المربوط
المتغمي
مش لازمه عنيه
يعمل بها إيه
طول عمرالجاهل
ساكنه الخوف
ماشي من عبطه
جنب الحيط
شايل طول عمره
مقطف وغبيط
وبياخد أجره
حبة زعابيط
ماشي يا ولادها
محني م القهر
من تقل الحمل
وذكايب الهم
مربوطة تربيط
****
سحبُه الكلاَّف
أبو سيف سياط
من نخزه وشخطه
قام سلطح ضهره
من سوء يخته
ركبه ابن الحاوي
ولعبه شوطين
وجراب الحاوي
مليان تعابين
حبة حرامية
عايمة علي الميَّة
ف بحر غويط
أزاي ها يموت
الحوت في الميَّة
دا البحر الثاير
لو رمي موجه
ها يلاقي معونة
من ألف محيط
*****
أنا فاكر جدي
أبو عقل رزين
كان يوم علِّمني
طول ما انت موطيِّ
راسك أو محْني
يا ابو عقل طخين
فيه ألف ها يركب
علي ضهرالبغل
ويهزْ ف رجله
شمال ويمين
[/CENTE

[نادية بوغرارة]

مواويل عاشق


الشوق لو فات ع البيوت
يشفي الجروح م الآهات
يسقي الورد
اللِّي دبل في القلب
وعلي خدود البنات
فيطرح الأمل من تاني
وردة وسبع يمامات
****


طرحت ف الفضا شبكي
أصتاد قلوب نجمات
فتحين ببان الهوي
والشوق للقمرات
طلع الشبك بنصيبي
دقة ف قلب حبيبي
وردة وسبع يمامات
****
ما قلت قلبي انكَّسر
ولا نحت ع اللِّي فات
أنا اللِّي قلبي انشبك
من غمزه هيمانه
صادتني نجمة ليل
ويَّا القمر سهرانة
عصفور سجين وجريح
طلع غناه أهات
كاس الهوي مواويل
ووردة وسبع يمامات
****

عصفور بزقزق ع الشجر
طالع غناه حزين
كان باني عشه ع القمر
يساع م الهوي قلبين
باعه للغراب لما اتعزر
من كم شهر فات
مسح دموعه ف جناح
ورده وسبع يمامات
****
يا شمس فين صباحك
مخبيَّاه فين 00!!؟
في ضفاير الصفصاف
ولاَّ في كُحلة عين
عدي الغراب و فات
جرح الوطن جرحين
قلب حبيبي وأنا
ساعة الوصال واللقا
قال بالجروح سلامات
يا شمس هاتي الدوا
وردة وسبع يمامات
****

مين اللِّي ظلمك يا وردة
وهال عليكي التراب
قلوب جارحة وحدادي
ولاَّ من الأحباب00!!؟
مش كنتي علي غصنك
بتكتبي جواب
شرحتي فيه للناس
شكوي تملا كتاب
قلتي سبب غلبك
شوقي اللِّي يوم غاب
خطف الغراب القلم
وصفحة الكراس
ليه النواح والندم
والبكا ع اللِّي فات
وحياة رب القدرة
قبل ما يجي بكره
لجيبلك قمر سهران
ومعاه كمان قلبي
ووردة وسبع يمامات
****
كان نفسي أطلع للقمر
ويَّاكي قبل الممات
لكن أمالي المتعلقة
في الماضي اللِّي فات
مستنيه الأيام تمر
وتشد حبال الذكريات
تجيب السبت اللِّي فات
والشوق00 لما فات
لقي عضم الجدود
اللِّي مدفون ف التراب
طرح وردة وسبع يمامات

[نادية بوغرارة]

حبة زواق

حبة زواق للضلال
الوش مليان رتوش
جيش التحالف حالف
لينتف شعر الرموش
من عين حبيتي بلدي
ومن أصحاب العروش
اللي باعوا بكل خسة
أرض العراق لبوش
والسبب برضه إحنا
ناكل ونملا الكروش
زي خراف المرابض
إن جالها سبع أوديب
تبيع جلدها بقروش

[نادية بوغرارة]

ونسْ


لمَّا يطول بينا الطريق
والموج ياخدنا ف رحلته
بحر الحياة جب وغريق
هو حبيبي وانا قسمته
****
الرحلة دايماً تحتاج ونسْ
يهون عذابي في طلته
إن مت أنا أبقي الغريق
في بحور عنيه وضحكته
وإن عشت تبقي دنيتي
في جنته صحبة ورفيق

[نادية بوغرارة]

فاضل لي ثانية وأموت
:os: :tree: :os:
ليه فكَّرتيني بجرحي
فاضل له ضهر هموم
يطيب لو تضحكي
أنسي العتاب واللوم
ينزف لو تزعلي
صوت الآهات مكتوم
****
فمتعمليش حسابي
فاضل لي ثانية وأموت
وأنت كنتِ حبَّاني
ما تحضَّريلي تابوت
أو تبعدي حُرَّاسك
ألقالي سكة وأفوت
اخد الولاد ف حضاني
وأخدك في أحضاني
وأفضل لحد ما موت

[نادية بوغرارة]

حلاوة روح

لو كنت زيِّ يا خلِّي
قلبك م الهوي مجروح
وعرق روحك العاشق
جوه الحشا مدبوح
قلبك هاينزف نغم
فتغني بلابل الدوح
تسمع ربوع الوطن
آهات بصوت مبحوح
*****
إياك تطاوع آلامك
وتئنْ لناس وتبوح
أو تشتكي م القدر
باب السما مفتوح
يزعق غراب البين
فتصرخ مهاه وتنوح
تسافر صرختك للمدي
تجي م الفضا وتروح
ترجع لقلبك صدي
ساعة طلوع الروح

[نادية بوغرارة]

حكم القضا
يا شمس خفي نارك
أنا مشوي ع الجنبين
الغربة نار ف الليالي
والوحدة نارها نارين
*****
ما بين ليلي ونهارك
قلبي دايب حنين
أتوه وأسأل عن دارك
يشمت فيَّا اللايمين
حتي النجوم تلاوعني
اسالها تقوم تسالني
قمر السما اللي نايم
بين النجوم والليل
ولاّ القمر اللي ساكن
ع الأرض كحلة عينَ 00؟
*****
الفجر لو جاب صباحك
دايماً يجينى حزين
بكره حكم القضا
يجمع سوا حبيبين
يا شمس حد يقول لي
هو القمر له دارين
*****
لونتي خدي بسمارك
والقمح اللي ع الشطين
والورد أحمر وطارح
يا صبية ع الخدين
ألقي دموعه ندي
ع الفل والياسمين
رغم اتساع الفضا
قلبي اللي صابه الهوى
أحتار يروح علي فين00؟

[نادية بوغرارة]

خللِّي بالك 00!!

زي نور الشمس
كل يوم يرحل ويغيب
إنذار يا حبيب
الشيب موش عيب
لو ناسي إنك بكره
ها ترحل وتغيب
****
كم ألف عروسة بتتمني
واحد زيك راجل شايب
عاقل له حكمة ورزين
ناجح ومهوش خايب
إتعلم من لغة الطير
إزاي يغفر ويسامح
ويدوب زي العاشقين
فصبح ف الدنيا حبيب
***
أنا مرة سمعت كلام ستي
بتنصح بنتي
خدي واحد أكبر منك
مهوش عايب
بحنانه يا حلوة
يدلع شوقك
لو حتى كان
كهل وشايب
ما هو أصله
في الحب خبير
****
وأوعاكي
من شاب لئيم
له نظرة عين ساحرة
بكلامه الحلو
اللِّي كأنه
ألحان عصافير
ياخدك للقمره
والنجمة الساهرة
من غير ما يطير
****
يزرع في مشاعرك
أشواق وحنين
ويملِّس بكلامه الناعم
علي خصلة شعرك
ويولَّع جذوة روحك
ويحط علي جمر الشوق
نار علي بنزين
وفي لحظة عشق
وانتوا تايهين
يقطف ويدوق
شهد حلو ومتقطر
وعد ومكتوب ومتقدَّر
اصل المسكين زي حلاتي
ماشي بالمقلوب
من ضي عنيك اللِّي بكهْربْ
لا قادر يبعد ولا يهْربْ
ولا حتَّى يتوب

[نادية بوغرارة]

يادي الكسوف 00!!؟


إلاَّ قول لي
لون الكسوف
في العنين
ولاَّ الخدود 00؟
نفسي اقول لك
بس الخجل
خلاَّني أقول
يادي الكسوف
***
أنا مرة شفت
خد القمر
أحمر 000
بلون الورد
مكسوف 00!!
***
لمَّا شافني
ويَّا نجمة
ف ركن السما
بنستهجي
ف الحروف

[نادية بوغرارة]

عشقاني يا عم
إترص إترص
يا ورق الخسْ
يا بو ضحكة نغم وحكاوي
من قبل العصر
نقعد نترصْ
صعيدي با بوي وبحراواى
صرِّين اشواقنا
في مناديل
نشكي ف مواويل
عن حال الغربة
وأحوالنا
ونداري دموعنا
في نن العين
دا الصبر طبيبنا
اللي بداوي
جراح ف الغربة
تهدّ الحيل
نرتاح مع كلمة
في غناوي
أو نغمة ناي
شجي وحزين
****
مسيرنا ف يوم
نرجع لك تاني
نشاور للشمس
قبل ما تميل
وتدوب نشوانة
في حضن الليل
تبعت نجوم
السما مراسيل
تقول للحلوة علي ميعادي
*****
إترص إترص
يا ورق الخسْ
يا بو قلب عاشق ومداري
أنا قلبي ببصْ
علي بنت ف خصْ
واقفة قصادهم وقصادي
عُشاقها كتير
صعلوك وأمير
ف عنيها يا ما قالوا غناوي
*****
غمزتي برمش
عصفوري في العشْ
زقزق وغني ألحاني
أتاريها من أمسْ
غوياني يا عمْ
وأنا برضه كمان
كمان زيِّها غاوي
*****
ف عزّ الليل
ألقاها بتدور
في فلك النور
وأنا المسحور
عاشق بجنون
النجمة الحلوة
بنت يماني
اسرح ف الكون
منا بها مفتون
ألقاني بتدور
في بحور وبحور
ألف وأدور
وأرجع تاني
*****
تظهر وتميل
مرة ف الحول
وتسيب للشوق
فيضان مواويل
يروي ملهوف قلبه شراقي

[نادية بوغرارة]

رنات محمول 00!!؟


ما تسيبها ترنْ
يا أبو درشْ
هبلاك
ونزلالك زنْ
ف البيت والشارع
وكمان ف الشغل
وإن كانت
رنة مجعوزة
وسكت عليها
وطنِّشت
تبعت لك
رنة و رسالة
تطلب حاجات
ملهاش عوزة
وتخلي جنابك
تطلع عفاريتك
تضرب بجناحك
الهوي وتهشْ
****
بتقول لك 00
إياك الليلة تتأخر
هتلاقي الباب
زي إمبارح
مقفول بالضبَّة
ومتسكَّر
وإن بدَّرتْ
وجيت بدري
هاتلاقي النور
لاحمر نُّور
والبدر منُّور
ومدُّور
وتلاقي أوضتك
مفروشة
والورد مفتَّح
ومزهَّر
****
عصافير الجنَّة
بتغني بعشق
مواويل للحب
والورد برشْ
العطر الفايح
حوالينا رشْ
بتكلم جد
مش كدب وغشْ
بس أنت
بلاش تتأخر
عجل وتعالي
يا أبو درشْ
****
لو نفسك بقي
تحلَّي السهرة
هات وياك
حبة فاكهة
كتر يا حبيبي
من المنجة
لو كات خضرة
أو عجْر
لفها يا حبيبي
في حبة قشْ
دا بنار الهوي
تستوي ف العش
ما تشهِّلْ يا لله
يا بودرشْ 00!!
الفجر الليلة
جاي بدري
وساعة الحظ
ما تتعوضشْ

[نادية بوغرارة]

طعم الهوي

عصفوري الصبح غني
فتحت له عنيَّا
بني عشُّه حبة قش
لفْ الهوي حواليَّا
رماني بغمزة رمشْ
سهمْ ورشقْ فيَّا
******
دنا من حلاوة الروح
نسيت أنا جروحي
والرمش اللِّي صابني
واللِّي جري ليَّا
******
عصفوري اللِّي دبحني
رقص وشاغلني
قصده يصالحني
رسمته ورسمني
زقزق يلاعبني
أنا سبته يلعبِّي
حضني بجناحه
وسقاني حنيِّه
حضنته برموشي
تَبِّتْ بإديَّا
طوقته أنا بشوقي
وشهد وملاغيَّة
دوقني طعم الهوي
طعمه صباع عسليِّة

[نادية بوغرارة]

العوار

الولد الطيب
ما يعيط
إلا إذاً جاع
كل الحريمات
وبناتا لحي
قالوا الواد ضاع
*****
ما هو نازل بكا
ودموعه بتسحْ
فاكرينه جعان
سدر أمه الناشف
ولبنها البح
سَبِّبْ نهجان
*****
أتاري العلَّة
وسبَبْ الأوجاع
الداية الجهلة
أم صباع
خرمت له عينيه
والنظرة متاع
حرمته م الضي
والضي مشاع
ببكي من حالنا
مش ع اللي ضاع
دا ع اللي جرالنا
مع إنه شايف
في الدنيا
نص الأوضاع

[نادية بوغرارة]

نفس رضيَّة
يا نفسي الرضيَّة
يا سبب البليَّة
ليه الملام
أخالفك وأعاندك
لو تأمريني
بشيء مش تمام
****
أصل أنا عاجنك
وعارفك وخابزك
ساعة الخصام
غبية وعنيدة
تموتي ف المكيدة
وشغل اللئام
****
ذكية وخبيثة
تموتي ف الخبيصة
عشق وغرام
مهاودك شيطانك
وساحبه حمارك
بحبة كلام
****
دي ناس مرازيه
تموت في الأذية
لا بيحبوا غيرهم
ولا بردوا تحية
بينهم وبين
الود خصام
مالنا ومالهم
نسيبهم ف حالهم
وده مش حرام
لو نسناهم
وريَّحنا بالنا
نعيش ف سلام

[نادية بوغرارة]

قانون السيطرة

كانت الحما زمان
تتعلَّق علي الأبواب
لجل عروسة إبنها
ليلة فرحها وعُرسها
ما تخطِّي عتب الدار
إلاَّ من بين رجلها
شفتوا يا ناس
بدع المره
سنت قانون
للهيمنة والسيطرة
قال يعني عايزه
تقول لها
م المبتدا وتذلِّها
الأمر ف الدار هنا
بشورتها هي وأمرها
حتي الهزار والفرفشة
بين العروسة وابنها
****
مخاليق ياما ف الفضا
والفضا بابه كبير
متعلقه ف باب منتدي
زي الحما واقفين غفير
أصناف كتير م البشر
أنا شفتهم قلبي إنشرح
اتدحرجوا واتجموا
زي عواجيز الفرح
وارثوا مهام الحما
غاوين قيادة وهيمنة
لهم مهارة ومقدره
ع الإنبساط والعكننة
يبرجلوك بكلام جميل
فاردين جناح الهيمنة
شخط وإمارة ونأورة
بلسان طويل
*****
فيهم الغبي ويَّا الذكي
وبوقلب طيب والأمير
واللي دايماً يشتكي
والواعي
و أبوعقل كبير
اللي كلامه يطلع حكم
نسمة نديَّة تشفي عليلI]

[نادية بوغرارة]

إهانة للرسول تاني 00!!؟

مش عارف
والله يا إخوانَّا
إية اللي صابنا
وجارلنا
وبقينا ملطشة
ومادة فرفشة
في رسوم بالإيد
عن حقد جديد
جي م الدنمارك
ولاَّ السويد 00؟
****
بيسبُّوا رسولنا
ومعاه إسلامنا
وإن ثورنا وقلنا
وعملنا مظاهرة
ننصر بها دينا
يطلع كداب
من تحت أبواب
خالتك
الأمم المتحدة
ويقول إرهاب
يبعت كم ديب
له ضفر وناب
ينهش
و ياكل أولادنا
****
أصل الديابة
عارف طريقتنا
بولده وخاملين
أهملنا دينا
وحياتنا
ونسينا من دينَّا
جهادنا
****
يا رسول الله
فقدين الحيلة
ولا لينا وسيلة
تاخد بإيدينا
وتنجدنا
ليللنا طويل
اطلب م المولي
يقوي أيمانّّا
ويهدي ملوكنا
وحكَّامنا
في ظلام الليل

[نادية بوغرارة]

نصايح ستِّى ]

ديك الخزانة
الصيَّاح
شغَّال بالأجرة
ليلاتي
من عهد
هارون الدبَّاح
ياما أنقذ
م القتل بناتي
زما قالت القصة
حكايتي
في ليلة
و ف ألف صباح
****
لا ابيضت
من شعرها
خلصة
ولا قال شهر
علي بنته
دا من الجعزة
ولا خلاَّ المعزة
يا أخوانا
شعرها يبيض
****
الشيب
موش عيب
ولا لون الشمس
في يوم ها يغيب
أحياناً بنلاقي
كم ألف عروسة
وده مش عيب
بتموت
ف رجل شايب
عاقل ورزين
***
أنا مرة سمعت
كلام ستي
بتنصح بنتي
خدي واحد
أكبر منك
مهوش عايب
بحنانه يا حلوة
يدلع شوقك
لو حتى كان
كهل وشايب
وأوعاكي
من شاب لئيم
بكلامه الحلو
يسمَّعك
ألحان عصافير
نغمها حزين
ياخدك للقمرة
والنجم الشارد
من غير ما يطير
يولع ف مشاعرك
نار علي بنزين
ويدوق الشهد
من ضي عنيك
سكر ومكرر
متقطر يا حلوة
ف قلبك تقطير
وعد ومكتوب
****
وان قلتي
ف يوم وفيَّ
وعودك
يضحك من خوفك
ويلوعك
وماهوش مكسوف
زي الدبور
يلف عليك
يلدع ويدور
و يلسِّنْ
ع البت حبيبته
لو حتي قريبته
بكلام معيوب

[نادية بوغرارة]

[ رمضان كريم
رمضان كريم يا شعرا
وانتم طيبين
إيه رأيكم لو قلنا
حبة كلام حلوين
****
ننقع حروف القصايد
خشاف للصايمين
مدام غلوا الياميش
بشر وزبيب وتين
حتي الهوا والميَّه
والعيش وقمر الدين
*****
يبقي فطارنا كلام
دعا ابتهال تايبين
أما السحور تهجُدْ
حبة بكا نادمين
نغسل قلوبنا القاسية
يمكن نفوسنا العاصية
ف غفلة أو قول ناسية
عملت ذنوب وخطايا
من آلاف السنين
إيه رأيكم يا شعرا
نصوم ونفطر سوا
ولا انتم مش ناويين ؟
*****
اللي ناوي معانا
من أول لشهر الكريم
يطلب من مولانا
يهدينا والسامعين
يرفع إيديه للسما
ويدعي كعانا ربنا
أو يقول ورانا آمـين [/frame][/frame]

[نادية بوغرارة]

كابوس 00!!

أنا كل مَنُّوي
أروح أصليِّ
أمور غريبة
بتحصل ليِّ
ألقي شيطاني
أبن الجنَِّي
يحضر بسرعة
يشاغلني
يفضلْ يوسوس
يخايلنيِّ
بكل آمالي
اللي ف بالي
يحلِّي فيها
يزين هالي
وأنا من خيبتي
ومن عبطي
أسرح معاه
غصبن عني
*****
ساعات يجيني
ف منامي
فشكل كابوس
ألقاني معبَّط
ف عروسة
يجي من ألف
عروسة
ناكشين الروس
ترقص لي
رقصة مهوسة
اجي ألماسها
أو أقرب منها
أو أبوسها
ألاقي نار بتحرسها
تولَّّع ف الدار
*****
أصرخ وأحاول
أنجد نفسي
ألقي عضلاتي
مشلولة
وألقي العروسة
تقلب غولة
تخنقني
وتكتم هوا الأنفاس
اصرخ وأقول
يا إخوانا
يا اطيب ناس
حد منكم ينجدني
ياخد بإيدي يدخلني
روضه وجنة
منا بتمني 00!!
****
أتاري صوتي
مش طالع
والبيت والع
ما بطفي ناره
غير صوت جامع
باعت لي
من عالمدنة آدان

[نادية بوغرارة]

جنَّة الشعراء
ابو العلاء المعري
عمل للشعرا جنَّة
أنا فاكر لمَّا قال ليِّ
متقسمة درجات
الفصحي درجات عُلا
والعاميِّ والرُّرجاز
في أسفل الدرجات
تتمتعوا بالهنا
وتعيشوا ف الخيلات
وتتجوزوا التوهان
وعذاري وحوريَّات
*****
أما بتاع العامي
زي طور المتغمي
يدور ف الساقية يروي
ورد جناينكم
والقمح والنخلات
ويبات يحلم ببكرة
يدخل ينام يرتاح
ف جنّة’قلوب البنات
*****
ساعات بثور واتجنن
زي طور الوسيَّه
أنطح بقرني الحيط
وأبعت وراكوا عنيَّا
واتمني يا حسرة
جنة دانتي ف إيطاليا
ألقي فيها حواليَّا
إنشالله حتَّةجاريه
حبشية أو برمكية
تنعي حظي التعيس
بكلام حب في مواليا

[نادية بوغرارة]

طعم الألم 00!!؟

ما هو لمّأ حكم ظلم
من كاسه وسقاني
سقي ابويا منه زمان
وشربته أنا من تاني
علقم يا طعم الألم
كل الجروح تعباني
والآهة جوه الحشا
بتقول لي آه ياني
قلت لطبيب الجرايح
هو المرض ده مزمن
ومالوش علاج شافي
ولاَّ دواك يا طبيب
هو اللي عيَّاني

[نادية بوغرارة]

ساعات انسى الالم

ساعات انسى الالم
واكتب وانا فرحان
يرقص ف ايدى القلم
يميل ع الورق نشوان
وساعات اكتب حكم
قالها الحكيم لقمان
واكتب قصايد غضب
واعتب عليك يا زمان
واكتب اغانى الغزل
فى الحب والاوطان
ولما القلم يصاحبنى
ويشوف عيون بهية
ينط جوه فى قلبى
يشطب على الاحزان

[نادية بوغرارة]

مهاجر
مهاجر 00وتايه
ف ليلك و نيلك
ودايماً مسافر
في نظرة عنيكي
****
تحت رموشك
بحرك و موجك
ثاير وهادر
خدني اليكي
شوقي اللَّي راكب
قلوب المراكب
عصفور وطار
يدُّور عليكي
***
رمشك هداني
في ضَيّ الفنار
ونوره اللِّي جاني
شعاع من سراب
خبيِّ المواني
وضى الوشوش
وقلبي اللِّي راسي
ف حضن الرموش
فارد شراعه
لطلة نهار

[نادية بوغرارة]

تـنــهــيــدة 00!!

قمرنا الليلة ليه غايب
ما هلْ هلاله ولا نوبة
باين عليه نسي معادي
أو راحت عليه نومة !!؟
*****
معرفش ليه أنا خايف
يخلف معايا مواعيده
يوحِّي الشمس تتأحَّر
يغيب فرحي يوم عيده
لا يطلع صبح وينُّور
ولا نغني أناشيده
*****
بنات الحور أهي سامعة
شوق قلبي وتنهيدهُ
مداريه القمر عنِّي
ما بيين الرِّمشْ والننِّي
بعتت وراه سنين عمري
تلِّف عليه وتجيبه
ليقت روحي اللِّي هيمانه
بتقول الورد و تعيده
دعيت وقلت يا ربي
تحن عليه وتسيبه
*****
سمعت النسمة بتقولي
بنات الحور مظلومة
قمر ليلك رحل بدري
هناك ف السما السابعة
لنجمة شاردة وبعيدة
غايبه روحها ومقبوضه
خايفة تحب أو تعشق
تطلع روحها ف تنهيدة

[نادية بوغرارة]

نصايح فكاهية
:woot_jump:
مش معقول
دي نصيحة
بنية صادقة
و سليمة
طول ما القول
طالع من نفس
كلها خبث
و لئيمة
***
باين ف حروفها
كلام أبيح
وشتيمه
طب بص وشوف
وراجع قولها
ها تلاقي كلامها
رد علي حادثه
قديمة
***
قالوا ف الأمثال
لو قال الأقرع
يوم أي نصيحة
أوعاك تسمع له
يابو عقل كبير
لتبقي فضيحة
***
وإسال نفسك
لو راسي وحكيم
وكلامه سليم
كان خلاَّ راسه
بقي صحيحة
:woot_jump:

[نادية بوغرارة]

لمسة حنان

يا ورد مين خلاَّك
دبلان علي غصونك
خولي جنية ولاّ 00
الهجر نشف عودك
هو حبيبك هجرك
ولاَّ نسي مواعيدك ؟
****
أتاريني زيك يا ورد
نازله دموعي فيضان
دبلت ونشف عودي
م الصد والهجران
أبعت شوقي مراسيل
وأبات حزين حيران
ألقي مراسيلك
جايبه عتاب ف ردودك
****
نسيت الهوي ونسيتني
ونسيت كمان وعودك
هو انت بصحيح حبتني
ولاَّ أنا اللي حبيتك
آه لو يا غالي تجيني
وتوفي بقي مواعيدك
تحيي الهوي وتحيني
بلمسه حنان من إيدك

[نادية بوغرارة]

الأهداء إلي الصديق الصباح الخالدي
أنا وانت 00ونكَبَّرْ
بالحب تلقاها
فارده جناحتها
من بعد ما خرجوا
وسعنَّا أبوابها
وبدرنا وادي النيل
ورد وقلوب خضرة
وكتبنا ف المواويل
الكعبة والحضرة
****
سهرانه طول الليل
مشتاقه لأخوتها
حتي الصباح الخالدي
فتحاله دراعتها
ومحضره ما وردي
****
باب الحديد مصر
ويَّا الفتوح نصر
واللوق وزويله
أم حضارة العصر
ضمانا ف أحضانها
حتي المدي ضمَّاه
ضمَّاك وحاضنها
كل العرب ف احضانها
حميانا و حمينها
أم الشهامة بجد
ورثة الكرم م الجد
حاتم الطائي
منسفه يساعي
الخلق وملايكة
بيني وبينك غوله
حطه سلوك شايكة
ابعت قلبي يزورك
تبعت ليالي مباركة
بكره تموت الغولة
وأناأعرف أموتها
أصل قضاها متقدَّر
ما بين عينها والمنبَّر
نرمي عليها سهامنا
أنا وانت ونكبَّرْ