كداب زفه

[سامى عبدالعال]

زفه تعدى وزفه وراها
مليون زفه لكام كداب
فتح عينك بص ودقق
جوه الزفه
تشوف نصاب
حواليه شله تجيب العله
اللى مأبج .....واللى جبله
واللى مالوهشى لادين ولا مله
شلة رقص لحد الباب
زفه تعدى وزفه وراها
مليون زفه لكام كداب
سيدنا الباشا
عليه اسم الله
النبى حارسه وصاينه شباب
طول السكه يعدى يسلم
يحضن فيك
ويبوس على اءيدك
يترجاك محتاج لجهودك
يوم اللجنه خلاص اهه قرب
اوعاك تنسى
ده عيدى وعيدك
ادينى صوتك ماذا واءلا
كل حياتك تبقى خراب
زفه تعدى وزفه وراها
مليون زفه لكام كداب
جوه الزفه هاتسمع منه
أنا مترشح لجل حمايتك
لجلن تبقى ف أحسن حال
لجل بلدنا تعدى الأزمه
ومفيش حد يكون بطال
الانفاق
لازم ترشيده....
واخد حقى ف راس المال
يعنى حقوقك ...طبعا فاهم
دين فى رقبتى وشغل حلال
زفه تعدى وزفه وراها
مليون زفه لكام كداب
فتح عينك شوف هتلاقى
جوه اللجنه بتوع الشنطه
بمبه تاخدها وزفه أونطه
عدى صاحبنا
وفات على طنطا
راح نبنيله مقامه هناك
زفه تعدى وزفه وراها
مليون زفه لكام كداب
أوعى..!!
ياصاحبى تديه صوتك
أوعى...!!
تقوله انا رهن اشارتك
ولا تقوله ياباشا اطمن
مايهمكش احنا بتوعك
كلنا جنبك...!
رهن اشاره بخنصر ايدك
د احنا ياسيدنا الباشا
عبيدك...!
تبقى منافق أو نصاب
زفه تعدى وزفه وراها
مليون زفه لكام كداب
بص وشاهد مره بنفسك
أيها جلسه على التلفاز
تلقى صاحبنا
ف سابع نومه
شارب نص صفيحة جاز
يرفع نص صباعه
موافق...!
وان مارفعشى
يبقى موافق...!!!
تضرب تقلب كله مجاز
همه الأرنب جنب الأرنب
يشترى عزبه يربى(....)
زفه تعدى وزفه وراها
مليون زفه لكام كداب

[آمال المصري]

سمعنا شعارات كتير ووعود أكتر
لكن ... كلها وعود كاذبة
نتمنى أن يتغير الحال وترجع مصرنا بأحسن حال
ولكن .. هل ستتحقق الأمنية ؟؟
نص رائع يحاكي واقعا ملموسا صيغ بأسلوب محبب
تحيتي

[الطنطاوي الحسيني]

اخي الشاعر المبدع سامي عبدالعال
صراحة نص يحمل تاويلات
وان كان اقربها من اذلونا سنين مديدة واعوام عديدة ونسميهم جمع فلة
القصيدة رائعة وجميلة وسلسة
كنت اتمنى بعد ان وصفت الكداب في الزفة ان توصف ايضا زفة الصادق
حتى تصف الداء وتعطينا الدواء
هذه نظرة فلسفية ليس يحتاجها النص الجميل ولكن احببت ان افضفض معك شيئا ما
تقبل تحياتي ودمت مبدعا اخي الفاضل سامي عبدالعال

[ربيحة الرفاعي]

نص جميل واداء شعري رائع وهطول تنتعش له الذائقة

شاعر مبدع أنت
لا فض فوك

تحيتي

[سامى عبدالعال]

الأستاذة
آمال المصري
شكرا لمرورك العطر ومصافحتك الجميلة لهذا النص
وانشاء الله سيتغير الحال الى الأحسن
وستبقى مصر شامخة بأبنائها
تحياتي ومودتي

[سامى عبدالعال]

أستاذي الجميل
الأديب
الطنطاوي الحسيني

حينما أكتب تكون فرحتي بالنص ضئيلة للغاية
وحينما تصافح النص أشعر بالزهو وتنبت لي أجنحة عديدة
وأطير فرحا حينما تتوافد على متصفحي أقلام أدباء تلك الواحةا لجميلة
شكرا لك يا أستاذنا علي مرورك الطيب والعطر على متصفحى
تحياتي وواحة من العطروزهر الياسمين

[سامى عبدالعال]

الأديبة الجميلة
الأستاذة
ربيحة الرفاعي
شكرا لمرورك العطر
ومصافحتك الرقيقة للنص قد أضاءت جوانبه
تحياتي ومودتي