ومضات

[محمود موسى]

أحيانًا تكون لديّ مقاطع شعرية لا أحب أن تزدحم بها صفحة المنتدى إن فرَّقْتُها في موضوعات مختلفة وخصوصًا أنها كثيرة ويهمني أن أطْلِعَ عليها الأصدقاء.. خصوصا أنني قرأت في قوانين المنتدى أن المسموح به رفع موضوعين في الصفحة.. لذا أستأذنُكُم في إنشاء هذه الصفحة لأقوم بنشرِ ومضاتي على مشاركات..
ولتكُن البداية مع هذا المقطع:


مسحْت بإيدي ع المصحف.. حزنت بكيت
عشـان شفت التراب غطّى مكان ما رأيت
هجـرْت الفضـل فـاستغنى الرضـا عنّي
وتعْطش روحي من قـولـة خسارة يا ريت

[آمال المصري]

ومضة بمجلد متكامل شاعرنا الرائع
نعم هناك من يتخذه قطعة من " ديكور " المنزل تزدان به الأرفف لايفكر مقتنوه في فتحه وقراءة وهو آية
دام ألقك
ومرحبا بك في واحتك
تحاياي

[آبو عمرو سليمان]

بارك الله فيك على هذه الومضة الجميلة التي تذكرنا بأعظم كتاب

[محمود موسى]

ومضة بمجلد متكامل شاعرنا الرائع
نعم هناك من يتخذه قطعة من " ديكور " المنزل تزدان به الأرفف لايفكر مقتنوه في فتحه وقراءة وهو آية
دام ألقك
ومرحبا بك في واحتك
تحاياي

أسأل الله ألاّ يحرمكِ من أنسِهِ وحُسنِ طاعته
شكرًا لك :)

[عايد راشد احمد]

السلام عليكم ورحمة الله

استاذنا الفاضل

ومضة مركزة تلفت الانتباه لكيف يحتفظ كثيرا من الناس بكتاب الله وكانه جزء من الديكور

تقبل مروري وتحيتي

[محمود موسى]

السلام عليكم ورحمة الله

استاذنا الفاضل

ومضة مركزة تلفت الانتباه لكيف يحتفظ كثيرا من الناس بكتاب الله وكانه جزء من الديكور

تقبل مروري وتحيتي

وعليكم السلام ورحمة الله وبركاته


نورت يا أستاذ عايد
شكرا لك

[محمود موسى]

بارك الله فيك على هذه الومضة الجميلة التي تذكرنا بأعظم كتاب

جزيل الشكر لك :)

[محمود موسى]

الثورة اتسرقت في ستوديو
عمّال بيلَمّع في أسامي
وكأنّك ضحّيت بحياتك
تمَن الإنتاج الإعلامي

حركات فضائية وملعوبة
مَدْهُونة حقايق مقلوبة
علشان هتزيد السّبوبة
وآديها بتاخدك ع الحامي

بقى عندك ناشط أو ناشْطة
أحْدَث وظايفنا العطْلانة
وايش تعمل يا حبيبي الماشطة
في وشوش كدّابة وواكلانا

مرحب يا مُناضل.. يا مُناضلة
أحمد أو سمسم أو چيچي
والأخ المِتْعَبّي فـ بدلة
قال لك تحليل استراتيچي

حضراتكم يا أساتذة فـ وادي
والشارع مش فاضي يبَزنِس
حتى اللي اتفَلسِف ع الشُّهَدَا
شارب م الدم وجاي يحبس

محمود موسى

[محسن البدراوى]

مسحْت بإيدي ع المصحف.. حزنت بكيت
عشـان شفت التراب غطّى مكان ما رأيت
هجـرْت الفضـل فـاستغنى الرضـا عنّي
وتعْطش روحي من قـولـة خسارة يا ريت



رائعه تلك الومضه الروحانيه التى تتباكى من قوتها القلوب
وارتعشت منها الجوارح والوجدان
دام ألقك شاعرنا
تحيتى
وبالتوفيق

[محسن البدراوى]

الثورة اتسرقت في ستوديو
عمّال بيلَمّع في أسامي
وكأنّك ضحّيت بحياتك
تمَن الإنتاج الإعلامي

حركات فضائية وملعوبة
مَدْهُونة حقايق مقلوبة
علشان هتزيد السّبوبة
وآديها بتاخدك ع الحامي

بقى عندك ناشط أو ناشْطة
أحْدَث وظايفنا العطْلانة
وايش تعمل يا حبيبي الماشطة
في وشوش كدّابة وواكلانا

مرحب يا مُناضل.. يا مُناضلة
أحمد أو سمسم أو چيچي
والأخ المِتْعَبّي فـ بدلة
قال لك تحليل استراتيچي

حضراتكم يا أساتذة فـ وادي
والشارع مش فاضي يبَزنِس
حتى اللي اتفَلسِف ع الشُّهَدَا
شارب م الدم وجاي يحبس


:nj:
نص رائع ومضه شعريه كم تحتاج لالف برواز
ياليتها تدق ابواب مدينة الانتاج ولاكنى اعلم انهم مات ما بهم من احساس
ابدعت فى صياغة النص بسلاسته وحسن انتقاء مفرداته وترتيبه
احييك لمواكبتك الرائعه للاحداث
واعلم ان النص كان يحتاج الى موضوع منفصل واعتقد انك وضعته هنا خوفاً من ان يكون لك اكثر من موضوع بالصفحه الاولى
ولاكنها التعليمات سيدى كما تعلم
اسجل اعجابى الشديد

لك جمال فى التعبير ودقه فى التفاصيل وسهوله ف التوصيل


واطلب دائما المزيد والمزيد


تحيتى شاعرنا الفاضل

وبالتوفيق
:hat::010:

[محمود موسى]

الثورة اتسرقت في ستوديو
عمّال بيلَمّع في أسامي
وكأنّك ضحّيت بحياتك
تمَن الإنتاج الإعلامي

حركات فضائية وملعوبة
مَدْهُونة حقايق مقلوبة
علشان هتزيد السّبوبة
وآديها بتاخدك ع الحامي

بقى عندك ناشط أو ناشْطة
أحْدَث وظايفنا العطْلانة
وايش تعمل يا حبيبي الماشطة
في وشوش كدّابة وواكلانا

مرحب يا مُناضل.. يا مُناضلة
أحمد أو سمسم أو چيچي
والأخ المِتْعَبّي فـ بدلة
قال لك تحليل استراتيچي

حضراتكم يا أساتذة فـ وادي
والشارع مش فاضي يبَزنِس
حتى اللي اتفَلسِف ع الشُّهَدَا
شارب م الدم وجاي يحبس


:nj:
نص رائع ومضه شعريه كم تحتاج لالف برواز
ياليتها تدق ابواب مدينة الانتاج ولاكنى اعلم انهم مات ما بهم من احساس
ابدعت فى صياغة النص بسلاسته وحسن انتقاء مفرداته وترتيبه
احييك لمواكبتك الرائعه للاحداث
واعلم ان النص كان يحتاج الى موضوع منفصل واعتقد انك وضعته هنا خوفاً من ان يكون لك اكثر من موضوع بالصفحه الاولى
ولاكنها التعليمات سيدى كما تعلم
اسجل اعجابى الشديد

لك جمال فى التعبير ودقه فى التفاصيل وسهوله ف التوصيل


واطلب دائما المزيد والمزيد


تحيتى شاعرنا الفاضل

وبالتوفيق
:hat::010:

أولا أشكرك على حسن ثنائك الجميل
ثانيا أنا فعلا حبيت أضرب عصفورين بحجر
الأول مراعاة لقوانين القسم
ثانيا حبيت اخصص الموضوع ده لكل الومضات القصيرة اللي مش بحجم القصيدة اللي تستاهل نشرها في موضوع لوحدها
دُم بخير :)

[محمود موسى]

عبدك وملك إيديك
ياللي مالكش شريك
في المُلك والكلمة
علّمت قلبي الشُّوف
والحب قبل الخوف
والصبر والهِمّة
قوّيني ع المكتوب
علمني إني أتوب
نجّيني م الغُمّة

[محسن البدراوى]

نجوم تتلألأ فى سماء الواحه
أحيك على جمال الفكره وروعة المضمون
انتظر مزيدك حتى اذا كثرة الومضات جمعناها بموضوع مستقل باذن الله
تحيتى فاضلى وبالتوفيق

[محمود موسى]

نجوم تتلألأ فى سماء الواحه
أحيك على جمال الفكره وروعة المضمون
انتظر مزيدك حتى اذا كثرة الومضات جمعناها بموضوع مستقل باذن الله
تحيتى فاضلى وبالتوفيق

بوركت أيها الجميل.. شكرًا لك

[محمود موسى]

في جلسة شعرية أردت أن أداعب الفيس بوك بعيون أصدقائي فكتبت أقول كالتالي:


البوست عند الدكَر .. مزنوق ومترَمّي
ولا حَد عدّا وشكَر .. لما اتحرق دمّي

كل الفريندز شُور
عايشينلي في الإيجنور
ولا ردّوا ع البونجور
ولا عبّروا اللي اتقال

لو مزة تاخد كوبي.. وتحطه بنت البوبي
يتقال كلام لولبي..ما اتقالش في الأمثال

عالم بتاع منظرة .. والخلق فيه عفاريت
شارب حاجات أصفرة.. محتاج "بلوك" "ديليت"

البنت لو شيّرِت .. حبّة كلام شُوربة
هتشوف ماسورة لايك .. تحت الكلام ضاربة

حطّة لنا صورة "سَمَر" .. علشان ماتشتغلك
وتسَمّي "سُوسُو القمر" .. مع إنها شبَهَك

علّق يا عم الروش.. واعمل لي واد حبّوب
أكْسبْت للأكونت.. بكرة تلاقيه مضروب

[محسن البدراوى]

في جلسة شعرية أردت أن أداعب الفيس بوك بعيون أصدقائي فكتبت أقول كالتالي:


البوست عند الدكَر .. مزنوق ومترَمّي
ولا حَد عدّا وشكَر .. لما اتحرق دمّي

كل الفريندز شُور
عايشينلي في الإيجنور
ولا ردّوا ع البونجور
ولا عبّروا اللي اتقال

لو مزة تاخد كوبي.. وتحطه بنت البوبي
يتقال كلام لولبي..ما اتقالش في الأمثال

عالم بتاع منظرة .. والخلق فيه عفاريت
شارب حاجات أصفرة.. محتاج "بلوك" "ديليت"

البنت لو شيّرِت .. حبّة كلام شُوربة
هتشوف ماسورة لايك .. تحت الكلام ضاربة

حطّة لنا صورة "سَمَر" .. علشان ماتشتغلك
وتسَمّي "سُوسُو القمر" .. مع إنها شبَهَك

علّق يا عم الروش.. واعمل لي واد حبّوب
أكْسبْت للأكونت.. بكرة تلاقيه مضروب





مداعبه رقيقه تحمل من الحقائق الكثير
اضحك الله سنك اخى الفاضل
رائعه كروعتك

[محمود موسى]

مداعبه رقيقه تحمل من الحقائق الكثير
اضحك الله سنك اخى الفاضل
رائعه كروعتك

بارك الله لك

[محمود موسى]

مربعات أهديتها إلى الشهيد -بإذن الله- محمد محرز وكل شهيد



صوتَك قُصادي وْوَرايا
حاضن لأحلام جدودنا
خارج بمبدأ و "راية"
قادرة تِدَوّب حدودنا
**
بتقول نصيبي وْقضايا
إن الطريق لسة بدري
لو حامية شمس القضايا
م المستحيل يقْسَى بدري
**
طالعة البُدُور للمداين
تكشِف وشوش اللي باعها
بكرة المدين يبقى داين
والأرض تنصر سِباعها
**
بكرة انتصارك يا خِلّي
ع النّفْس والدنيا ديّا
هلقاه بنورك داخِل لي
وَاكتب تاريخه بْإيدَيّا
**
هو انت سامع أمَلْنا
ولاّ انت مشغول بـ"حُورك"
عنّك كتير اتحكالنا
ساكنة العرايس بحورك
**
وكْفاية إن انت بادئ
خط الجهاد اللي أثبَتْ
إن انتصار المبادئ
علمْني ع الدرب أثبَت
**
بَعدك شريكة حياتك
ماشية الطريق رافعة راسها
تقرا الكرامة ف آياتك
والأ ُنس بالله حرَسْها
**
ياللي الطيابة فْـ سِماتُه
والحُسن جُوّاه ربيعي
ما انتَشْ ما بين اللي ماتوا
دانتَ اللي عايش طبيعي
**
لو يدفنوك جوّه روحي
و فـ كل لحظة أزورك
قُربك يدَوّب جروحي
وَاتْوَضّا دايمًا بنورك
**
حتى السلاح اللي تَنُّه
يرمي المهالك في دربَك
تستغفر الطلقة مِنُّه
وبتِدْعِي ع اللي غدَر بك

[محسن البدراوى]

وتتوالى الومضات مع جمال النصوص ومواكبة الاحداث
رحم الله شهيد الحريه وجميع شهدائنا
الموضوع للتثبيت لتعدد ومضاته وتكريماً لقلمك الدفاق
تحيتى شاعرنا
وبالتوفيق

[محمود موسى]

وتتوالى الومضات مع جمال النصوص ومواكبة الاحداث
رحم الله شهيد الحريه وجميع شهدائنا
الموضوع للتثبيت لتعدد ومضاته وتكريماً لقلمك الدفاق
تحيتى شاعرنا
وبالتوفيق


أكرمك الله وبارك فيك
ووفقك لكل خير :)

[محمود موسى]

التَّقوَى إيه إلا طــاعة
أو نفْس لـوّامة تنصح
مـرهونة بالإستطـاعة
وتشجّع الخُلْق إن صَح

[محمود موسى]

لما اتكِسِف من إلهي
وَاهجُر عشانه المصالح
أحسن ما دُنيا التلاهي
تكْسِفني مِن عَبْد صالح

الخوف من الربّ أوْلَى
لو كنت أعمل حسابه
يبنيلي في القلب دَولة
يحْكُمها إسمه وكِتابه

[فاتن دراوشة]

ومضة رائعة عميقة المضمون

ما أحوجنا لهذه الوقفة الصّادقة مع النّفس

دمت بودّ أخي

فاتن

[محمود موسى]

جيت أسألك.. علشان مافيش زيّك كتير
واللي هيسْمع قصّتك لازم يغير
جرّبت تتصدّق بروحك للوطن؟
جرّبت ترْكَب فوق جناح حلمك.. تطير؟
تسْبَق عشان ماتحَقّقه كل المحن
في الثورة كنت من الأوائل.. مش أخير
والكل جه بعد انتصارك قلّدك
طمعان يكون للشعب نائب.. أو وزير
وانت اللي فوق الكل سابق خطوتك
تهتف ومِن خلْفك هتاف الكون زئير
جرّبت تزرع في السحاب شجرة أمل
يبقى انت م الآخر كده.. إسلام بكير

(إهداء متواضع مني لا يليق به في يوم ميلاده.. كل سنة وانت طيب يا إسلام)

[محسن البدراوى]

الله الله تتوالى ومضاتك وكانها عقد من اللؤلؤ المنثور
تزين العاميه بهالات النور
انتظرك دائما
كن بالعلا ابدا
وبالتوفيق

[فاطمه محمد]

أبعت سلامى .. ويا كلامى

لمين يصلى ... على الحبيب

ده لو مشينا ... ف طريق خطاه

يبقى لقلوبنا ... أعظم طبيب

ده خلقه همه ... قرآن وذمه

بشتاق له ... لما

أرواحنا عنا ... ف يوم تغيب
------------------------------------
إسمح لى شاعرنا الأستاذ ..محمود مرسى بأضافه
هذه الومضه على متصفحكم ..
تقبل مرورى المتواضه

[محمود موسى]

الله الله تتوالى ومضاتك وكانها عقد من اللؤلؤ المنثور
تزين العاميه بهالات النور
انتظرك دائما
كن بالعلا ابدا
وبالتوفيق

ويتوالى ذوقك الجم
شكرا لك محسن :)

[محمود موسى]

أبعت سلامى .. ويا كلامى

لمين يصلى ... على الحبيب

ده لو مشينا ... ف طريق خطاه

يبقى لقلوبنا ... أعظم طبيب

ده خلقه همه ... قرآن وذمه

بشتاق له ... لما

أرواحنا عنا ... ف يوم تغيب
------------------------------------
إسمح لى شاعرنا الأستاذ ..محمود مرسى بأضافه
هذه الومضه على متصفحكم ..
تقبل مرورى المتواضه
مرحبًا بك في أي وقت فاطمة
أضأتِ هنا :)

[محمود موسى]

الشمس في الدور اللي تحتِك
قدّرِت بُعد المسافة وسلّمِتْ
بصْعوبة الفرصة اللي تجْمعكُم
في دايرة أصدقاء..
مِن كُتْر إحساسها بْفرُوق الضي غنّت
"عندما يأتي المساء"
فازّاي تقولي بإن ممكن أي مخلوق يفْهمك
لو مهما شاء..
أو حتى كان طالب ينول القرب منك
للأسف مايكفّيهوش أبدًا يكون
رائد فضاء !!

[محمود موسى]

وليه دايمًا دموعك زي مجرى عمره ما بيهْدا
ومِن كُتر اللي سال منها بقول ولإمتى ع الحال ده
يا إما تهَدّي أخلاقك.. يا إما ترَكّبي جلدة !

[محمود موسى]

ماتقولش للمجهول "بخاف".. وانت بْبساطة تخَوّفه
لو مهما كنت ماتعرفوش.. اصبر شوية هتعْرفه
كل اللي جايلك فاكره تاه
أو بير غويط والكون غطاه
شبّورة ف عيون الحياة
عفريت وعايز تصرفه

نضّارة سودا.. فوق عينيك.. راح يجرى إيه لو شلتها
كلمة "هنِقْدر" صعبة ليه.. مع إني قبلك قلتها
دَوّر في بكرة وْدَوّبه فـ لحظة وْكأنك عشتها
أو عيش كأن اللي ف حياتك ظرف طارق وانتهى

[محمود موسى]

احترت فيك احترت
من كُتر ما اتغيّرت
لو قلبي قال "شَتْ داون"
قلبك قوام يعترض
ويقول دا كان "ريستارت"

[سمر أحمد محمد]

رباعية جميلة جدا

وللاسف هذا حال معظم المسلمين

لايعرفون الصلاة والقران غير في رمضان فقط

سلمت يمنيك سيدي

دمت بخير وسعادة

[الطنطاوي الحسيني]

تذكرة رائعة وومضة ذكية اخي الحبيب محمود موسى
دمت بكل خير ورحمة
يا رجل الانبوطين مش بعيدة عنكم تقدر نشوفك يا كريم ونسعد بيك والله
دمت بكل خير وابداع

[محمود موسى]

رباعية جميلة جدا

وللاسف هذا حال معظم المسلمين

لايعرفون الصلاة والقران غير في رمضان فقط

سلمت يمنيك سيدي

دمت بخير وسعادة

أشكرك سمر
وسلم مرورك الكريم

[محمود موسى]

تذكرة رائعة وومضة ذكية اخي الحبيب محمود موسى
دمت بكل خير ورحمة
يا رجل الانبوطين مش بعيدة عنكم تقدر نشوفك يا كريم ونسعد بيك والله
دمت بكل خير وابداع

بارك الله لك يا أستاذنا
شرفٌ لي أن ألقاك وأنت تعلم هذا جيدًا :)

[محمود موسى]

ماتستعجلش وكْفاية ان قلبك نفسه بيلومك
عشان برنامج القسوة .. دا إعدادك وتقديمك!

[محمود موسى]

الحب ده.. إحساس فريد
قادر يوَدّيك القمر
ويصنّفك فوق البشر
ويبيعلك السكة الحديد!

[محمود موسى]

دمعك بينزل.. طب لمين؟
مين الدموع بتحِقّله؟
لو يستحق دموع في عين
أو شعرة يوم تتهزله
دا ماكانش دمع يهون عليه
أو ساب عينينا تنَزّله

[محمود موسى]

ليه بتهتم بْرضاهم عن حياتك
ليه تلوم؟
مش ضروري الكل يرضى
أو رضاهم ليك يدوم
اللي بيكَبّر عيوبك
واللي لو شافك يزُوم
واللي لو يلقاك في ضعفك
يحرجك وقت اللزوم
واللي لو تسقط في حفرة
يبقى مش عايزك تقوم
هما مش قد اهتمامك
وانت مش ناقص هموم
اللي رافضك.. تَنّه شايفك
انت كوم والدنيا كوم
لو لَقاك ع الموج بتمشي
خطوة خطوة ف كل يوم
راح يفسّرها انك انت
لسة مابْتعرف تعوم!

[محمود موسى]

الحيطة بتدَمّع شقوق
والذكرى تنحل عضمها
يترقى ويّاها الزمان
يفتل سنين من دمّها
حتى الدهان.. ويا الأوان
دبلان ما عاد بيضمّها
وكأن مهما الجلد بان
بالعجز هان..
ما يهمّها

[محمود موسى]

قالولي
حياتك بتِقْصَر وتِقْصَر
طريقك بتِمْشيه
وفي نْهايتُه ربك
فحَسّيت بخوفي..
ورعشة ظروفي
وبسأل وإمتى
هشوف روحي جنبك
بخاف من عذابك..
واخاف من ذنوبي
واشيل هَمّ لحظة ما تسأل
واجاوبك
لكن مهما خوفي..
بيرْبكْ حروفي
هعيش طول حياتي..
يا ربي بَحِبَّك

[محمود موسى]

يا رب.. اللهمَّ إنّي...
بتمنَّى ع الأيام تعينّي
وتخلّي هَمّي نصرتك..
دايم عليها بحُسن ظني..
وَافهم حقيقة دُنيتك..
مايغُرّنيش فيها التمنّي
وما اخافش بعد معيتك
من مكر إنسان ولاّ جِنّي

[محمود موسى]

إنسان بيعشق حزنه والآه مِن وَسَع
حتى امّا شاف الضحك قال
دا من الوجع!

[محمود موسى]

يا رب مش طمّاع أوي
مش كل شيء ملهوف عليه
ولا هدعي مرة ونيّتي
إلا اللي خيرك مصطفيه
هدعي وأسيبه لحكمتك
ولْفضْلك انت الحكم فيه
أصل الحياة لو إنها
كان كل شيء فيها نلاقيه
وانت اللي قايل قبلها
الدنيا دار من تبتليه
لو كان نعيمها المنتَهَى
هتكون خلقت الجنّة ليه؟

[محمود موسى]

آن الأوان ترحلي
يا دولة الفسافيس
ريّسها جه بالـ"لايك"
واستفتاءات ع الفيس
بالـ"فولو" تكسب أوي
لو جبت ناخب سيس
صوّت عليك أونلاين
و ف لحظة التهييس
حتى الوزير عينه
أدمِنْ جروب مهاويس
يمسكله "شات" حضرته
أو أي حاجة ف كيس
لا فيه مشاكل بلد
أو فقر أو توريث
رشّحلي "ميمبر" غبي
وافرض سعادته رئيس
هاشتاك لحزبك كده
يجْهز على التأسيس
خليك في وهمك كده
دي الحالة "هوبليس كيس"

[محمود موسى]

**
مُهَدَّدْ تاني بالسرقة
لأن الشهر ع الأبواب
كأن الصوم ده ترفيهي..
وتضييع وقت
وجيّ بجدْوَل الألعاب..
ومن قبل الشِّيطان ما يدُوس
قعَد ويّا التلامذة اتلمّ فطّمْهُم
وساوَى الرُّوس
ما بين الإنسي والجنّي
بتجْمعْهُم ومِن دلوقتي نِيّة وْمُخْلِصة يكونوا
علينا لصوص..
أيادِيهُم بخِفّة تشِدّ خِيط النَّظْْرة والنظرة
لا تلْحق في الكتاب تقرا
ولا ف صفْحة يكون ملموس
وتصطاد الخلاف بين أخ واخواته
وتستَنّى ؛ خناقة تهَدّي فيها نفوس
فتتفَرّج على كيد البَشَر تلْقى
كأن لا ساعة مفترَجَة
ولا إنّ البعيد محبوس
وتتمَشّى في قلب الحي تلْقى طابور
بيتحجج معالي موظف الدايرة
يقول سامحوني قال صايم
فتتعطل مصالح ناس
كأن الهم ع المِعْدة
يسيب الناس هناك قاعدة
وينْفخ ويّا كام بَصّة على الساعة
ويفْضل صومُه شمّاعة..
يحط عليها تقصيرُه
وضاع اليوم!
وتتفرج في شارع ماتْلاقيش سوّاق
بيرحم خلْق أخلاقها
تكُون في السكّة معجونة بميّة هَمّ
و ع السكّة دي مش قادرين
ولو تركب معاه تزهق
وتحرق همّها على داير البنزين
وآه لو تدْخل الأنفاق
مع المترو اللي عمره ما راق
وصورة مصغَّرة من الصدّ والإقصاء
دماغك لو سمَحْت يا ريت/
-إيديك حَبّة
- سايبهالك
ونازل قبل ما تكَمّل يا سيدي حدايق القبة
- تدايق مين؟
ولآ تِقْدر
- سيبولي الواد ده يترَبّى/
يا ستي الحَلّة بتنقّط.. هاتيها يمين!
-تنقط إيه؟ يا شيخ كُبّة!!/
يا كابتن والنبي موبايلك
كفاية الصوت هيعْييني
- صداع.. أصل العِدَدْ صيني/
سعادتك نازل الجيّة؟/
يا سِيدي الشنطة، رجْلَيّا !/
ألو.. ماما؟
خلاص فاضل محطة واكون خلاص عندك/
ينُوبك بس يابني ثواب
تقعّد ستّك الحَجّة
- خلاص قصّر . . بلاش تماحيك
- ما تتكلم عِدِل لافطر يا عم عليك!
- خلاص يا اخوانّا ماتصَلّوا على الهادي
- علِيه أفضل صلاة وسَلام/
معايا اللزق يـــــا حَضَرات
جنيه واحد وبتكلّم يا باشا بجد..
متين جدًّا
ويلزق شنطة يلزق جزمة
أقوى من الأمير وأشدّ
-كفاية يا عم صدّعنا/
سيادتك نازل الجيّة؟
- لأ اتفضّل
- بسرعة المترو راح يفْتح/
يا عم الحج ما تفتّح!/
جريدة إيه دي لو تسمح؟
- ماهيش فارقة
مادام قاتل هيتبرّأ
ومجلس منتخب يتحَل
دا بيقول لك يخَلّوا المخبرين بدْقُون
ومات الشعب من هَمُّه
-وإيه تاني؟
-وفي الدستور لقيت مادة
معاها يَجَوّزوا العيّل في بطن امه/
-ماحدّش يعْرف الساعة؟
-فاضل لك ع الفطور ساعة
-يادوبك ألحق الفوازير/
أذان/إفطار/ وأللّهمَّ لكْ صُمنا/
هاتولنا الفيلم واستنّوا
عشان بعده المسلسل جاي/
هاتولي الحِلو ويّا الشاي/
مع الفاصل نشوف حتّة
نكمّل ع المسابقة بنُصّ برنامج/
هتَابع كل دُول ازاي؟/
خلاص حمّل لي م الموقع/
بجمْلة ذنبنا المكتوب
كأني بجد مستكفِي
وم التَّقوَى اللي بتقطَّع في بعضيها
ناقصني ذنوب/
مانيش لاحق..
كمان حَمّل..
دانا مأجّز يومين مخصوص
وشايف إبداعات في الكَرْوَتَة القاضْية
على الوقت اللي مش بفلوس
وضاع الشهر بالجملة
برغم ان الشِّيطان محبوس!
برغم ان الشِّيطان محبوس!
برغم ان الشِّيطان محبوس!

[محمود موسى]

أكبر وزارة للدفاع عن مِلّتك
موقعْها قلبك.. مُهجتك
وجدارها يتمثّل يا صاحبي في امتثالك للضمير
اللي اتفَطَر فيك ع الحلال ويّا الحرام
لو طوبة تِسْقط من جدار الإلتزام
إنذار ينبّه في العقيدة يقوللها
إن اختراقك مُحتَمَل
كل امّا تِتْجاوز حدودك في الحرام
تتهد طوبة وتُنتَشَل
ولحد ما تحاول بجد تخلّي توبتك..
ويّاك تسدّ اللي اتهَدَم وتحط طوبتك..
شغّال ضمير بيحذّرَك
حاسب لَتِصْبح مختَرَق
تخسر عقيدتك أو عقيدتك هي ممكن تخْسَرَك
قد أعذر اللي أنذرَك!

[محمود موسى]

أنا تاجر دين.. وعرفت منين؟
اكمنّي ببيع الدنيا واحَوّش تمن الجنة ولو في سنين
يمكن ألحقلي ولو شبرين
هيكونوا ف قلب ميزان الآخرة دي ضِعف الدنيا كتير أنا مين
أنا تاجر دين.. أنا تاجر دين!
**
مش ذنبي بإني سبقت وقلت ان القرآن هو حاضرنا
ولا ذنبي بإن في ناس عايزاه يفضل محبوس جوه صدورنا
ولا ذنبي بإني جهرت بصوتي وقلت الراية دي منصورة
والكل فاكرني غامرت بموتي عشان أتصور كام صورة
أنا عبد فقير للي كرمني
بشريعة تطهّر وجداني
وماقلتش مرة بإني ملاك بتكلم باسم اللي هداني
ولا قلت ف مرة انا ضِلّ إله
ولا بعْت الجنة بولا مليم
أنا هدفي بكل بساطة أقول
نتمسّك يالاّ بشرع حكيم
أنا تاجر دين.. أنا تاجر دين

[محمود موسى]

**
كان وقت ضُهر، سمِعْت من بيتي الأدان..
والشمس بالحَرّ المباشر سهّمِتْ
والسّهم ضارب في الحيطان..
ماشي وْبسابق خطوتي المتأخرة
والذِّكْر دبْلان ع اللسان..
معرفش إحساس بالكسل
ولاّ الحقيقة اكمنّي من زحمة حياتي الدنيا
غِبْت عن المكان..
كالعادة بدخُل
والصفوف من حقّها تأخَّر في ترتيبي اللي دايمًا
للأسف بيقولّي جيت بعد الأوان
مالحِقْتش استحضر مع البدء "استقيموا"
و"استووا"
جيت والجميع ع الأرض ساجد مبتَهِل
قام الإمام من سَجْدته
كَبّر لركعة جديدة، سَوّيت بين كتاف الناس وكتفي
وجبت من عندي البداية:
"الله أكبر"
لسة صوت الفاتحة
بيفَكّر كياني بلذّة التوبة اللي جُوّاها اتولدْنا
من جديد
"آمين".. ومن بعد امّا مدّيت حرفها
عدّيت بقيت العشريناية الفَضّة في الكُشك البعيد
فاضل يصَوّرلي البطاقة 3 صور
وأجيب دوسيه.. واشحن رصيد
وأعدّي اشوف المكوة خلْصت ولا لأ
وأهنّي فتحي ف يوم ميلاده بعام جديد
والساعة دلـ...
"الله أكبر"
ويّا باقي الصف خاشع أنحني
وأسبح الله العظيم
لكن سؤال بيهمني
رِجْل اللي راكع جنبي فيها صباع طويل
معرفش بس ازاي بيدْخل جزمته
فعلا طويل.. طب دلّني..
ثم السؤال:
أطول جبال الأرض كان "إفرست"
ولاّ البحث ممكن يوم هيكِشف قمّة تانية هتغلبه؟
فكرك هيقدر؟
بس مش عارف هلاقي معايا فضة اتفضّلت
علشان هروح للـ...
"سمعَ اللهُ.. لمن حمده"
وقمت من الركوع..
وحمدْت علاّم الغيوب حمدًا كثيرًا طيّبًا
جايز يكون خالد هيرجع م السفر
قبل امّا شعبان ينتهي
كان قالّي في التليفون بفكّر أستلم عندي
لبعد العيد وَأجّل
قلتله: بس اتلهي
ازاي ماتحْضرش الصيام هنا وسْط أهلك؟
مين ساعتها يحس طعم اللقمة وازاي يشتهي؟
حبّة حماس وانزل عشان....
"الله أكبر"
والسجود يصنع مسافة مجَسّمة..
نقطة لقاء الأرض بالنور في السما..
ياه من شعورك وانت حاسس
كل شحنة من الهموم ومن الكَبَد
مسحوبة من جواك تدُوب
والنَّفس بالشوق مغْرمة..
تكره معاها بجد غيبتك عن بيوت الله
وتكره غفلتك كُره العَما
تِتْبرأ الأفكار من البث المباشر لو ييجيلك
والغريب انك في طول اليوم بتلقاه يختفي
وينُطّلك وقت الصلا
مع كل حمد وبسملة
أول ما بيشوفك بتستحضر إله علاّم
في ركعة تعَظّمه
فورًا يحط فـ فكرتك 100 مسألة
"الله أكبر"
عندي بكرة معاد مع السيّد حسين
"الله أكبر"
عِنْت بإدَيّا الهدوم معرفش فين
"الله أكبر"
صَفّر الباشا الحَكَم بس اصبر اصبر
لسة تحليل الهدف بين الشُّوطين
"الله أكبر"
كل ما اتلَفّت : قصيّر أو محَزّق
طب هَوَدّي عنيّا فين؟
ونهار وليل.. صُبح ومِسا
في دقيقة ألفين وَسْوَسَة
يقْلِب خيالك كام قناة
سرحان و وَيّا الهمس تلقى انك مِبَلّم..
مابيتقِِطِعْش ف ذهنك الإرسال نهائي وتِنتْتِبه..
إلا ، في لحظة بس ما يخَبّط عليك صوت الإمام
وقت امّا سَلّم..
تفتحله ودنك بانتباه
يظهر بأنك يابني خلّصت الصلاة
والله أعلم!

[محمود موسى]

ضبط وإحضار..
للروح الساكنة ف قالِب إسمه البني آدم
ضبط وإحضار
مش بردو انت اللي قبلْت العهدة اللي رفضْها الجبل الجَبّار؟
مش بردو انت اللي قبلت أمانة أبَتْها الأرض بنواحيها
و سما الأسرار؟
دلوقتي الجرد معاده أزف
من بعد المهلة وكنت بعملك متراقب
تنظيم لملايكة مع استخبار..
وفّر تبريرك أصل ده بردو مش استجواب
لا عبادة معادها ولا استغفار
يخلص تحقيقك
تبقى ف آخرة يكونلك فيها عشيرة ودار
في الجنة يا إما هتبقى ف نار

[محمود موسى]

حمرا دلوقتي الإشارة
وانت واقف من سنين
لسة بتغازل في حلمك
انت فين والحلم فين
عشت بترتّب كلامه
بس مش رابط حزامه
ليه ما بتردّش سلامه
سامعُه ولا رحت فين؟

صفرا دلوقت الإشارة
مستعدّ لفين تروح؟
لو تكون سابق بخطوة
تبقى أسرع م الطموح
خد معاك بس الخريطة
وانسى جنبك أي زيطة
قبل ما تلبس في حيطة
الوضوح.. ثُمّ الوضوح

خضرا دلوقت الإشارة
سكّتك .. مستني إيه؟
زق أفكارك ومَشّي
الطريق فارد إيديه
قد إيه السكة فاضية
رغم كل الزحمة فاضية
بس صوت جواك بيهتف
وانت بتراهن عليه

امشي، سَرّع، عَدّي ، نافس
يمنعك إيه م الوصول؟
ما انت عارف. ياما دقّت
من زمن ع الراس طبول

[محمود موسى]

الحكاية فيها جَنّة

مش مجرد صبر فِينا
أو كلام دمّع عينينا
أو من الظلم يداوينا
أو هتاف عادي ف لسانّا
الحكاية فيها جنة
**
مش مجرد كام شعار
اتكتب في الدم نار
واعتصام بين الديار
ولاّ صوت حاير ما بينّا
الحكاية فيها جنة
**
مش مجرد ناس تثور
عندها حب الظهور
ولاّ إحساس بالغرور
جوه صوت الثورة غنَّى
الحكاية فيها جنة
**
مش مجرد دم نازف
أو عدُوّ قصادنا خايف
أو نموت جنب اللي شايف
لو رفض ع الموت يعينّا
الحكاية فيها جنة

[محمود موسى]

أنا مش إخوان.. أنا مش إخوان
أنا عنصر "جاذب" للنسوان
ينتحروا قصادي وبالدَّستة
ويسُورقوا مجرد بس ما ابان
بغمز للمزة تقع دُغري
وبخش القلب بلا استئذان
خطاباتي بغمزة وتسبيلة
ولا عمري ببطّل ندغ لبان
والشهرة "نوال" وساعات "سوسن"
أو "سوزي" ويمكن بردو "حنان"
أنا حُب ومن أول نظرة
وساعات من أول نَصّ بيان !
أنا مش إخوان.. أنا مش إخوان
أنا عنصر "جاذب" للنسوان

إهداء للمتحدث الجذاب باسم العسكر!

[محمد كمال الدين]

D:
أضحك الله سنك

--

[محمد عبد القادر]

SIZE="4"]
"]
إهداء للمتحدث الجذاب باسم العسكر![/SIZE]


ههههههه
جميلة جدا يا شاعر

[محمود موسى]

شكرا للمحمَّدَيْن
منوريني والله :)

[محمود موسى]

بيقولوا، والد عسكري
سمع اللي جاي ينده عليه
جالك جواب م الريّسة !
إنذار أكيد بالفصل جاي لابنه المجند
بَصّ قال: يادي التخلف ع المسا
فقالوله شفت ابنك يا بيه؟
أسبوع بحاله يرُوح عليه
قاعد بيلعب ع الحدود
وماراحش فيه المدْرسة!

[محمود موسى]

هزاري تقيل.. ومش عارف
بتستحملني بس ازاي
وإحساسها اللي جربني
ومن كتر الزعل نسّاي
تعَوّد نفسها وتسكت
تقول طيب لكن جبار
وسبحان الله صبرها
على طبعي.. دي حاجة مرار

[محمود موسى]

حلّق عليه.. حلّق عليه
فتّاي وعامل آل نبيه
اكمنه مسنود م الحرَس
وله لَبَش يتحامى فيه
طالع بـ "دين" من عندهم
وعلى المقاس يظْهَر شارِيه
والفتوى قِنْطار من عفَن
مطَّر شَرار من حُوش عينيه
أنا بس عندي سؤال وحيد
بسأل سعادة "جمعة" بيه
لما انت يبقى اسمك "علي"
الواطي يطلع شكله إيه؟

[عبدالقادر الحسيني]

بسم الله الرحمن الرحيم

لما قريت نبضك صحيت=وانا كنــت نايـــم جوه بيـتْ
قلبي انتعش لما التقـيت=الحرف صـــــادق جوة بيتْ
واللحن صحصح مهجتي=وتركت من ساعتي ياريتْ
اسمع حااقولك كلمـــتين=خليك على نفـــس الطريق
مهما تلاقي من همــــوم=اوعى تخاف وهم الحـريق
خليك شجاع ولايوم تلين= دا الفجر أذن بالـــشروق
عبدالقادر الحسيني

[محمود موسى]

أنا مش إخواني
لكن إخواني
عايشين في جحيم

اتكاتروا عليهم
ياما ناس قبليهم
والجو قديم

اللي عرف نفسه بيكدب ليه؟
يحدف للشمس تراب.. يرميه
لكن يترَدّ ترابه عليه
مايشوفش الشمس كمان بعينيه

محناش شعبين
بطلوا تلقين
كده بزيادة

كان لينا ميدان
يجمعنا زمان
اصحوا يا سادة

سيبكم م النصر المجاني
دي سموم علشانك وعشاني
وأخوك مش من كوكب تاني
هو وإخوانه.. إخواني

[محمود موسى]

ماحدش عزمني
في وقت الهتاف ..
وكل اللي عشته
ده كان اكتشاف
ماحدش دعاني
في لحظة مخاطرة
أشوف مصر حاضرة
عشان الزفاف

ماكنتش محامي
ولا بتاع أسامي
وكل الحكاية
ماعدتش بخاف
ماحدش عزمني
في وقت الهتاف

كانت دعوة عامة
ليوم الميلاد
تقول يالاّ ودّع
سنين الحداد
يسافر ألَمْنا
ونرفع علَمنا
في كل الشوارع
لقيت احتشاد

ماحدش عزمني
أدق الطبول
في حرب المفاسد
على دُول ودُول
ما اسَلّمش نفسي
واسَلّم بلدنا
ولا لحكم عسكر
ولا للفلول

ومن غير مؤاخذة
كلامي اعتراف
ماحدش عزمني
في وقت الهتاف

[هنــا محمد]

متاخر وصولي لما جيت
قريت النهاية رجعت ابتديت
وروحت للأول تاني وبقيت
وآآه مالجمال إلّي لاقيت :)
الله بجد ومضات مفعمة بالجاذبيه
تسلم الأيادي أستاذي

[محمود موسى]

بسم الله الرحمن الرحيم

لما قريت نبضك صحيت=وانا كنــت نايـــم جوه بيـتْ
قلبي انتعش لما التقـيت=الحرف صـــــادق جوة بيتْ
واللحن صحصح مهجتي=وتركت من ساعتي ياريتْ
اسمع حااقولك كلمـــتين=خليك على نفـــس الطريق
مهما تلاقي من همــــوم=اوعى تخاف وهم الحـريق
خليك شجاع ولايوم تلين= دا الفجر أذن بالـــشروق
عبدالقادر الحسيني

حبيبي عبد القادر باشا اللي منورني دايما
مرور لا تجاريه الكلمات صديقي المبدع :)

[محمود موسى]

متاخر وصولي لما جيت
قريت النهاية رجعت ابتديت
وروحت للأول تاني وبقيت
وآآه مالجمال إلّي لاقيت :)
الله بجد ومضات مفعمة بالجاذبيه
تسلم الأيادي أستاذي







الله يحفظك يا هنا
أعجزتيني عن الرد صدقًا
شكرًا لك :)

[محمود موسى]

على كرسي الإعدام
(نفسك في إيه قبل الرحيل)
**
نفسي مخي يطير ويعمل
في السما منظر سحابة
مطّرِت ع الأرض لكن
كل مرة بتسْقي غابة
تكْبَر الأشجار ودايمًا
فيها يتدارى الديابة
ينهشوا الأحلام وغيرهم
اتشبك ياما ف خطرهم
بس في الآخر مصيرهم
يتكتب ع النار كتابة
نفسي أعرف
اللي عايشه
دهْ غضب ولا ابتلاء
نفسي أفْهم..
كان شعوري ناحية الكوكب وناسه
كان نتيجة مفهومية
ولا أعْراض للغباء
نفسي لو يسبق لعلمي
إمتى يا لسان الخلايق
مرة هتبَطّل تنقّط فوق ودان الناس رياء!
نفسي لو كانت في جوفي
ألف نفْس وألف روح
لجل تطْلع في سبيل إنسان مسالم
و ف سبيل الحلم لو قرّب
لدَفّة كل حالمنفسي أقرا الفَجر في عيون اللي بسْم الحق شاهد
والجميع يفهم بإن الرب واحد
والوطن يفرَح
ولا يتمَسّ يوم من شر حاسد
نفسي أدخل عقل ظالم
مهما كان في الظلم سنُّه
وَاقرا أقدم صفحة بانت
من كُتُب عاش فيها ظنه
لجل أفهم حاجة خلّت
مستواه في الظلم عدّا
والشيطان بيغشّ منه
نفسي لو في دقيقة واحدة
من جناب عشماوي بيه..
لجل م اسأل..
لو هموت دلوقتي حالاً
مُتّ ليه؟!

[محمود موسى]

لسانك حصان
لكنك جبان
ومركوب هتفْضل
في نفس المكان
لا حصَّلْت صيني
ولا أمريكان
ماعندكش قيمة
عشان الشتيمة
سلاحكو الوحيد
وجربتوا ثورة
وبعديها ثورة
ولسة عبيد
صاحبنا اللي عامل بُرَم في السياسة
وآخرتها يفْضل ككلب الحراسة
يعاد امتحانك
ولساك مكانك
وزاد امتهانك
وراسك مُداسة
وفاكر بإن اللي يحلم يفيدك
بيحلم غلاسة!
خد الباب في إيدك
يا مِستر مواطن
في لحظة ما تقفل وراك المطار
وماتسيبش شارع
ولا النور ده والع
ماتقلقش؛
ماشيين في نفس المسار
ومالطة اما تخرب
هتبقى انت مطرب
تسَلِّم أيادي اللي فلَّق وطار
وإيد اللي سَبَّق وهَدّ العمار..
يا أتفه ضريبة
ومشروع زريبة
يا أرخص ركوبة لأرخص ملِك
لسانك ده ولاّ يكُون زمبلك؟
عيونك دي شاشة
لتوفيق عكاشة
و راسك دي كِيس
مفَتّحها دايمًا
عشان تبقى مَلقف زبالة لميس
بَشوف اللي زيك
في قهوة .. ومترو وكمان ميكروباص
لسانك يدلدق
في زفت وبوتاس
تموتني بالضغط؛ لو كان بإيدي
راح امسك رقبتك
وَاقول القصاص!

[محمود موسى]

انت أكيد من عالم تالت
******
لو عايش دايمًا صعلوك
دايمًا بين الناس مملوك
تتظاهر بالعكس وتنكر
والناس تضحك لو يشوفوك

لو جهلك دايمًا عنوان
تتلامض وبربع لسان
فالح بس ف كل كلامك
تتسَنّد على مجد زمان

تتمحك في الجد السابع
وانت يا إبني مجرد تابع
وبترسم أساطير لصحابك
ناقصك بس تلم طوابع

وبتاع مصلحتك وغاويها
بس ياريتك فالح فيها
لو بإديا قصاد فهلوتك
كنت هسمّيك "سعد نبيهة"

أسهل حاجة تبات منصور
تصبح -بعد غباء- مكسور
تستعجل ياما خراب عشك
بعد ما طال زَنّ الدبور

لو تغضب من كلمة اتقالت
وانت يا فسل لسانك فالت
تتاخد بالصوت وتنخنخ
تبقى أكيد من عالم تالت

[محمود موسى]

مصر كام مليون قولولي
مصر كام مليون؟
افرضوا لو يوم وقِف
مليون قصاد مليون
ناس كتير بينهم تتاجر
شُوط طويل ما يبانله آخر
معركة والكل خاسر
أو جنون يسْبق جنون
انتحار الشعب عمرُه
ما اتولد منه الخلاص
واللي داق الشعب جمرُه
فوق دمانا برجْله داس
يوْرث السُّلطة بْسلاحه
لما يوْهِم باكتساحه
واختلافنا يزيد نجاحه
لو فِضِل فوق المساس
اللي خسران كل مرة
ناس بتسعى ف أكل عيش
ناس غلابة كان بقالها
100 سنة بتحلم تعيش
كل ما تشم ف نفَسْها
أو تحين لحظة خلاصها
يرجع الباشا اللي داسها
حِلْمها يصبح مافيش

[محمود موسى]

مش هأذيك..
ولا في دماغي نهائي أمد إديا عليك..
بل بالعكس
همد إديّا أطَفّي النار لو تمسك فيك..
لو فكّرت شوية هتعْرف قيمتك عندي..
أو فرحتي لو شفت أخويا ف بدلة جندي..
وامّا انا بنزل يوم أتظاهر..
كان من بين أهدافي أحَوّل بس رصاصتك
ناحية ما بيهجم أعادينا
بدل الضرب ما وَقّع إخوانك
بالظلم ف كل مدينة..
يا حبيبي وظيفتك مش إنك تقتل فينا..
حق عليك انك تحمينا..
وان مدّيت إيدك بالنار..
صدقني هنزرع أشجار..
وهنتحَصَّن من قسوة قلبك يا مجنَّد
بالأفكار..
وان جرّبت تقرب خطوة..
هنقرّب منّك أمتار
مش هأذيك وآديني نصحتك
عقلك في دماغك؟
أمْ طار؟

[محمود موسى]

محناش صحاب..
ياللي انت غاوي تحط راسك
في التراب
ياللي انت صارف من كرامتك
ع الخنوع من غير حساب..
ياللي انتماءك للبلد
والإنسانية والشرف
محض "انتساب"
محناش صحاب..
إيه اللي جاب الوحل
لحدود السحاب..
إيه اللي جاب الحُر فينا ف كلمته
للي فرَش أهله وحياته وذمّته
سجّادة للظالم
عشان مايدُوس عليها الإنقلاب
محناش صحاب!

[محمود موسى]

حضرته قاضي البلاچ
حُكمه طالع بالمايوه
غاوي يجمع في الأدلة
م البارات والراندفو
يحبسك لو كنت تهتف
قلت "يَسقُط"؟ طب هاتُوه
واللي يوم يرفعلي رابعة
بالحداشر واحبسوه
فوق قفاك يعزف سعادته
سيمفونية "لا" "سي" "دُو"
في الحاجات دي مش بيرحم
وقتها يسجن أبوه
أما لو ممسوك في غرزة
بيس يا عم و let's go
أو لقوك ويا الخلايجة
ع الطريق سكران طِينُو
يمضي ع الإفراج مغَمَّض
تَوّ ماتجيلُه الألو
يعني راجل لارچ جدا
انتو بس تفرفشوه
حتى أتعابك
هتدفع بالكتير حتة جاتوه
بس دلّعله المرافعة
حُط قَلْش و"Yes" و"No"
إوعى تتدَبّس في فُصحَى
ولاّ فاعل وارفعُوه
جبت سيرة الرفع؟
يبقى المتهم هيعَلقُوه!
شرطُه لو عايز براءة
لجْل يمضي "خَرّجُوه"
تبقى م الآخر يا صاحبي
من زباين هالة شو!

[هنــا محمد]

هههه تجنن قاضي البلاج

الـ نغم يعانق الاحرف هٌنا :)

.

[محمود موسى]

هههه تجنن قاضي البلاج

الـ نغم يعانق الاحرف هٌنا :)

.

تسلمي وتعيشي :D

[محمود موسى]

عارف الواد اللي اسمه قاضي
جه الدُستور وعمل له إيه؟
أربعتاشر بنت حبَسْهم
إعمالاً لقانون "أحّيه"!
سيسي اداله حقنة كبيرة
عارف اداله الحقنة ليه؟
علشان هو كمان "بيسَرّب"
تقريبًا من بين رجْليه
واهو من يومها مابيتشَطّر
غير على بنت ضعيفة البيه

[محمود موسى]

قد إيه الدايرة وسعِتْ .. لسة بتزيد المسافة
ناس بتزعل ع اللي ماتوا وناس بتزعل ع الزرافة
حبّة بيروحوا الحديقة وحبة بيروحوا القرافة!
القضية .. يا بهية.. إننا مالناش قضية
لو ياسين بس اللي ضايع أو يكون وَحدُه الضحية
كُنتي وحدك راح تقولي مين معايا ومين عليا
بس شُفنا ان المجازر فوق دمانا رايحة جية
والوشوش اللي اتملت بالظلم لسة هيا هيا
أبقى مقتول واللي قاتل للأسف بيجيبها فيا
أصلهم شايفينّا فيها طول حياتنا شعوب هفيّة
علّمونا ف كل عملة.. نشتم الإيد الخفية
لجل تتبعتر دمانا.. أو نسيبهالهم هدية!

[محمود موسى]

مشكلة المربعات اني لما بكتبها بالصعيدي مابضمنش لو نشرتها مكتوبة هتتقري صح ولا لأ

عموما هجتهد بالتشكيل وانتو ونصيبكم بقى:

اللي هيهتف بجَلْبَهْ
وينادي يوم بالفضيلة
يشرب من الناس مجَالبَهْ
الشعب ده مش فاضي لَهْ !

[أحمد عطا عباس]

جميل قولك وليه معنا
بكل أمانه أمتعنا
يابلبل نور الواحه
وغرد بسم أوجاعنا

[محمود موسى]

جميل قولك وليه معنا
بكل أمانه أمتعنا
يابلبل نور الواحه
وغرد بسم أوجاعنا

حبيبي جزيت كل الخير
شكرا لك :)

[محمود موسى]

يا برد يا سيّال
ريقك على شطّي
الذكريات ع البال
ويّايا هتشَتّي

[محمود موسى]

لما شفته في المُدَرّج
ولا حتى في الكافِيه
قالوا معروف بين زمايله
والتلامذة واثقة فيه

اللي شافه .. واللي عرفه
واللي يسمع مرة عنه
واللي حتى مش في سنُّه
كله بيشاور عليه
(أيوة هو ده أكيد
أيوة ده مشروع شهيد)
**
زيه زيّك في الإفادة
يعني مالهوش إيد زيادة
بس قلبه اداله قوة
مش بتركع للبيادة

بُص جنبك هتلاقيه
زي اخوك لما تناديه
بابتسامة وكلمة صافية
وانت فاكرُه ومش ناسيه
(أيوة هو ده أكيد
أيوة ده مشروع شهيد)

أصله من طين البلد دي
واتقَبّل جوه التحدي
مش هيسأل لو يغيتك
ده معايا ولاّ ضدي

حِكْمته شمس الشموس
أرقى من ضَعف النفوس
واما شاف ع البُعد جنة
احتمل ع النار يدُوس
(أيوة هو ده أكيد
أيوة ده مشروع شهيد)

[محمود موسى]

بموت فيها.. ماتحسدنيش؛
مانيش قصدي بحِبّها موت
بموت فيها.. ده صوت "واقع"
بيحكي مصير وطن مكبوت

بموت فيها حقيقي عشان
علاج ناقص.. يا إما جعان
يا إما صبحْت م الشجعان
بقُول رفضي بأعلى الصوت

[محمود موسى]

دستور "بانجو"
مش هنصوّت فيه اكمنّه
لما يكون دستور "أبو لفّة"
مانصوتش عليه .. استنوا
يبقى أكيد هنبلغ عنه!

[الطنطاوي الحسيني]

يا برد يا سيّال
ريقك على شطّي
الذكريات ع البال
ويّايا هتشَتّي

يا برد يا معدي
الجمرة هتهدي
من قلب والع دق
هيدوبك عندي

[محمد كمال الدين]

بموت فيها.. ماتحسدنيش؛
مانيش قصدي بحِبّها موت
بموت فيها.. ده صوت "واقع"
بيحكي مصير وطن مكبوت

بموت فيها حقيقي عشان
علاج ناقص.. يا إما جعان
يا إما صبحْت م الشجعان
بقُول رفضي بأعلى الصوت

الله عليك

[محمود موسى]

مات الملك.. عاش الملك
وانتِ اللي لسة بزمبلك
عدّا عليكِ ومهما عدّا
الباشا بردو استعمَلِكْ
وبتيجي من كلمةْ غزل
لو بس قال ما أجملِكْ
فورًا تطاطي وتخضعي
واتفاجئ اني بَجْهَلِكْ
مات الملك.. عاش الملك

مات الملك والشعب ثار
يهتف بإسقاط الدمار
لكن مشِيها بفهلوة
من غير ما يرسم في المسار

عاش الملك وادّا القرار
فالكل للخلف استدار
يمسح هتافه وثورته
قدّم لجَلاّده اعتذار

عاش الملك ولما عاش
قال الفرج جيّ وْماجاش
ادوله فرصة وبعدها
طلّع شعوبنا على المعاش

[محمود موسى]

مُواطن سَكّة بيطبطب على الوالي..
وقف حيران..
وقدامه سفينة نوح خيار أوَّل..
ومن غيرها خياره بإنه يستسلم
لموج عالي..
فمن ناحية..
يقول البحر مش هيطيقني
فوق سطحه..
ومن ناحية:
سفينة نوح ماتستنضفش أمثالي!

[محمود موسى]

أبله قالت لي "سيسي" الحلوة زعلت من سوسو
راح يصالحها وباسها وهي حلفت ماتبوسه
جابت الدم وعاصت إيدها وجت بشويش جنبه
مسحت دم ولادها في وشه وهتفِتْ مع شعبه؛
سيسي ضربها وأخد الحكم اللي ف إيدها وسَلَبه
لم تواضروس ويّا برادعي والأزهر عجبُه ♫

[محمود موسى]

اتأكدي.. اتأكدي
قبل الحكاية ما تبتدي
إنك صحيح بتحبي، آه بتحبي
مش بتقلدي
وانّك حقيقي مصدقة
إحساسنا ده مش بعزقة
أو شوق بيبْرَد باللُّقا
أو يهْدا لو تتعودي
اتأكدي.. اتأكدي
قبل الحكاية ما تبتدي

[محمود موسى]

لو نبقى مَلِك .. وانتو كتابة

يعني اتنين ومعانا سلاح

أرض المعركة تبقى امبابة

نبدأ موقعة التمساح

إحنا بتوع تمثال بابا عَدلي

وانتو بتوع عبد الفتّاح

واللي هيكْسب فينا الجولة

راح يبقى صديق السَّفّاح

ينفخ هوّا بقية النخبة

و"الهاتف" بسقوطنا "متاح"

إحنا يا ريس عفن السلطة

بعد ما داب في الوهم وفاح

[محمود موسى]

مُسَيّر / مخَيّر
وخاوت أبونا
وتسأل تدَوّر
في نفْس الطاحونة
وكل اللي زيك
عشان يبْطحونا
بكام فكرة بطْلِت
كده يفَسّحونا
وتحْشد في ظنّك
تحَضّر في جنّك
وعقْلك دا خلّيته بالعكس
سجنك
تحَفّز.. وتخْبز
في نفس العجينة
وبعد اما يخْلص
كلامك لنفسك
تصَدّعنا إحنا
وصوتك سرينة

فترفض تفكر..
وبتقول مسيّر!
وتكدب تزَوّر
وبتقول مسيّر
تشوف اللي من حق غيرك
تشَمّر
وبتقول مسيّر
تشوف المصايب
فتشمَتْ/تعَيّر
وبتقول مسيّر
تعربد وتسْكر
وبتقول مسيّر
وكل اللي في الكون ده لجلك
مسَخّر
وبتقول مسيّر
ووقت اختلافك مع الناس
تكَفّر
وبتقول مسيّر
وتِشرِك مع الله
عَبيدُه اللي منك
وبتقول مسيّر
وتفسد على الأرض
والغير يعَمّر
وبتقول مسيّر
تجيب لينا جنْرال
معاه حكم عسكر
وبتقول مسيّر
ومعرفش لو شفت نفسك
مخيّر
هيتبقى إيه في اختيارك
من الظلم والبطش أكتر
تعوضلي من قلبه كل اللي فاتك
في لحظةْ ما فكّرت إنك مسيّر
صدقْ كل من قال عليك يا ابن آدم
لسان جوه منظر
ماكَفّاش حياته العبث والرذيلة
دا بَعد امّا يعملها
فورًا يشيّر
ويرجع يقول لك
دا إنسان مسيّر!

[محمود موسى]

ياللي انت عشمان في حظك

ماتِغرِفوش م الجريدة

مهما الفضول استفزك

ماتسيبش راسك شريدة

صاحبك دا لو يعْلم الغيب

أو حتى كان عنده نَفحة

كان في الكنوز يابني هيغيب

مش يترمي ف عُشْر صفحة!

‫#‏مربعات_موسى‬
‫#‏فن_الواو‬

[محمود موسى]

السيسي لو يدّي ضهره

الترعة هتبات تهلل

وان جالها والحُكم مهره

الدُّود هيطْلع يحلل!

‫#‏مربعات_موسى‬
‫#‏فن_الواو‬

[محمود موسى]

الباطل اللي ف بلدْنا

كَبْريته إحنا وجازُه

بَرّرنا ليه / اتجلَدْنا

غَطّى علينا بْمَجازه


‫#‏مربعات_موسى‬
‫#‏فن_الواو‬

[محمود موسى]

إبداعنا محبوس في فكرة

بتزورنا وبشكل خاطف

لو جيت تأجّل لبكرة

هتدوب في موج العواطف

الفكرة عايزاك مصحصح

بين القلم والصحيفة

تلقطها وبشكْل أفصح

قبل امّا تصبح نحيفة


‫#‏مربعات_موسى‬
‫#‏فن_الواو‬

[محمود موسى]

يابختنا يا ابن آدم

بالمغفرة والهداية

لو جيتله آسف ونادم

العفو سِيد الهَدايا

ربّك يقول انه جايبك

للدنيا أوّاب و لايم

تغلط ويغفر عجايبك

والذِّكر خَيْر الولايم

بل إنه قالها في ثانية:

لو معصومين كل نُوبة

كان جاب بشَر حـــاجة تانية

تغلط وتستنى تُوبَة


‫#‏مربعات_موسى‬
‫#‏فن_الواو‬

[محمود موسى]

سأقضي حياتي باحثًا حولَ صورةٍ

كتَبْتُ بلا عَدٍّ لتَسْقُطَ في يدي

وتمضي حياتي لا أرى غيرَ طيفِها

وهذا سباقي منذُ أمسي إلى غدي

[محمود موسى]

ولستُ مثاليًّا فأنصَحَ صُحبتي

وليس معي توكيلُ نارٍ وجَنَّةٍ

ولكنَّ لو أنَّ الذي رُخِّصَتْ لهُ

نصيحةُ قومي يبتغي خيرَ مِنَّةٍ

تحَتَّمَ أن يبقى سليمًا منَزَّهًا

لما نَطَقت بالنُّصحِ أيُّ أكِنَّةٍ

[محمود موسى]

حياتي وموتي إتولَدوا في يوم واحد..

وناحية بعضهم ماشيين..

ببطءْ رزين..

عشان من غير كلام عارفين

طريقهم للّحقيقة منين

وخطوتهم بصوت مكتوم

بطيئة بتدفن السكة وذكراها

في يوم ورا يوم

وساعة تدُقّ

يزيد بينهم تحدي كبير

برغم ان المسار بالزَّق

مافيش فيهم واحد في سباقه يتسامح

وقلبه يرق

وفي الآخر هيجْمعهم صدام حتمي

هيقسمْني الصدام نصين

نَصيب هيطير مع سنيني

وغيره.. يتدفن في الشّق

[محمود موسى]

ابن الخليج شاف مصارْوة

جوّه اعتصام، قال شو هادا؟

قلناله دول يبقوا ثروة

سمّيها مشروع شهادة

[محمود موسى]

الفيس بوك صبَح مسودّة

بكتب فيها وبعدين ادُوق

مستوعبني الهوم وبَحَوّش

كتاباتي ولا اجدع صندوق

واللي كتبته يا صاحبي بيملا

قد العتبة وباب اللوق

تفعيلة / عامودي بعين فيها

حلمنتيشي / زجَل مدعوق

سرّي ف بير ولا حاجة بتخرج

ولا شعري الاقيه يوم مسروق

ولا واخدينه ف منتدى برة

لو واحد في بيتين مزنوق

ولا حتى بشوفه ف كذا حتى

والتوقيع "محسن" و"فاروق"

ولا قلت الله يخرب بيتكم

وعلى صحابه الفيس محروق

ولا قلت على اللي بيسرقني

انت مكانك مش هنا؛ فوق

[محمود موسى]

ياليل.. نجومك تبوسك
ما تنام عيون الجبابرة
سلّط عليهم كابوسك
دوّر عليهم بإبرة

[محمود موسى]

فاكر يا مجرم قصادك

لما اتقتل بورسعيدي

شغلتِنا باقتصادك

يوم ترْبح البورصة عيدي

#مربعات_موسى
#فن_الواو

[محمود موسى]

حطة يا بطة يا ناس منحطة

ياللي ضميركو اتباع بالحتة

واللي متابع.. يلقى توابع

أخبار كدب ف كل محطة

ركّب قرن لكل مُشاهد

أو قرنين ده لزوم الشطة

واللي مافيكو دكَر في مكانه

مكسوف أو فكّر يتغَطّى

بعد ما داب التوت في أوانه

علشان ورقة كَلِتْها العتة

وماكانش الإشكال في التوتة

بس البيه للظالم وَطّى

وامّا سألناه إيه قدراتك

علشان ما توَجّهنا يا بطة

لف كتير في خياله و دَوّر

قالّك ما كفاية الكرافتة!

[محمود موسى]

صوت الوتر من فصاحْته

ياخدك بشَرْحه وْبيانه

صاحبك سمِعْني وْنصَحته

يجْمع سطور البيانو

عزْف النغم في حْكاياته

فوق الجبل خَدْ له مِنْبَر

سَبَحت مَرّة ف ناياته

ماعرفتلوش بحر من بر

[محمود موسى]

مشْيك رزين بس لامح
فين الهدف من مصيرك
أفضل من الجري جامح
من غير ماتختار مسِيرك

[محمود موسى]

التحرش آفة نِتنة

ياما عِدْت وياما قلت

يعني تجريم التحرش

فهمُه مش محتاج لخلْط

قلتلَك شيء مش مبَرَّر

حتى لو كات ماشية ملط

وان مسكتم كلب واحد

واتعمل من أمه عبرة

حطيتوه في مْيدان قصادنا

فوق خازوق أو حتى إبرة

يرتدع كل اللي زيه

مهما كانوا كتير جبابرة

**

بالمناسبة ..

عندي تعليق لو هتسمح

من سكات

زي ما اللبس اللي عَرّى

مش مبرر للي فات

بردو تجريم التحرش

مش مبرر للبنات

إنهم يتعروا عادي

في الشوارع والحارات

بس من قبل امّا الومهم

لُمْت شعب الإيحاءات

اللي رخّص أختي واختك

ع الـ"بانر" والإعلانات

عوّد الناس المريضة

لو يشوفها يقول آهات

تبقى عامل جذب أرخص

لجْل بيع حبة فُتات

يعني لو ورنيش لشركة

أعلنتله القنوات

إيه علاقة واحدة قالعة

في الدعاية و خُد وهات؟

يعني أشياءك متاحة

من خلال الممنوعات؟!

هو ده المشكل يا صاحبي

إحنا مش حبّة آلات!

[محمود موسى]

فيفي حاجة حلوة.. حاجة حلوة مِنّا

حاجة بتخليك تكره حياتك سنة سنة

فيفي مش ولية.. دي أم مثالية

يعني تحت رجليها العفيفة تلْقى جنة!

[محمود موسى]

ومن يوم الفريق ما مسكها واتمنوله طولْة العُمر
ومن يوما مـــا طلب تفويض من الغوغاء وسمّاه "أمر"
وهو شايفنا بالنسبة له صورة من الهنود الحُمر!

[محمود موسى]

تعرف مِنّي..

أحسن حد ما ييجي يقول لك..

الموضوع ان انا مش ممكن

لحظة أمَلّك..

ويكون في المعلوم لو فاهم

أنا إحساسي اللي هيفْضل لك..

هتشوفه ف أحلامك.. ضِلّك..

وان تُهت ف أشتات الدنيا

قلبي يدّلّك..

ورضاك اللي هيحضن فكري..

هيأكدلي الروعة اللي بتتمدّ

وتملا كيانك/كُلّك

يعني افهمني يا ريت أحسن لك

تعرف منّي

أحسن حد ما ييجي يقول لك

[محمود موسى]

لو ألْف واحد

قالوا ع الموز يوستفندي

هيفضل اللي قصادي موز

لو 5 مليون أكدوا :

المغرب ادّن قبل واحدة الضهر

وسط القاهرة

هصرخ: أساسًا لا يجُوز

لو جاني 100 مليون

وقالوا الجيش بيحكم عندنا "بالقسط"

أو قايم بثورة لشعبنا

فكأنهم بيقولوا 100 مليون

هيقدروا يستحموا ف قلب كُوز !

[محمود موسى]

يا طيور السيسي

ياللي مراقبينّي

طُزّ ف جواسيسي

دايمًا كارهينّي

حياة "القَصْر" أغبى حياة

ومهما تشدُّه أو تحلَوّ

هشوف ثوار بلدْنا وراه

يخلّوا نهايتُه أصلاً سَوّ

يا طيور السيسي

ياللي مراقبينّي!

[محمود موسى]

#على_هامش_التحرش

أنا المحسوبة ع الدنيا

في أذهانكم كيان معدوم

في لحظة محنتي أصرخ

فتقتلني الشوارع لُوم

ويجرحني اغتصاب الهم لجفوني بْـ

قلق معلوم

ومش مسموح كمان أشرح

آلامي ولو بصوت مكتوم

كأني أجيرة في العالم

وأمثالكم صحاب الملك

وواجب لما اكون ماشية

أكون شايكة مْحاوطني السلك

**

ومش مسموحلي أتساوى

بخطوتكم وادوس على بر

ولو فكّرت يوم أخرج

ياريت شَبَح المرو في السر

أقول مش برده إنسانة؟

يقولوا يا بنتي بعد الشر!

ومن نخوتكو

فاكرين ان وحدي بصَمْتكم

بَنْضَرّ

وأشْجعكم بتتلخص شجاعته

وقت ما بيْفِر

وبيحلل حرام النظرة

واللمسة فْ زحام الحَر

ومن لذة عمى الأبصار

تزيد طعنات في خيط بيكُر

عشان مكتوب على عنيكو

تكون آخر حروف الجر

[محمود موسى]

أنا مش هحلف.. لكن أُقسِم

إن السيسي بيعرف يرسم

رسَم الدور على ناس تعبانة

قال لهم ان الشعب اتقسّم

وان لحامه ف إيده لوحده

وانه بنَفسه هيقدر يحسم

ماحسمش الا قرار ترشيحه

بخطاب طالع فيه يتبَسِّم

والفاهم من سَنَتين فاهم

والطور في البرسيم بيبَرْسِم

[محمود موسى]

بطلوا ده واسمعوا ده

ياما لسة نشوف وياما

المشير يا وقعة سودا

فوضوه باسْم الزعامة

وانبطح شعب المهاودة

قال له في إيديك القوامة

بكرة هيشوفوا المفاجأة

كهربا وبنزين /رخامة

اللي سارقاهم خيبتهم

مش هتنفعهم ملامة

واللي صدّعنا بمؤامرة

بكرة هيبوس إيد أوباما !

[محمود موسى]

أذاكر؟ أذاكر واسيبك لمين

يادوب لسة داخل برجْلي اليمين

ومالحقْتش اقعد غير اربع سنين

أسيبك لمين
**
ومين راح يدبلر يا وحش الوحوش

بَصوّر ملازم وابيعها لْجيوش

وحتى المدرج ما قرّبتلوش

وكل اللي من دُفعتي ما اعرفوش

#مذكرات_طالب_مدبلر

[الطنطاوي الحسيني]

فكأنهم بيقولوا 100 مليون

هيقدروا يستحموا ف قلب كُوز !

هذه بصراحة معلقة وحدها رغم قصرها
وياطيور السيسي رائعة والله
ماشاء الله لي فترة لم ادخل لارى الجمال
جعل الله كل حرف تنافح به عن الحق في ميزان حسناتك يا بطل يا مبدع
صح لسانك
ولا فض فوك
امطرهم و الحق معك
دمت مبدعا رائعا اخي محمود موسى

[محمود موسى]

فكأنهم بيقولوا 100 مليون

هيقدروا يستحموا ف قلب كُوز !

هذه بصراحة معلقة وحدها رغم قصرها
وياطيور السيسي رائعة والله
ماشاء الله لي فترة لم ادخل لارى الجمال
جعل الله كل حرف تنافح به عن الحق في ميزان حسناتك يا بطل يا مبدع
صح لسانك
ولا فض فوك
امطرهم و الحق معك
دمت مبدعا رائعا اخي محمود موسى

بوركت يا شاعرنا
ومنورني دايما :)

[محمود موسى]

الثورة أسوأ شيء في الكون

جه فجأة جه طلّع عينّا

كان الوطن بالخير مسكون

كات مصر بتساوي ڨيينّا

من غير لا ڨيرس أو سرطان

أو حلم تايه في عيونّا

ومرور تمام وجنيه مصري

بيناطح النجمة قبالنا

حتى الشوارع والأقسام

كات يابني حتة من الجنة

لا شُرطة تبدع في التعذيب

أو حتى ريّس بيخونّا

كان بيراعينا لدرجة إيه

نعمل خطابه يا ناس رنة!

[محمود موسى]

نجمة جيش نجمة وْتمرّد

بَعدهم شِبّاك و دُوس

ثُمّ إعلامك وسَسْتِم

رُشّ لك حبة فلوس

ثم خُطبة وابتسامة

بعدها اُحضن وبوس

ثم رَشّحْتُكَ نَفسي

واحنا إيه؟ حَبة مَجُوس

عند ضرب النار هنسجد

ناس تموت زي النموس

واوعى حد يصَحّي فينا

مهما شَيّبنا الكابوس

اعدم انت .. دول خوارج

دمهم للبيه غموس

مدْفعك في الناس وخَلّص

إحنا بنهدي النفوس!

[محمود موسى]

حاول بس معايا تفكّر..

هنسمي الصخرة اللي هتنزل

فوق راس الشخص اللي هناك

بـ"القدَر الأصغر"..

ونسمي اللي هيحْصل له

بـ"القدَر الأكبر"

يبقى المعروف ان الشخص ده

لو بادر بدعاؤه وكَبّر

يبقى أكيد مكتوب له هناك في القدر الأكبر

إنه هيدْعي

فتخيب الصخرة وتتدَمّر

أما ان خاب في دعاؤه وقصّر..

يبقى المكتوب انه هيهمل

في دعاؤه وهيموت متكسّر

والمكتوب معناه مش إن الرب

أراد لفلان الويل والسكة الأخطر

ربك لما بيكتب حاجة

يبقى لأنه بْسابق علمه رآها وفَسّر

والدعوة اللي بتخرج منك

زي الترس ف آلة كبيرة تدُور وتقَدّر

قادرة تحوش أتخنها مصيبة

حتى ان كانت حُكم العسكر!

[ناديه محمد الجابي]

أحيانًا تكون لديّ مقاطع شعرية لا أحب أن تزدحم بها صفحة المنتدى إن فرَّقْتُها في موضوعات مختلفة وخصوصًا أنها كثيرة ويهمني أن أطْلِعَ عليها الأصدقاء.. خصوصا أنني قرأت في قوانين المنتدى أن المسموح به رفع موضوعين في الصفحة.. لذا أستأذنُكُم في إنشاء هذه الصفحة لأقوم بنشرِ ومضاتي على مشاركات..
ولتكُن البداية مع هذا المقطع:


مسحْت بإيدي ع المصحف.. حزنت بكيت
عشـان شفت التراب غطّى مكان ما رأيت
هجـرْت الفضـل فـاستغنى الرضـا عنّي
وتعْطش روحي من قـولـة خسارة يا ريت





ومضة رائعة معبرة بيراع لامع
اللهم اجعل القرآن ربيع قلوبنا
بوركت ـ ولك تحياتي.
:tree::tree:

[أسيل أحمد]

أحيانًا تكون لديّ مقاطع شعرية لا أحب أن تزدحم بها صفحة المنتدى إن فرَّقْتُها في موضوعات مختلفة وخصوصًا أنها كثيرة ويهمني أن أطْلِعَ عليها الأصدقاء.. خصوصا أنني قرأت في قوانين المنتدى أن المسموح به رفع موضوعين في الصفحة.. لذا أستأذنُكُم في إنشاء هذه الصفحة لأقوم بنشرِ ومضاتي على مشاركات..
ولتكُن البداية مع هذا المقطع:


مسحْت بإيدي ع المصحف.. حزنت بكيت
عشـان شفت التراب غطّى مكان ما رأيت
هجـرْت الفضـل فـاستغنى الرضـا عنّي
وتعْطش روحي من قـولـة خسارة يا ريت



قال صل الله عليه وسلم: (مثل المؤمن الذي يقرأ القرآن مثل الأترُجَّة،
ريحها طيب وطعمها طيب ) ... المهم ألا نهجر قراءة القرآن .
ومضة من ألق وحرف من بهاء.