حبيبتي والدستور

[محمود موسى]

أزمة الجنس اللطيف
إنه لما تعيش حبيبتك تجربة تحرير وثورة
تبتدي نقلة متابعة
من برامج "سفرة دايمة" أو "جَمالك أولاً"
أو "يوم أناقة"
تتنِقل مع صحبة التوك شوز ، وتِسْرح
وسط مِيت مليون حوار..
بالمناقشات اللي كان أولها كلمة وتنتهي
بعْيون ضيوف المشرحة طقت شرار..
جت في مرة مضيقة عينيها، وْصُباعها زي رشاش المقاومة..
هزته وقالت: مؤامرة !
قلت: خير؟
قربِت مني وقالت لي:
حزب نهضة وحزب نكسة وضاع ما بينهم
مسلك النور والضمير
مش موافقة يتفرش دستور على أرض المجالس
بانتخاب ينطق بسيف الأغلبية
يحتكم تيار ما نضمن كان ظلامي
ولاّ هيكون مستنير..
قلت: حِيلك
شايفة لو خلوا البداية دستورية..
والمجالس والرئاسة تبقى مش سبتمبرية..
مش هتفضل مشكلة فخ المصالح هيا هيا ؟
ولاّ فاكره اكمنه هيكون أولاً
ناخد عليه دستور هدية؟
دبدبـِت رجليها في الأرض وقالت لي
مش بحبك
والهدية اللي انت من يوم جبتها
مش حلوة خالص..
هه عشان شايفاك بتتريق عليا..
سِبتها وتنيتني قاعد.. قلت: لو نعقل شوية !
هو دستور البلد دي.. سقفتين يطلع شِيطاني؟
ولاّ رأيك زي ناس بتقول هيتدبر بلجنة يحطها المجلس
بأمره العسكري
فيقوم لها من راح يقول: مجلس أناني؟
(فرّغِت كوباية الينسون وقالت):
ننتخبها !
قلت سبحان اللي صبَّر..
يعني هو اللي ف إيديه السيطرة ع المجلسين
مايكونش قادر بانتخاب اللجنة يطلع صوته أكبر؟
(دُقْت أول شفطة م الينسون فقالت: ناقصة سكَّر؟)
ثم لو قلتي لي إن الناس ما تعرفش بصحيح اسم المفكر..
ولاّ أعضاء اللجان
راح تحددهم بقُرعة؟
ولاّ نضرب بالودع نضمن لدستور البلد
يطلع بسرعة؟
تاني هضرب لك مثل.....
اللي جنبك يبقى إيه؟
-كمبيوتر
-فكّريني.. لما أول مرة حبيت اشتريه..
سِبت نفسي لأي حد من اللي كان بيتاجروا فيه؟
ولاّ فوضت اللي انا استأمنته عني
وقلت فاهم في اختياري وهيراعيه؟
فكّرِت لحظة ولقيتها ماسكة بإديها الريموت..
وبعينيها الشاردة قالت
حسّة إن الشاشة باردة..
والهدف عند القناة بعد القناة نسبة مشاهدة
والأهم انك نسيت قبل امّا تيجي لتاني مرة تجيب لي وردة !

27/6/2011

[الطنطاوي الحسيني]

(فرّغِت كوباية الينسون وقالت):
ننتخبها !
قلت سبحان اللي صبَّر..
يعني هو اللي ف إيديه السيطرة ع المجلسين
مايكونش قادر بانتخاب اللجنة يطلع صوته أكبر؟


قصيدة سلسة الفكر والطرح واضحة الابداع
للتثبيت معايشة و ابداعا و تقديرا
شكرا اخي محمود لهذا الآلق

[محمود موسى]

(فرّغِت كوباية الينسون وقالت):
ننتخبها !
قلت سبحان اللي صبَّر..
يعني هو اللي ف إيديه السيطرة ع المجلسين
مايكونش قادر بانتخاب اللجنة يطلع صوته أكبر؟


قصيدة سلسة الفكر والطرح واضحة الابداع
للتثبيت معايشة و ابداعا و تقديرا
شكرا اخي محمود لهذا الآلق
الراقي المغرق في الذوق والجمال -رغم تقصيري- أستاذ طنطاوي
لك كامل الود والتحية بقدر مايعكسه بالغ كرمك

[محمد الشحات محمد]

الله عليك

بالحب و الشعر و العقل

استطعْتَ أن تجعلها تفهم "ما تطلبه القنوات"

و تذكّرها أن من كان أميناً علينا
له الأولوية في الاتخاذ برأيه ،

و من خلال قصيدتكم الرائعة
أُوجّه التحية -و بترَوِّي- إلى المجلس العسكري ،



و التحية لك أخي / محمود موسى

لا تنس الوردة

[ربيحة الرفاعي]

رائع
قصيدة جميلة الفكرة ومتميزة في معالجتها بانساب هاديء وحوار ذكي نافع
وجرس عذب سلسل يطرب السامع

أرفعها لمناستها اللحظة

أهلا بك شاعرنا في واحتك

تحاياي

[آمال المصري]

كانت لغة الإقناع رائعة بحوارية أنيقة
انهمار جميل عهدناه منك شاعرنا المبدع
دمت واليراع
ومرحبا بك في واحتك
تحاياي