كلم بابا

[محمود موسى]

كلم بابا - نظرة على برلمان مصر القادم


ونقول كمان..
المجلس المولود حديثًا
لسة محتاج أب شرعي يعترف
إن السيادة الممكنة
قبل انتخاب الأب أبعد
من إيدين البرلمان..
لكنه خطوة بتعترف
بوجود رحِم للشعب يقدر
يسبق العمر/الأوان
وانت اللي شاهد ع الميلاد
قدام شهادتك سكة بين السكّتين
1-الأولى إنك تبقى شايف في العساكر
سلطة بتحوّل بلادك زي ماتكون الأمَة
من بين إماء..
والمجلس اللي بيتولد كان امتداد
لحياة "زبيبة" و"عنترة
وامّا خرج للدنيا كان مشحون
بأصوات المديح قبل الهجاء
عدم اعتراف السيّد الآسف عليه "شداد"
ماكانش بيمنعه
من صد غارات القبائل..
تحتفل بيه العشيرة.. إلا واحد بس
سايق في الجفاء..
2-والتانية إنك تبقى شايف
في الوصول للبرلمان الحر أصلاً معجزة..
ويتم تشكيله بسلاسة برغم
إنه مافيش حكومة تهندسك..
ولا أمن مأمون يحرسك..
ولا أب شرعي يورثك..
فتشَبّه المولود.. بـ"عيسى" العبد
لما بيتولد إعجاز مصاحب للندا
من أم زي الصبح جاهزة لاستلام الشمس
مستعجل بريدها اللي اتبَعَت
على أي صندوق انتخاب..
جايز يكون تشبيه موفّق
بس تلقى ان الأخيرة مش هتنفع حل دائم..
وان في الأوضاع فُروق
تستوجب المشي الضروري
خطوة ولاّ اتنين كمان..
والمجلس (اللي ماهوش مَسِيح) محتاج لأب
يحط هيبة "عنترة" بين القبائل سيف مسَلَّط
مش لسان..
وعشان كدا الصورة الوسَط
ماتقولش للمجلس بلاش
لكن بتعكسلك بإن الثورة لسة مستمرة ف سعيها
عاش الميدان

محمود موسى
30/11/2011

[ربيحة الرفاعي]

سعدت بالنص حتى اني لم أملك عليه ردا
وشكرت لك روعته حتى لم أملك أن أمضي دون ترحيب بهذا الإبداع

شكرا لروعة الهطول شاعرنا

تحيتي

[الطنطاوي الحسيني]

والمجلس (اللي ماهوش مَسِيح) محتاج لأب
يحط هيبة "عنترة" بين القبائل سيف مسَلَّط
مش لسان..


أخي محمود موسى
سلام عليك وعلى ابداعك واسقاطاتك وتشبيهاتك
القصيدة تستأهل الاشادة بشدة
وتستاهل التثبيت برفق
دمت مبدعا
رائع وجميل وهذا فن نحتاجه كما نحتاج الماء ايها المبدع الجميل

[احمد محمد جبر]

عاش الميدان وعشت انت كمان
قصيدة تقرأ بدل المرة مائة مرة بلا ملل معنى ومغزى وجمال
تقبل مروري

[آمال المصري]

على قدر روعة النص وتكميم الحرف عن مجاراة ألقه ...
إلا أنني لاحظت تثبيت النص ولم يمر به صاحبه بعد !
خالص التحايا