أحمد البرعي
18-01-2013, 07:39 PM
قصيدة : هِيَّـا هِيَّـا
/ إهداءٌ إلى روح الطبيبِ الشاعر
/ صالح محمد صالح، رحمه الله
________________
إيّاكْ تكون مليان .. وجع
مليان فراق ..
مليان بشوق للفلاحين!
الشوارع .. هِيّا هِيّا
"حِتّه ميّة ، وحِتّه عكّة ، وحِتّة طينْ"
إيَّاكْ تكون
قبطان .. لمركب من ورق
والموج .. كلامْ
عَمَّال بتزرع ف السفينة
حلم أخضر .. مروي بالاه والعرقْ
حَصَد الفُؤاد .. حِملين ألمْ
حِملين .. شَقَا
حِملين حُطَامْ
قُبطَان بيصْرُخْ في السَّفِينة
والسَّلاسِل .. هَمِّ مَعجون بالبُكَا
مش هو دا اللي حلمت لحظة
بإنه هايكون الوطن
حَبِّة خَشَب مِتْكَسَّرين
مِتدغْدَغينْ..
والموج .. كَفَنْ!
مِش قَادِر أنكِر
إني قُلتْ ف لحَظة "كانْ .. ولا يا ماكانْ"
ولا "حَملْ كَاذِب"
دمعة ف عيونِ الزَّمانْ
مِشْ قَادر أنكر "يامُ هاني"
حِلمك المحفور بخبطة إيد بتُصرُخْ ع الببانْ
مِشْ قَادِر أنكر ..
إني قُلت ف لحظَة "كانْ .. ولا يا ماكانْ"
أنا كُنت خايف
إني اشوف دمعِة صَبيَّة
بتتشنق على خَدِّ مرمر
يتخَطَف مِنّه الشبابْ
أنا كُنتْ خايف ياوَطَنْ ، لو قلت ازورَكْ
ألقا شعري دَمْعَة
مليانة بعتابْ
وانا كنت فاكر إنه شَمْعَة منورة
مليون كتابْ
يصبح صباحِكْ يابلد
ألقا الكلام ..
سُكَّـــر .. ودابْ !
أنا كُنت باحلم بالندى
يغسل دموع الفلاحين
أنا كُنت باحلم بالنسيم طلِّة شِفا
هَبِّتْ تَداوي الشقيانين
"انا كنت صانع في الشفايف
لابتسام"
إزاي تموت الضحكة
في عيون السنين!
عشرين سنة مرِّتْ ولسة،
جي تقولي:
"حتة مية ، وحِتَّة عَكَّة ، وحِتَّة طين"؟
عارفك بتحزَنْ لمَّا تشتاق للندى
عارفكْ نسيمْ
عارفَكْ مطَرْ
عارفَكْ مشاعرْ مُرهفة،
وقصيدة دايبة ف ليل معاند خطوتك
والكِلْمة بتنقَطْ سَهَرْ
إزاي اقولكْ واجْرَحَكْ
واكشف لقلبك سر يمكن يدبحكْ
هوَّ انْتَ ناقص لِسَّة موتْ!
دا سنين عذاب مرِّتْ علينا
مشبِّـكَة ف قلوب بتعشق ضحكتك
بيت عنكبوت!
إزاي أقولك واجرحكْ
وازاي أخبِّي عنِ اللي علمنا الشجاعة
وطخ جوانا السكوتْ!
مِنْ يوم رَحِيلك والسما فوق البلد
طرحِةْ سَوَادْ
ومْدَمَّعَة لاجل المَقَامْ
أصل اللي راحْ مش أي اه حَرَقِتْ قُلوبنا
ف ليلة عدِّتْ والسلام!
هاستَسْمَحَكْ ..
ياحِلمْ ياخضر ..
مُتّ ف عيونِ الورقْ
بس انت حيّ ف كل فرحة بتتولد
إياك تكون زعلان لأني بحذَّركْ
شُوق الحَنِينْ
واللهِ لسَّة ..
هِيَّـا هِيَّـا
"حِتَّه مَيّة ، وحِتَّه عكّة ، وحِتَّة طِينْ"
ــــــــــــــ
أحمد البرعي
تنوية:
مابين علامتي التنصيص هي من كلمات الدكتور صالح رحمه الله
/ إهداءٌ إلى روح الطبيبِ الشاعر
/ صالح محمد صالح، رحمه الله
________________
إيّاكْ تكون مليان .. وجع
مليان فراق ..
مليان بشوق للفلاحين!
الشوارع .. هِيّا هِيّا
"حِتّه ميّة ، وحِتّه عكّة ، وحِتّة طينْ"
إيَّاكْ تكون
قبطان .. لمركب من ورق
والموج .. كلامْ
عَمَّال بتزرع ف السفينة
حلم أخضر .. مروي بالاه والعرقْ
حَصَد الفُؤاد .. حِملين ألمْ
حِملين .. شَقَا
حِملين حُطَامْ
قُبطَان بيصْرُخْ في السَّفِينة
والسَّلاسِل .. هَمِّ مَعجون بالبُكَا
مش هو دا اللي حلمت لحظة
بإنه هايكون الوطن
حَبِّة خَشَب مِتْكَسَّرين
مِتدغْدَغينْ..
والموج .. كَفَنْ!
مِش قَادِر أنكِر
إني قُلتْ ف لحَظة "كانْ .. ولا يا ماكانْ"
ولا "حَملْ كَاذِب"
دمعة ف عيونِ الزَّمانْ
مِشْ قَادر أنكر "يامُ هاني"
حِلمك المحفور بخبطة إيد بتُصرُخْ ع الببانْ
مِشْ قَادِر أنكر ..
إني قُلت ف لحظَة "كانْ .. ولا يا ماكانْ"
أنا كُنت خايف
إني اشوف دمعِة صَبيَّة
بتتشنق على خَدِّ مرمر
يتخَطَف مِنّه الشبابْ
أنا كُنتْ خايف ياوَطَنْ ، لو قلت ازورَكْ
ألقا شعري دَمْعَة
مليانة بعتابْ
وانا كنت فاكر إنه شَمْعَة منورة
مليون كتابْ
يصبح صباحِكْ يابلد
ألقا الكلام ..
سُكَّـــر .. ودابْ !
أنا كُنت باحلم بالندى
يغسل دموع الفلاحين
أنا كُنت باحلم بالنسيم طلِّة شِفا
هَبِّتْ تَداوي الشقيانين
"انا كنت صانع في الشفايف
لابتسام"
إزاي تموت الضحكة
في عيون السنين!
عشرين سنة مرِّتْ ولسة،
جي تقولي:
"حتة مية ، وحِتَّة عَكَّة ، وحِتَّة طين"؟
عارفك بتحزَنْ لمَّا تشتاق للندى
عارفكْ نسيمْ
عارفَكْ مطَرْ
عارفَكْ مشاعرْ مُرهفة،
وقصيدة دايبة ف ليل معاند خطوتك
والكِلْمة بتنقَطْ سَهَرْ
إزاي اقولكْ واجْرَحَكْ
واكشف لقلبك سر يمكن يدبحكْ
هوَّ انْتَ ناقص لِسَّة موتْ!
دا سنين عذاب مرِّتْ علينا
مشبِّـكَة ف قلوب بتعشق ضحكتك
بيت عنكبوت!
إزاي أقولك واجرحكْ
وازاي أخبِّي عنِ اللي علمنا الشجاعة
وطخ جوانا السكوتْ!
مِنْ يوم رَحِيلك والسما فوق البلد
طرحِةْ سَوَادْ
ومْدَمَّعَة لاجل المَقَامْ
أصل اللي راحْ مش أي اه حَرَقِتْ قُلوبنا
ف ليلة عدِّتْ والسلام!
هاستَسْمَحَكْ ..
ياحِلمْ ياخضر ..
مُتّ ف عيونِ الورقْ
بس انت حيّ ف كل فرحة بتتولد
إياك تكون زعلان لأني بحذَّركْ
شُوق الحَنِينْ
واللهِ لسَّة ..
هِيَّـا هِيَّـا
"حِتَّه مَيّة ، وحِتَّه عكّة ، وحِتَّة طِينْ"
ــــــــــــــ
أحمد البرعي
تنوية:
مابين علامتي التنصيص هي من كلمات الدكتور صالح رحمه الله