سجون الصمت

[محمد محمد سعيد]

سجون الصمت


اللحن رافض يتعزف ليه يا ترى!!!!!
والمعنى فينا بيتخنق
والحلم مش قادر يكون... غير السكون
غير دمعة مرة مكـتـفـة ننى الـعـيـــون
عن كل خطوة دوستها فوق السكك
عن فين وفين..عن مين ومين
مش قادر اكتب ولاّ اقول
كل اللى سال من حبر قلمى نقــطـتين
بعديها ضاع منى القلم.. معرفش فين
وفضلت وحدى اشتكى الزمن اليتيم
وسألت نفسى رغم كل اليأس... ليه؟
ردت وكان الرد............
اصعب من سجون الصمت وآهات الألم
راح تكتب ايه!!!؟؟؟
الجملة دلوقتى لها مليـــــــــــــون شبيه
والمعنى من كتر الكلام اصبح فى تيه
من بين جمود الدم فى عروق المعانى والحروف
عديت حدود الخوف وطلعت صرختى
رايح اكتب ايه!!!؟؟؟
رايح اكتب الكلمة اللى فيها النبض من قـلـب الحــيــــاة
مقدرش اشوف الدمع فى عيون البشر ولا اقولشى اااااه
ولاّ القلوب الصافيه مسروق حلمها والياس بالغ منتهاه
مقدرش اشوفك يا حبيبتى معيــطـه
ف عيون ولادك والحقيقه مشخبطه
براويز قزازوناس لُذاذ موميات حجات متحنطه
ما اقدرش اشوف... ما اقدرش اشوف
عرق الغلابة ع الجبين معجون بخوف
مقدرش اشوف الدم على جثِّة وليد
آهين يا دمى عيب عليك... مين برّدك جوه الوريد
عن انعكاس النبض من قلب السكك
رايح املا كل الدنيا قول
ولا عنت هسمح ينقفل بيننا الكلام
من بعد ما دق الجرس
ولا عادشى خوف ولا عاد خرس
***

[جمال النجار]

اخى العزيز وتوأم روحى وشاعرنا الكبير الاستاذ محمد سعيد
تعرف بقى انى دخت عليك فى غرف الواحة
ما سبتش شجرة ما بحثتش عنك بجوارها ههههههههههههه
واخيرا وجدت مكمنك
طبعا لى عودة الى رحابك الجميلة لاتمتع بكنوزك
مساءك زى الفل
اخوك
جمال النجار

[د.جمال مرسي]

لست أدري ماذا أقول

و أنا كما قلت لك من قبل أخي محمد أهيم في حروفك و أشعر أنها

تأخذني إلى عالم آخر .. إلى ما وراء حدود نفسي .

فأهيم و من ثم أعود من جديد لأنهل من هذا العبق .

اشكرك ايها الشاعر الجميل المتواضع .

و لست مبالغا لو قلت لك أنك من أجمل من قرأت لهم العامية مؤخراً

و لن أبلغ لو قلت أنك بحق :ملك العامية

دمت متألقاً

د. جمال

[محمد محمد سعيد]

السلام عليكم ورحمة الله وبركاته

توئمى الحبيب جمال باشا

كل تقديرى وحبى لشخصك الرائع

كلماتك دائما تسعدنى ايها الحبيب الغالى

كل عام وانت بكامل الصحه والسعاده انت وكل الاسره الكريمه

على صفحتى تعود وقتما تشاء فوجودك فيها يزيدها نور وجمالا

دومت لى ايها الاخ الرائع
اخوك محمد

[محمد محمد سعيد]

السلام عليكم ورحمة الله وبركاته

اخى الحبيب د. جمال

اقولك الاول بجد انتى وحشتنى ووحشتنى ردودك وكلامك اللى بيدخل قلبى

كل عام وانت فى كامل الصحه والسعاده وان يديم الله عليك نعمة الابداع وحب البشر

وكل عام واسرتك الكريمه بكل السعاده والهناء


اما عن كلماتك بخصوص القصيده فهى شرف لى ووسام اعتز وافخر به من قلب مرهف وشاعر بجد من هؤلاء القلائل الذين احبوا القلم واخلصو له

لك منى كل الحب والتقدير

[رشا عبد الرازق]

سجون الصمت




رايح اكتب ايه!!!؟؟؟
رايح اكتب الكلمة اللى فيها النبض من قـلـب الحــيــــاة
مقدرش اشوف الدمع فى عيون البشر ولا اقولشى اااااه
ولاّ القلوب الصافيه مسروق حلمها والياس بالغ منتهاه
مقدرش اشوفك يا حبيبتى معيــطـه
ف عيون ولادك والحقيقه مشخبطه
براويز قزازوناس لُذاذ موميات حجات متحنطه
ما اقدرش اشوف... ما اقدرش اشوف
عرق الغلابة ع الجبين معجون بخوف

***






دمعي انكشف
من فوق خدودي وراح وقف
على جمب أخضر بين حقايق كلها أسود في أسود
كلها
ف سطور حزينة بتترجف
دورت فوق صدر الوجود على حضن دافي يضمني
ملقتش غير كلمة أسف
منك وزيك كل واحد حبني
سارح على كتفك وهن
خايف لا تبدأ خطوتك
لحسن يكون بردو النصيب ان اللي ناوي على الوصول لازمن يقف
وانا خايفه زيك بس راضيه بقسمتي
ان انت تبقا فرحتي
وان الفرج ميكونش من عند الجيران
ولا ايد غريبه تشدني
سر الطيابه عندنا موصوف من النيل للغيطان
انك تجيبو وتزرعووعنقوده يطلع مختلف
شايفاك عايزني طب تعالى
شيل التراب من هدمتي
فرحني بيك وبرجعتي
رطب ترابي اللي اشتكى من قسوة الطين والقشف
دي ايدك عفيه شد ضهرك
متقولش غالي عليه مهرك
لو غنوتي اتسجنت معاك في الصمت يبقا هديتي
انك تحرر صرختي
من صمتها
واللحن من وسط البكا يطلع وعندك يتعزف














المبدع فوق التصور أخي الكريم محمد


تعجزني

احتار معك يا سيدي

ولا ارجو سوى ان أصل ذات يوم الى منبع مفرداتك لعلها ترتضي أن أنهل منها

لا اجامل ان أيدت قول أستاذي الدكتور جمال واكدت عليه



دعني أرحل في هذا الصمت طويلا فحزنه المنثور على ربابة شرقية يطربني ويشجيني


دمت بهذا الألق


تحياتي

[لحظة صدق]

اخى محمد

من منا لم يشعر بالغربة داخله يوماً

من من لم يزره الحزن و الألم

اجعل من حزنك بداية حرة جديدة لك

شمس

كلماتك حنونة رقيقة رغم الحزن الذي يلفها

و متوهجة كما محمد الذى اعرفه اخ وصديق

مها

[د. محمد الشناوي]

ما اقدرش اشوف... ما اقدرش اشوف
عرق الغلابة ع الجبين معجون بخوف
مقدرش اشوف الدم على جثِّة وليد
آهين يا دمى عيب عليك... مين برّدك جوه الوريد




بعض من الكل الذي أعجبني وأمتعني

سلم الله يدك

واكتب أنى شئت وكف شئت ما دام هذا الألق
دمت لي بخير

[محمد محمد سعيد]

دمعي انكشف
من فوق خدودي وراح وقف
على جمب أخضر بين حقايق كلها أسود في أسود
كلها
ف سطور حزينة بتترجف
دورت فوق صدر الوجود على حضن دافي يضمني
ملقتش غير كلمة أسف
منك وزيك كل واحد حبني
سارح على كتفك وهن
خايف لا تبدأ خطوتك
لحسن يكون بردو النصيب ان اللي ناوي على الوصول لازمن يقف
وانا خايفه زيك بس راضيه بقسمتي
ان انت تبقا فرحتي
وان الفرج ميكونش من عند الجيران
ولا ايد غريبه تشدني
سر الطيابه عندنا موصوف من النيل للغيطان
انك تجيبو وتزرعووعنقوده يطلع مختلف
شايفاك عايزني طب تعالى
شيل التراب من هدمتي
فرحني بيك وبرجعتي
رطب ترابي اللي اشتكى من قسوة الطين والقشف
دي ايدك عفيه شد ضهرك
متقولش غالي عليه مهرك
لو غنوتي اتسجنت معاك في الصمت يبقا هديتي
انك تحرر صرختي
من صمتها
واللحن من وسط البكا يطلع وعندك يتعزف










انا خوفى مش محتاج دليل

انا خوفى مش ضعف انما

دا صرخة القلب النبيل

ولا عمر كتفى يا حبيبتى بيشتكى

رغم الحمول

زيك بيرضى بالقليل

وقتن تحسى بالعطش

تلاقيه عفى

شايلك معاه للسلسبيل

واخدك على زمن الحقيقه والامل

ومخطى بيكى للسعاده الـف ميل

اوعك تقولى مستحيل

تفتكرى لو مات الامل

هل يبقى شىء ف الكون جميل

يا ريت صحيح اقدر اكون

فرحه بتمسح من جبينك

اى حزن او شجون

او اكون ف لحظة برد

حضنك الحنون

ضلايا لو شمس الزمن

حدفت شعاعها ع العيون

او همسه تسعد مهجتك

ونا وانتى قاعدين والسكون

فرحان سعيد من همسنا

بيقولنا

مدواالكفوف البردانين

انتى وانا

زى شراقى الارض فعلا عطشانين

والفرح جى لحدنا

واحنا بقى

اللى هنعزم الجيران

وآدى كفوفى ممدودين

سر الطيابه ف حيكم بيشدنى

طبطب على سدرى

ومد ايديه ف لحظه وضمنى

حسيت بانى ف الحقيقه مش غريب

حسيت بان زرعتى

راح تطرح الطرح اللى بيه الجرح فى لحظه يطيب

سامعك ف وسط اللمه بتقولى تعالى

شايف عنيكى المكسوفين

بتبصلى....... ياااااااااه

دول مليانبن قواله

وف لحظه تنزل طرحتك

على وشك الطيب عشان

يذداد جمال على جماله

يمكن صحيح التوب عليه حبة غبار

لكن طهارته وعفته

واضحه كما شمس النهار

وهمد ايدى متخافيش

لجلن اجيبلك توب ما جابوش شهريار

علشان اشوف الفرحه على وشك قمر

ولا اشوفش شكوى منها قلبك يرتجف

يمكن يكون اللحن على دمه انكسف

وخلاص نوى انه يا ناس راح يتعزف


***




الرائعه دوما رشا انا اللى نفسى اعرف بجد

من اين لك بهذه الرؤيه العميقه لمفردات الواقع من حولك سبحان الخلاق العظيم


حقيقى

اندهش من حسك الادبى المييز


ويدهشنى اكثر ردودك الرائعه


فانا اراكى بحق اميره تاجها الكلمات


بارك الله فيكى وحفظك دائما من كل سوء


محمد

[محمد محمد سعيد]

اخى محمد

من منا لم يشعر بالغربة داخله يوماً

من من لم يزره الحزن و الألم

اجعل من حزنك بداية حرة جديدة لك

شمس

كلماتك حنونة رقيقة رغم الحزن الذي يلفها

و متوهجة كما محمد الذى اعرفه اخ وصديق

مها


السلام عليكم ورحمة الله وبركاته

اختى طيبة القلب د. مــهــــــــا


اشكرك جدا على مرورك الراقى وما حمله من كلمات تعكس صدق

وشفافية احاسيسك


ربما احسست بنبرة شجن فى سطورك لم اعهدها من قبل

فارجو المعذره اذا كانت كلماتى هى السبب


لكى دائما كل تحياتى وتقديرى


اخوكى محمد

[محمد محمد سعيد]

بعض من الكل الذي أعجبني وأمتعني

سلم الله يدك

واكتب أنى شئت وكف شئت ما دام هذا الألق
دمت لي بخير


السلام عليكم ورحمة الله وبركاته

د. محمد الشناوى

كل شكرى وتقديرى لتشريفك لكلماتى

اسعدنى وادخل السرور الى نفسى

واعدك بان احاول ان اقدم دائما ما يرضى اذواقكم الراقيه

بارك الله فيك