عدسة هواكى متربه

[رباب جوده]

مابين سؤالى وبين جوابه
كان صمت باين فى العينين
حبة ثوانى مش كتير متجمعين
عاملين دقيقه
كات طويله فى عمرها
حسيتها يمكن وقتها
حبة سنين
حسيتها عمر بيتولد
وشريط حياة لو يتسرد
تسرح فى صوره
ألف عين

ما بين سؤالى وبين جوابه
حاجات كتير اتغيرت
ذكرى اللى فات من عمرنا
مرت قصادى وكبرت
كل الصور
مفضلش غير صوره
وحيده صغيره
جمعانا فيها اللقطه
والزوم من ورا
عمال بيبعد عننا
والعدسه واخده فى اللوكيشن
خط سير مش جنبنا
والناى حزيــــــــــــن

مشهد حقيقى ميتنسيش
الصمت فيه كان البطل
والصوت فى اول مشهدين
كومبارس دوره بيتقتل
والضحكه طالعه من ورا
ولد وبنت صغيره
فى العدسه كانوا مركزين
شافوا انفعالك فى العنين
ونا غصب عنى مشفتهوش
صمتك حقيقى كان قاتلنى
وان حبك بعد كل العمر ده
يطلع فاشوش
مقدرتلوش

والناى بيعلى كل ماده
والقلب يتعذب زياده
والدمعه واخده الانفراده
والكلام جواك
ولسه مقلتهوش
والناى حزين

مابين سؤالى وبين جوابه
كان فيها ايه لو قالى
انه محبنيش
او حتى خد وشه فى طريقه
مبصليش
بس السكوت فى عنيه قتلنى
مصحانيش
خلانى اغرق ولثوانى
فى بير غويط
واحس روحى بتتسحب
مش لاقيه ايد
واحس انه مش عارفنى
وان ال كان منه شايفنى
مكنش غير
عفر السنين

مابين سؤالى وبين جوابه
طبع لى بوسه ع الجبين
وقال وهو بيبتسم
بقى ده سؤال بعد السنين
ازاى اكون مبحبكيش
ونا خايف ارد
لمن الخجل
تنزل عنيكى عن عنيا
وتتكسف....متبصليش
واخسر فى عمرى نظرتين

ما بين سؤالى وبين جوابه
كات بوسه حلوه ع الجبين
والزوم مقرب مننا
وموسيقى طالعه
من لوكيشن جنبنا
فيها ناى حزيـــــــــن

[الطنطاوي الحسيني]

واحس روحى بتتسحب
مش لاقيه ايد
واحس انه مش عارفنى
وان ال كان منه شايفنى
مكنش غير
عفر السنين
/
خايف ارد
لمن الخجل
تنزل عنيكى عن عنيا
وتتكسف....متبصليش
واخسر فى عمرى نظرتين

قصيدة من الروائع فكرة وصياغة غير هنات خفيفة جدا
دمت مبدعة اختاه الفاضلة رباب جودة
الله عليك فعلا مبدعة

[محمد محمود محمد شعبان]

يبدو أن اليوم يوم المشاعر والأحاسيس الرقيقة
لقد استمتعت هنا بما خطه يراعك شاعرتنا القديرة ، ومن قبل استمعت ليوتيوب الأخ العزيز / فريد عبد العزيز ، وكان رائعا أيضا .
نصك رائع فاضلتنا ، ورغم بعض هنة كما أشار أستاذنا القدير / الطنطاوي الحسيني ، إلا أنها لم تفقد رونقها وألقها ، فاسمحي لي بتثبيتها لنغازل بها مشاعر شعرائنا ومبدعينا هنا ، علها تكون نقطة لبداية جديدة بقسمنا وإنعاشه من رقدة طويلة .

تحيتي



حمادة الشاعر
مشرف أدب العامية

[وليد عارف الرشيد]

جميلة تجلت فيها المشاعر الرقيقة والقدرة التصويرية المدهشة .. ضيعت الجرس ببعض المواقع
لكنني استمتعت كثيرا بهذا الألق
مودتي وتقديري مبدعتنا وكل عام وأنت بخير

[محسن البدراوى]

الله الله
يالها من روعه فى التصوير وحسن التوصيل
كلمات عانقة الاذهان ففاض بها الوجدان
لتدخل القلب بلا استئذان
كن ابحث الليله بمعجم الكلمات فما ارتويت ذائقتى الا ها هنا
تحيتى ايتها القديره
وبانتظار كل ما هو جديد

[آمال المصري]

مابين سؤالك وبين جوابه كانت الحكاية جميلة والصياغة متينة والحرف بديع بجرس حلو متناغم
الهاء والتاء المربوطة
وألف الوصل وهمزة القطع
بيعلا
من الخجل
دام ألقك
ومرحبا بك في واحتك
تحاياي

[ربيحة الرفاعي]

ولد وبنت صغيره
فى العدسه كانوا مركزين
شافوا انفعالك فى العنين
ونا غصب عنى مشفتهوش
صمتك حقيقى كان قاتلنى
وان حبك بعد كل العمر ده
يطلع فاشوش
مقدرتلوش

والناى بيعلى كل ماده
والقلب يتعذب زياده
والدمعه واخده الانفراده
والكلام جواك
ولسه مقلتهوش
والناى حزين



شعر تطرب له الروح وتحلو للنفس فكرته ويحمل الحرف برقة حسه
وشاعرية بيّنة أحييها بتصفيق وباقة ورد

أهلا بك في واحتك

تحاياي