قصيدة : هو مين ؟

[د هاني ابوالفتوح]

هو مين ؟ !!
أصعب سؤال يا مصريين
بكرة اللي جاي يحكمكوا مين
أسهل إجابة في كلمتين
دا في علم رب العالمين
لكن السؤال يا ترى ...
الفجر جاي مليان حنين
وللا يادوب هلكان حزين
.......................
انتوا اللي أصحاب القرار
وانتوا بإيدكوا شمس النهار
انتوا ساحات الإنتظار
وانتوا الهزيمة والإنتصار
انتوا العزيمة والإنكسار
انتوا اللي ممكن تزرعوا
أو تقلعوا أو تركعوا
أو تاخدوا تار
....................
لحظة قدر بتضمنا
علشان بلدنا كلنا
لحظة لوطن
لحظة مصير
لحظة لسنين
فكر وشوف
تختار لوطنك بكرة مين
شوف القوي شوف الأمين
شوف اللي نادى بعدل
ممكن بالعدالة نروح لفين
شوف اللي عايش ندل
هيخلينا إيه في العالمين
شوف اللي نفسه وبس
إوعاك كلام الكدابين
إوعاك من اللى يقابلك
بإبتسامة وضحكة صفرا
و قلبه مافيهوش ذرة دين
إوعاك خداع الغشاشين
......................
يا بر مصر .. يا كل دار
مصر خلاص طالبه العمار
مصر اللي صبرت عاللي راح
واللي سنين شايلة الجراح
واقفه بتصرخ من بعيد
بتقول يا ناس فكوا الحصار
عاوزة الأمان
في كل بيت في كل دار
دا أنا من سنين
واقفة وبأْسْتَنَّى النهار
شعر د هاني ابوالفتوح

[محسن البدراوى]

جميله كلماتك هنا
بس للاسف كل حاجه خلاص اتسرقت حتى نجاح مرسى مش هيكون دليلنا فى عتمة الدروب
اسقطو مجلس الشعب لتكتيف الرئيس الاسلامى القادم سرقو منه السلطات لانه قادم بدون دستور
ووضعو رمز للنظام القديم لمعرفت نبض الشارع حتى يحين الوقت لاعادة النظام الفاسد
ادخلونا فى المشاكل والضيق للكفر بالثوره
انتظر المزيد
ولمصر السلامه
تحيتى وبالتوفيق

[محمد محمود محمد شعبان]

أهلا ومرحبا دكتور هاني
أحيي بك حضورك المستمر المواكب للحدث ، ونبض مصريتك المتقد
تحية بحجم السماء


حمادة الشاعر
مشرف عامية

[ربيحة الرفاعي]

نص شعري نابض بحب الوطن معايش لظرفه وأوجاعه

أهلا بك شاعرنا في واحتك

تحاياي

[آمال المصري]

مازالت قصائدك تشاركنا الأحداث في حينها
تلهب حماسنا وتواسي وجعنا وتبدد يأسنا أملا
دام لك الألق شاعرنا الفاضل
وكل عام وأنت بخير
تحاياي