عاللّومة _ زجليّات بنبضٍ فلسطينيّ

[فاتن دراوشة]

كتب أخي الشّاعر المبدع عبد الكريم شكوكاني قصيدة زجليّة بعنوان " عاللّومة"

قال فيها:


عاللومة اللومة اللومة
ويا حلوة ويا مهضومة
ويا محلا الخصر المايل
وعيونك هالنجوما

بكرة باعت مكتوبي
لعيتا وللجنوبِ
ولكفرا ولعيناتا
ولصيدا ولسيروبِ
ونتفرج عسمانا
وعطيارة أيوبِ

نتلائى تحت التوته
يا حلوة في بيروتِ
ونوكل خبزة ملتوته
بزيت وزعتر مغتوته






فكانت بيننا الحواريّة التّالية:

[فاتن دراوشة]

عاللومَة وكِحل عيونِك

جنّن قلبي المهموما

ويا حلوة لَجلِ عيونِك

لانسى طعمِة هالنّوما

ولاقطع لَجلِك براري

وِاجي صوبِك مّغروما

[فاتن دراوشة]

عاللوما وسحر خدودك
الحقتك للكروما

ويا حلوة فوق زنودك
تحلى لعيوني النوما

وأنا دخيل عيونك
بفتح حرب مع روما

[فاتن دراوشة]

عاللّومَة وْهَجَّرُونِي

مِنْ بِيتِي وْشَرَّدُونِي

وِصْحِيتِ لْقِيتِ العَتْمِهْ

في صُبحي ما بِتقومي

أتَريهُم سَرَقو شَمسي

وضَوّي مْخَبّا بِهْدوما

تَرَكو صُبحي عَمْ يِبْكي

وْقَلْبو مْعَبّا بِهْموما

[فاتن دراوشة]

عاللومة وعلى الخيمة ي
نهبوا حتى الهدوم ي
لكنيسة ولكروم ي
وعملوا الجامع هوب هوبا

يا فاتن شي ببكي
شلة والأصل تركي
خلوا العرب دُربكِّه ي
من جدة حتى جوبا

بالمدفع والبارودة ي
نهزم جيش اليهود ي
ونرجع لأرض جدودي
قدر وصاير مكتوبا

[فاتن دراوشة]

عاللّومة وْكِبرو وْلادي

وْعَلَّمْتُنْ فَنِّ العوما

إنّو فْلِسْطينِ بْلادي

وانّو الغازي مَذموما

وانّو احنا النِغرِسْ زَعْتَرْ

ويديهُن تِغْرِسْ خَنْجَرْ

زيتونِ بْلادي الأخْضَرْ

يُحْرُسْ أرضي وِيْزَهِّرْ

وْهُمّي يِتْخَبّو بْعَسْكَرْ

وِسْلاكِ الشّوكِ تْحوما

أرْضَكْ يَبْني خَلّيها

بالبَرْد تْلَحّفْ بيها

وإن جار العادي وْطَخّكْ

خَلّي دَمّك يِسْقيها

خَلّيها تْلِمِّ عْظامَكْ

وادْفِنْ فيها لِهموما

[فاتن دراوشة]

عاللومة ويا صيادة ي
بيافا تحلى العبادة ي
ونحررأرض بلادي
من صهيون الملعونا

بكرة جايين بلادي
نحمل روح الشهادة ي
ولجلها والله نفادي
هادي الجنة الحنونا

من غزة احنا جايين
نرد كلاب الصهايين
عن حيفا وعكا وسخنين
دمي بيرخص لعيونا

[فاتن دراوشة]

عاللّومَة وْبِكْيِتْ قُدسي

وِدْموعَا طَفِّت شَمسي

عَسْوارا جْنُودُن تِرسي

تِحْمي ظْهورا بالتِّرسِ

وِصْدورِ وْرودي تْعَرِّت

بِرْصاصُن يِقْطِفوها

أحبارُن جَنْبِ الحايِط

تِرسِم ليهُم خَرايِطْ

روسُن تِتْلَوّى بمَكرا

وِذْنابُن تَحتو تْلابِطْ

أنفاقُن فَتْحِتْ تِمَا

تَتْلوكِ الأرضِ تْلِمّا

بسّ الجبّار الواحِد

يِحمي بيتُو وِيْصونا

[فاتن دراوشة]

عاللومة وبنت بلادي
تعبس بوجه العادي
ولما الواجب بينادي
بتنادي يا فلسطينا

هادي الكروم كرومي
الي الزيتون الرومي
لما بشق هدومي
ناري بتحرق هالكونا

ما بنساها نابلسي
الكنافة بليلة عرسي
جبل عيبال وأُنسي
جرزيم ابيض اللونا


يلا بينا عالدبكة ي=رقص وموال وشبْكة ي
والفاتن لما بتحكي=عود ونغمة حنونا

[فاتن دراوشة]

ملاحظة: اللّون الأزرق لأخي عبد الكريم

واللّون البنفسجي لي

وللموضوع تتمّة

مودّتي

فاتن

[فاتن دراوشة]

عاللّومَة وْحَطّو الحاجِزْ

يِقْسِمْ بالطُّوبِ بْلادِي

فَصَلو شَعْبي عِنْ بَعْضو

وحَرَقو قَلبي هالعاجِز

أسْمَع صَرْخاتِ العَمّة

وما أقْدِرْ أعْبُرْ يَمّا

قَلْبي بَحْضانو يْضُمّا

بَسْ عْروقو مَكْلومه

[فاتن دراوشة]

عاللومة وسحر الكلمة ي
أصحى في عز الحلمِ
لبلادي انتي نجمة ي
يا فاتن يا مزيونا

أنا دخيل اللمة ي
ببلادي عند العمة ي
ويا فاتن لا تهتمي
لحيفا احنا راجعينا

يا فاتن يا حنونة ي
انتي والله بتموني
دمي فداكي يهوني
وروحي لفلسطينا

[فاتن دراوشة]

عاللّومَه وْسَرَقو الجامِعْ

وْمَنَعو هالنّاسِ تْصَلّي

جُوّاتو حَطّو خْمورُن

وِصْدورِ العالَمْ تِغلي

قالوا اللّي يْأّذّن يِغْرَمْ

واليُسْجُدْ أكْبَرْ مُجْرِمْ

وِحْبارُن ليها الجَنِّه

وِشْيوخي بْنارِ جْهَنّم

يا رَبِّ الكونِ انْصُرنا

واجلي عَنّا لِهْموما

[فاتن دراوشة]

عاللومة وارض بلادي=يعبث فيها المعادي
هدموا دور العبادة ي=خليها على اللومة

باعوا الجامع برخيص ي=وحدا هدّوا الكنيسة ي
هادا فعل الخسيس ي=خليها على اللومة

فدائي بنورو يضوي=والمدفع عمّا يدوي
يجعل صهيوني حدوة ي=خليها على اللومة



من فاتن تحلى الكلمة ي=عزة وكرامة وحكمة ي
مشهورة بوسط الزحمة ي=خليها على اللومة

[فاتن دراوشة]

عَاللّومّة وْبَحَشو أرْضي

وْدَفَنو كِدْبُنْ بِهْدوما

تَنّو التّاريخ يْصَدِّقْ

وِيْبادِلْهُم لِهْموما

بسِّ الأرْضِ إلتِعْرِفْهُمْ

لَفْظِتْ كِدْبُنْ كَشْفَتْهُمْ

وْقالِتْ يَلّي بِتْصَوِّرْ

إوْعَكْ يومِ تْصَدِّقْهُمْ

أرْضِ فْلِسْطينِ لْشَعبا

دَمُّنْ خَضَّبْلا تُربا

عَرَقُنْ ريحو عَشْفافا

ميراثُنْ طِفْلِ بْرَحما

يا شَعْبِ العالَمْ إصحا

واوعَكْ تِزويرُن إوعا

صَبّاري إلفوقي بْيِشْهَدْ

إنّو خْبارُن مَوْهومَهْ

[فاتن دراوشة]

عاللومة ويا لوّامي
نبشوا حتى العضامِ ي
قبر جدي وعمامي
خليها على اللومة

يا حكام الرجعية ي
سرقوا بيري والميه ي
وعدادن عالحنفية ي
خليها على اللومة

يا عربي سدّوا نَفَسي
حتى بليلة عرسي
شكلن جابلنا النحس ي
خليها على اللومة


يا فاتن بنت بلادي=ما بنرضا بالجلاد ي
احنا رجال الشهادة ي=خليها على اللومة

[فاتن دراوشة]

عاللّومة وْفاتِتْ مَرّة

لي أقْصانا هالبومَة

تِتْبَخْتَر جَنبِ الصّخرَة

وبالسّوق تبثّ سْموما

ثارت شَباب بْلادي

واغتمّ الطّيرِ الشّادي

وِجْنون النّاس تْحَوّل

نار بْصَدْرا وِهْدوما

نَتَفو ريشا لَلْبومِه

وْخَلّوها تْتوبِ تحوما

مهما تِكْبَر يالعادي

قُدسي لَوْلادا دوما

[فاتن دراوشة]

عاللومة وما حلى القبة ي
مسجد الصخرة حبي
يا فاتن انتي شبّة ي
تشفي جروح المكلوما

صهيوني متل غراب ي
ينعق وسط الخراب ي
بكرة مرِّ الشراب ي
اسقيه ابن الملعونا

يحلى ببلادي السامر
في مرجك يابن عامر
فاتن بصدرا عامر
حبك يا فلسطينا

[فاطمه محمد]

يسعدنى أيتها الشاعره إبنة الأرض الصابره
أن يكون لى شرف المرور الأول على رائعتك
أستاذه فاتن لقد وضعتينى فى حيره ولا اعرف على ماذا أعلق
على جمال النص وتسلسل الفكره أم الثراء الذى تحتويه الأبيات
التى شملت كل معاناة شعبنا الشقيق الصامد فى فلسطين
وإسمحى لى أن أشارك ببعضا من خربشاتى المتواضعه تحيه لأم الأبطال

فلسطين يا حره ... برغم القيود

صلابة ولادك ... تفوق الحدود

وحجره ف إيدهم ... هدت سدود

شجاعه ... وشاهد عليها الزمان

يا صابره ده جرحك ... ف القلب شق

بقوة جهادك ... ميضعش حق

هيعلى آدانك ... ناقوسك يدق

على كل ظالم ... يدور الزمان

فلسطين يا غاليه ... يا أم الشهيد

يا مسرى محمد ... ودم الوريد

شجرة زتونك ... هتطرح جديد

غصونها تضلل عليكى ... بآمان
---------------------------------------

[فاتن دراوشة]

يسعدنى أيتها الشاعره إبنة الأرض الصابره
أن يكون لى شرف المرور الأول على رائعتك
أستاذه فاتن لقد وضعتينى فى حيره ولا اعرف على ماذا أعلق
على جمال النص وتسلسل الفكره أم الثراء الذى تحتويه الأبيات
التى شملت كل معاناة شعبنا الشقيق الصامد فى فلسطين
وإسمحى لى أن أشارك ببعضا من خربشاتى المتواضعه تحيه لأم الأبطال

فلسطين يا حره ... برغم القيود

صلابة ولادك ... تفوق الحدود

وحجره ف إيدهم ... هدت سدود

شجاعه ... وشاهد عليها الزمان

يا صابره ده جرحك ... ف القلب شق

بقوة جهادك ... ميضعش حق

هيعلى آدانك ... ناقوسك يدق

على كل ظالم ... يدور الزمان

فلسطين يا غاليه ... يا أم الشهيد

يا مسرى محمد ... ودم الوريد

شجرة زتونك ... هتطرح جديد

غصونها تضلل عليكى ... بآمان
---------------------------------------

تبتهج صفحاتي بزيارتك ومشاركتك الرّائعة غاليتي

هديّة ولا أغلى للحبيبة فلسطين من قلب يعبق بمحبّتها

فألف شكر لقلبك البهيّ عزيزتي

محبّتي

فاتن

[فاتن دراوشة]

عاللّومَة وْزَهّر دَمْعي

منِ جمارو تْكَحّل شَمْعي

يوم التّاريخ قريتو

عَن شَعْبي هالمَكلوما

كان الشّريف يْراسِل

مَندوبو بالرَسايِل

يِضْحك عليه بكِدْبِه

ولَلعادي قَلبو مايِل

بِلفُر يِعْطيهُم وَعدو

وِيْعَشّمهُم بِبلادي

والعُثماني الجَهّلنا

نايِم بالعسَلْ نوما

هِجراتُن بِدْيَت تِكْثَر

ونْيابُن بِدْيِت تِكبَر

والعُثماني عَمْ يِشخَر

ما تِيصَلو لِعْلوما

يومن هالطّبخَة اكتَملَت

قوّات الجّهل انهزمت

والشّعب الهون توهّم

إنّو بأرضو رَح يِغْنَم

لكنّو ما كان يِعْلَم

إنّو أحلامو مَوْهومَة

يا شَعْبي الحالِمْ إصحا

واوعَك تِغْفا هالمَرّة

مهما الغاصِب يِتجَبّر

جِذرك بالأرض بيكبر

خلّي سلاحك يتطوّر

بالعلم ضلوعك تِعمَر

حتّى نذوّقهُن سَمُّن

لِبْكاسُن شَرّبونا

[فاتن دراوشة]

عاللومة وسايكس و بيكو
مكماهون يربيكو
انتا يا حسين شريكو
رايح بسابع نوما

بلفور بيعطي وعدو
ليهودي بأرضي قصدو
يخلف للعرب عهدو
هالنذل ابن الملعونا

يا فاتن اوعي تنسي
وعد تاني لبيرسي
من ابن سعود لكوكسِ
يِكرم في فلسطينا





انا السلطان عبد العزيز بن عبد الرحمن السعود اقر واعترف الف مرة للسير برسي كوكس مندوب بريطانيا العظمى لامانع عندي من ان اعطي فلسطين للمساكين اليهود او غيرهم وكما ترى بريطانيا العظمى التي لا اخرج عن رأيها حتى تصيح الساعة

[فاتن دراوشة]

عاللّومَة وْهَجّو حْبابي

خَطْوُن خَضّبلي تْرابي

قالوا بُكْرَة رَحْ نِرْجَع

وأخَدو مِفْتاحِ البابي

وِغيابُن طال وْطَوّل

وِقليبي جَمْر تْحَوّل

هالعالَم يوعِدْ فيهُم

بسّ قْلوبُن مَكْلومَة

وِبْيوتُن خَلَعو بْوابا

وِسَكَنو وْصارو أصْحابا

وِحبابي لِسّا يْصَلّو

إنّو يْدوسو عَعْتابا

يا حادي العيرِ إوْصَلُّن

عَنْ لوعاتي خَبِّرهُن

إنّي بأرضي هَسْتَنّا

وانطِر مِنْهُمْ لِعْلوما

[فاتن دراوشة]

عاللومة شعبي تهجَّر
بخيانة وغدر وعسكر
مندوب السامي يمكر
يدعم نذل الصهيونا

لا تستنا قرارات ي
يا شعبي بالشتات ي
الثورة شمس الآتي
يوم النصر الميمونا

بكرة جايي بسلاحي
حامل برضو مفتاحي
بداري أداوي جراحي
يا فاتن يا مزيونا

[فاتن دراوشة]

عاللّومَة وبالدّفاتِرْ

سَطَرو كُلّ المَجازِرْ

شيخِ التّاريخِ يْسَجّلْ

دَمْعَة بْقَلْبي هالعاثِرْ

مِن جورِ العادي وْظُلمو

فاضِت مِنّا لِسْموما

طِفْلي بالحَجَرْ يْقاوِمْ

طِفْلو بالعَسَلْ نايِم

شيخي مْنِ البَرْدِ تْجَمّدْ

وِعْظامو صارِتْ مِبْرَد

خِتْيارُن بالجاكوزي

مْدَلّل نَفسو وِمْفَرْهِدْ

شَبابي بْدمّ عْروقا

وِبْعَرَقا تْجيبِ اللُّقْمي

تِنْسِف روحا لَتْعَبّر

عن صَرْخِتها والنّقْمِة

وِشَبابُن بالمَلاهي

بالحِلوَة القَلِبْ ساهي

كَلْبو جَنبو يْهَوْهِولو

وِيْلَحّسلو لِهْدوما

وينِ التّاريخِ يْسَجّل

وِلْهَمّي النّازِفْ يِغْسِلْ

وينِ الإنسان اليُشْعُرْ

وِيْبادِلني لِهْموما

[فاتن دراوشة]

عاللومة اللومة اللومة
يا فاتن يا مكلوما
وطنك هو همك دوما
وانا مثلك مهموما

عاللومة وابن بلادي
في الغربة عمَّ ينادي
يا محلا الاستشهاد ي
فوق تراب فلسطينا

عاللومة ونادت امي
بلدك بروحك احمي
لا تنساها بالزحمة ي
جبل الكرمل حنونا

[فاتن دراوشة]

عاللّومة ورُحتِ البَيْدَرْ

وِمْشيت بْحِضنو الأخْضَرْ

عَجْنابو النّرْجِسْ يُرْقُص

وِبْساحو يْغَنّي الزّعتر

والرّوح بْصَدري تْزَغْرِد

لَمّا الماضي تِتْزَكّرْ

يومِن طَلّت هالفَزْعَة

والأرْضِ بجودُن تِعْمَرْ

يْغيثو الفلاّح بعَزْمُن

تَيْدوسِ السّبَلِ الأصْفَر

وِيْذَرّي القَمْحِ وْيِفْصِل

تِبْنو للرّيحْ تبَعْثِرْ

هالطّايِف وَيّا الرّاكِس

يِمْشي يْدوس وْيِتْبَخْتَر

وِغْمار القَمْحِ إلْتِحْتو

مِن قّشّاتا تِتْزَنّر

مَحلا رْجالِك يَبلادي

يومِ بْفَزْعِتْهُن هَبّو

صوت الموّال يْنادي

والميجانا واللّومَة

وعاللّومَة ويا بيدَرْنا

ما رَحْ نِنساك بْيوما

ورَحْ تِفْضَلْ أجمَلْ زِكرى

لِيّا وْلِوْلادي دوما

[فاتن دراوشة]

عاللومة وقاع الوادي
الراعي عم بينادي
يا محلا الطير الشادي
بيغرد عدلعونا

عالبيدر محلا الدرس ي
وبعدو ميعادو عرسي
والله لقعد عالكرسي
حدك يا هالمزيونا

دخلك يا طير الشادي
بوصولك أرض بلادي
بلغ أمي وولادي
راجع لو مهما يكونا

[فاتن دراوشة]

عاللّومة وْكَرْمي الأخْضَرْ

بي زَيْتونو يِتْغَنْدَرْ

حبِّ الزّيتونِ الضّاوي

فوقِ غْصونو يِتْمَخْتَرْ

والفَلاّحِ بْفَلاّتو

يِفْرِش كَرْمو هالأخضَرْ

بيديهِ البيضِ يْنَقِّبْ

زيتوناتو المَزْيونا

غُرْبالو جَنْبِ الفَلّي

يِنْطُرْ مِن مَرْتو طَلِّي

بَعِدْ مَتْجولِ الأرْضِ

تيجي تْنَسّفْ وتْمَلّي

يِتْغَدّو بْفَيِّ الشَجْرَة

زيت وْزَعْتَرْ مَطحونا

مَحْلا رْبوعِكْ يَبْلادي

وْمَحلا لَمِّة لِكْروما

[فاتن دراوشة]

عاللومة ونتي حبي
يالجسمك لازق جنبي
ورموشك فوقي تخبي
حَب ثمار الزيتونا

يا حلوة وخضر عيونك
قلبي صاير مفتونك
حشرتك في طاحونك
سرسب زيتك للمونة ا

شجرة زيتون بلادي
فيّ وخضرة وسعادة ي
وزيتا بيغذي ولادي
يا خضرا ويا ميمونا

[فاتن دراوشة]

عاللّومَة وْبالبَوادي

يِنْشِدْ هالطّيرِ الشّادي

أرْضِ بْلادي المُحْتَلِّة

لازِمْ تِرْجَعْ لَولادي


يا غاصِبْ مَهْما يْطَوِّلْ

يومَك، ليلَكْ هَيْلَيِّلْ

وِلْأرْضِ إلْتَحْتِ رْجولَكْ

تِرْجَعْ لينا مِتْل اوّل


هَيّو التّاريخِ بْيِشْهَدْ

وِتْرابي عَمْ يِتْنَهّدْ

صَرْخِة غيضو بِتدَوّي

وِبْهَزّاتا تِتْوَعّدْ



يا طيري إلْطايِرْ إصْبِرْ

فَجْرَك للشَّمْسِ بْيُنْطُرْ

إلاّ ما بُكْرَة تْشَقْشِقْ

وِتْنَسّينا لِهْموما

[فاتن دراوشة]

عاللومة وبير السبع ي
يا خيي انتا سبعي
تحميلي كرمي ونبعي
من هالابن المذموما

يا الانتا من نصيبي
مهري بلدي الحبيبة ي
مهري تنسف هالجيب ي
تخليه شقف ملموما

خلي التاريخ اليكتب
شعبي يقاتل ما يندُب
والحاكم عمّا يشجُب
شالح سترو والهدوما


يا فاتن انتي الكلمة ي=بسمة بلادي نجمة ي
بضّوي بليل العتمة ي=شِعرك يشفي المكلوما

[فاتن دراوشة]

عاللّومة وعَلى النّبْعَة

شُفْتِكْ مَرّة مَرْيومَة

شُفتِكْ بِتْعَبّي الجرّة

وْعَمْ تِغِسْلي لِهْدوما

وِتْغَنّي بْصوتِكْ غِنْوِة

تِشفي قْليبي المَهموما

عَنْ شَبّ جْبينو مْضَوّي

بسّ جْيابو مَخْرومَة

جا بوكي بيومِ يْدَقْدِق

يُطْلُب إيدِك مَرْيومَة

وْبَيّك ما عبّر قَلبو

هاللّي بْحُبّك مَغروما

قَلّو يَبْني ما فيني

أدفِن ضِلعي هالغالي

هالبِنْتِ السّمرا نَبْضي

وأغلا عِنْدي مِن حالي

كيف أرضالا تِتْعَثّر

وْتِصْبَح بُكْرَة مَحْرومَة

قَلّو هالشَبّ الأسْمَر

يا عَمّي الفَقْرِ مْقَدّر

يِمْكِن رَبّي يْبَدّلني

مِن بَعد المرّ بسُكّر

يِمكن يغنيني وْيصْبَح

لي مال وْقَصْرِ وْ عَسْكَر

بسّ قليبي هالعاشِق

ما رَحْ يِنْسى وْيِتْغَيّر

هُوّي البيت إلي يِحْفَظ

بِنْتَك وِيْصونا دوما

بَيّا ما عبّر قَلبو

للعاشِق هالمَغروما

وهِيّا يا كِبْدي الحَسْرَة

عَصْرِت قَلْبا بِسْموما

يالزّين الحبّي بْقَلْبَك

قَلْبَك خَبّيتو بْضِلْعي

مَهما تِبْعِد خَطواتك

هَتْظلّ بقُربي تْحوما

[فاتن دراوشة]

عاللومة وتمشي شويه ي
وتطّلعلي بحنيه ي
وبعينا تغمز ليي
وتغني بعد الصوما

بنت المدارس ويلي
حبّا قطعلي حيلي
تمشي والخصر يميل ي
خلت قلبي مغروما

يا حلوة ورد الجوري
بلبقلك مهما تقولي
والسيف الي بيصول ي
بلحاظك يا مريوما

[فاتن دراوشة]

عاللومة وقالو احساسي
يخطر على بال الناس ي
هو تشريد ومآسي
قصف لكفر قدوما

يا سمرا ويا ملاكي
سبحان الي سواكي
انتي النجم بسماكي
ونور القمر مغروما

يلشعرك حب ومغنى ا
كلامك حلو المعنى ا
تعي عالدبكة ي معنا
نغني عاللومة اللومة

[فاتن دراوشة]

عاللّومَة وْشِفتو مَرّة

شيخِ الكُتّابِ يْزاكِرْ

في كُتّابو هالضَيِّقْ

مِنْ غيرْ كُتْب وْدَفاتِرْ

يِقْرا وْطُلاّبو قْبالو

كِنّو في القاعَة يْحاضِرْ

وْهَلّي مَيْرَكِّزْ مِنُّن

سوطُه يْشِقلّو هْدوما

مِنْ خوفِ الطّالِبْ يِحْفّظ

دَرسو عَنْ غيبِ وْيِفْضَل

قَلْبو بالخوفِ مْبَلّلْ

لَيْروحِ لْسانو يْخونو

قُدّامِ الشّيخِ وْيِدْبَلْ

وِيلِقْيامي هَتْقوما

[فاتن دراوشة]

عاللومة وعالكتّاب ي
نروح أنا وصحابي
مع القرآن حساب ي
شيخ وعصا وعلوما

عصاة الشيخ تأشر
عالمشاغب وتبشر
يعبس الشيخ يكشر
يضرب فوق الهدوما

أحفظ عن غيب دروسي
من الخوف اصير أحوس ي
واكرر كالمهووس ي
دروسي في عز النوما

[فاتن دراوشة]

عاللّومَة وْهَلْهَلْ طِفْلي

يِلْعَبْ مِنْ جَنْبِ الحاجِزْ

بهالطّابِة الخَضرا يْخَبّط

وْيِنسى الدِّنيي وِهْموما

شافو الجّندي بِيْقَرّب

صوبو وْوَقّفْ مِسْتَغْرِب

قَلّو مُخّو هالعاجِزْ

شَكْلو هالطّفْلِ مْخَرّبْ

يِمْكِن أصْلو إرْهابي

وبرصاصو جانا يُضْرُب

حَضّر رَشّاشو الغاصِبْ

وِلْقَلْبِ العَيِّلْ صَوّبْ

هالطّفْلِ يْقَرِّبْ يِضْحَكْ

وِسْلاحِ الجُنْدي مْجَرّبْ

ما يِخْطي الطّيرِ الطّايِرْ

حَتّى لَو مِنّو تْهَرَّبْ

هالطّلْقَه لِحْقِت طَلْقَه

وهالضّحْكِة الحِلْوِة انشَقِّتْ

مِنْ وِشِّ الطِّفْلِ وْعَلِّت

للجَوّ وْصارِت صَرْخَة

دَوّت بالجوِّ وْسَلْبَتْ

مِنْ أهْلِ بْلادي النّوما

مِنْ يوما وْروحو الخَضرا

تْرَفْرِفْ وِتْلوحِ بْجَمْرا

مِنْ فوقِ الحاجِزْ هَلّي

جَنْبو الجُندي بِيْحوما

[فاتن دراوشة]

عاللومة اللومة اللومة
عاللومة اللومة اللومة

جايي هالجندي السافل
بسلاحو والقنابل
يحرق قمح وسنابل
يقلع شجر الكروما

عاللومة اللومة اللومة
عاللومة اللومة اللومة

هادا.. ابن اليهودي
صادر اراضي سيدي
الغلة ي والحصيدة ي
يا أرضي يا مكلوما

عاللومة اللومة اللومة
عاللومة اللومة اللومة

لما فات البيارة
سرق حتى الحمارة
حمّل عضهرا اجرارا
رش الباقي بسموما

عاللومة اللومة اللومة
عاللومة اللومة اللومة

صهيوني بالسلاح
راح اجعلك أضاحي
في أرضي ما ترتاح ي
يا مسببلي الهموما


عاللومة اللومة اللومة
عاللومة اللومة اللومة

بشعرك يا فاتن غنِّي
وطني يلأرضو جنة ي
تعي اطلبي وتمنّي
من أثمارِ الكُروما

[محسن البدراوى]

ملحمه شعريه رائعه تتغنى بها الصدور قبل السطور
تحيتى لما نثرتما هنا
وبالتوفيق

[فاتن دراوشة]

ملحمه شعريه رائعه تتغنى بها الصدور قبل السطور
تحيتى لما نثرتما هنا
وبالتوفيق

وتحيّتي لقلبك العبق بالرّوعة والّذي أنار المكان بمروره أخي

مودّتي

فاتن

[عبدالكريم شكوكاني]

عاللومة وتمشي عكسي
حكومتنا تركب تاكسي
تلعب طرنيب ترِكس ي
تدعينا على النوما

حريه ببلدي ماكو
صيد وممنوعة شباكو
الواقف عَ شباكو
يتوجهلو لِتهوما

صهيوني ارضي يصادر
يسرق قمح البيادر
بيتي يهدو هالغادر
اسمي يسجل مكتوما

لمّا أرد الصاعِ ي
ينسى العالم الداعي
خليجي يلوي ذراعي
يقطع عني الدرهوما



عاللومه وفاتن تحكي=لغير الله ما تشكي
تكتم غيظا وما تبكي=إبلادا هالمظلوما

[فاتن دراوشة]

عاللّومَة وْضَجِّ الحارِسْ

مِنْ فِعْلِ بْنِ المَدارِسْ

هالمَفروضِ إنّو عَرَبي

وأهْلو كْرامِ وْفَوارِسْ

قال شو بييجي مِتْأخَّرْ

عادَرْسو وْجِفْنو ناعِسْ

ليلو عالشّاتِ مْقَضّي

مَعْ بِنْتِ شْلومو وبيرِسْ

والواجِبْ جُوّا الشّنتي

يِحْلِفْ مَبْيومِ يْلامِسْ

بالجِلّ مْوَقِّف شَعْرو

وِقَميصِ مْرَقَّعْ لابِسْ

والبَنْطَلونِ مْمَزّعْ

قال شو موضَة مِنْ بارِس

في السّاحة جِنِّ مْصَوَّرْ

بي هالبَناتِ يْعاكِسْ

أو بينِ صْحابو يْرافِسْ

وبالصَفِّ لْسانو تْحَجَّرْ

لا يِتْحَدّى وْلا يْنافِسْ

هالغاصِبْ خَرَّبْ مُخّو

وْخَلّاه لَلْقِيَمْ هارِسْ

خَلاّه يِبْعِدْ عَن دينو

وِلْتوبِ الكُفُرْ لابِسْ

يِبْعِدْ عَنْ دَرسو وْعِلمو

وِبْطينِ الجَهِلْ طامِسْ

يا ربّ الكونِ اهديهُمْ

واجْعَلْ مِنْهُمْ نوارِسْ

لَلْخِيرِ تْطيرِ تْعَلّي

وِلْدينَكْ تِبْقى الحارِسْ

تِحْمِلْ قُرآنا بْقَلْبا

وِتْزاكِرْ بالمَجالِسْ

تُرْفُضْ فِكْرِ الصّهيوني

والجَهْلِ وْوِشّو العابِسْ

وْتِزْرَعْ أخلاقا وْعِلْما

أشْجارِ بهالمَوارِسْ

[عبدالكريم شكوكاني]

عاللومه و على النت ي
الحاله زي الزفت ي
شباب تدور بنت ي
يشكي كتر الهموما

يا ساكن جوه الشات ي
بتغازل بالبنات ي
ناسي انو الحياة ي
بتمشيش بقلة نوما

يا شاب زغير وعايق
عمري ما شفتك رايق
بالليلِ النتِ سايق
تأبيده انتا محكوما


يا فاتن جيتي الحصه=أشعلتي بقلبي بصّه
شباب عيونن عمصه=بيعادونَ لعلوما

[فاتن دراوشة]

عاللّوما وعَلى السّاحِلْ

عَكّا وْسورا إلْبيقاتِلْ

سورٍ صَدِّ الفَرَنسي

وْخَلاّه يِرْجَعْ مَيْقاتِلْ

بسّ البَلَدِ اللي صَمْدِتْ

وِلْظُلْمِ النّاسِ اتْحَدِّتْ

صارِت مُضْغَة لَلعالِمْ

وِمْجادا بْيومِ اتهَدِّتْ

هالغاصِبْ تَرَكِ بْيوتُنْ

واتْخَبّا جُوّا عْقولُنْ

عَلّمْ شَبابُنْ تِسْكَرْ

وتْصيرِ بْجيشو عَسْكَرْ

بْهِرْوينو حْساسُنْ خَدَّرْ

حَتّى مَيْراقِبونَه

وهالشبّ إلْدَمّرْ حالو

وْهَمّلْ بيتو وِعْيالو

باعِ إلْبيتِ اللّي وِرْثو

تَيْجيبِ السَمّ بْمالو

بِنْتو بالمَلهى بْتُرْقُص

وابنو مِشْ عارِف مالو

يا أرْضِ العزّ إلْكُنتي

ريتِكْ لَمْجادِكْ صُنتي

وريتِ وْلادِكْ يِرْتَدّو

عَنْ دَرْبِ اليِكْرَهونِكْ

[آمال المصري]

ثنائي رائع وملحمة شعرية بديعة طروب الحرف والقافية
بوركتما واليراع التي نسجت والروح التي أطربتنا
تحاياي

[فاتن دراوشة]

ثنائي رائع وملحمة شعرية بديعة طروب الحرف والقافية
بوركتما واليراع التي نسجت والروح التي أطربتنا
تحاياي

الأروع هي متابعتك الرّاقية

وتعطيرك لمتصفّحنا بمرورك يا غالية

محبّتي

فاتن

[فاتن دراوشة]

عاللّومة وْغاب خْوَيّي

وما عادِ يْرِدِّ عَلِيّي

والكِلْمِة بزوري نْحَبْسِتْ

وابتِساماتي مَطْفِيّه

وينَكْ يا إبْنِ بلادي

يَلْحَرْفَكْ سيفِ وْخَنْجَر

وِمْوَجَّه للأعادي

ربّي من عندو يصونك

وإن كُنتِ بْعُسرَه يْعينَك

واللّومة دومِ بْتُنْطُر

فُرْسانا هالمَيْمونا

[عبدالكريم شكوكاني]

عاللومة وجيتك أختي
الدنيا عمّا بتشتي
شتوة نيسان إلتعطي
زهر وبسمة الكروما


فاتن يا أحلى نجمة ي
وجها يملاه البسمة ي
شِعرا صورة مع رسمة ي
لفلسطين المكلوما

[فاتن دراوشة]

عاللّومة وهلهل خيّي

وْجا بَعْدِ غيابو لَيّي

حامِل مِنْ تُرْبِ بْلادي

كَمْشِة صغيرة بْحِنِيّة

أحْمِلْها مَعْ أولادي

حَنّي بيها لِخْدوداااااااا

أهلا بخْويِّ الكِلْمِة

هالروحو تِصْهَلْ نَغْمِة

تُلْطُمْ من نورا العَتْمِه

وتْطْرُد عَنّا لِهْمومااااا

[عبدالكريم شكوكاني]

عاللومة وبفرح فيكي
يا أحلى وأغلى شريكة ي
في شِعري ابعت ليكي
ومضة مع هالنجوما

شِعري فيكي بِيهلّي
انتي من أغلى أهلي
في حيفا وغزة وسهلي
شِعرك يسعِد باللوما

[فاتن دراوشة]

عاللّومَة وْخَلَّكْ شاهِدْ

يا طورِ الأرْضِ الصّامِدْ

إنّو القَبْرِ اللّي دَسّو

بِطُهْرِ تْرابِكْ هالحاسِدْ

ما رَحْ يِشْهَدلو بإنّو

مالك هالأرْضِ المارِدْ

وْما رَحْ يِثْبِت للعالَمْ

إنّو عَتْرابَكْ خالِدْ

يا طور بْلادي وْقُدسي

رَحْ ييجي اليومِ التِرْمي

مِنْ بَطْنَكْ آخِرْ عَظْمِه

دَسّا بْتُرْبَكْ شالوما

[عبدالكريم شكوكاني]

عاللومة ومحلى الكلمة ي
للقدس بنرسل بسمة ي
بصلية بارودة بنحمي
وطن صاير مظلوما

دخلك يالطير الشادي
مُرّلي على بلادي
حيفا بهواها النادي
تسحر قلبي المكلوما

بالله توصل سلامي
للفاتن والعمام ي
حيفا أرض الكرامة ي
تحرِم صهيوني النوما

[فاتن دراوشة]

عاللّومَة وْهَجّو النَّاسِ

يومِنْ بالخوفِ تْعَبّو

تَرَكو بيتُنْ للضايِمْ

وطِفْلُن بِمْهيدو نايِمْ

وْخَلّو المِفْتاحِ بْيَدُّن

تَيْذَكِّرْ دومِ بْعَجْزُنْ

وهالصّهيوني هالفاجر

جا صوبِ بيوتُن داعِرْ

أخَذِ البيتِ بْعَفْشاتو

وِتْبَنّى الطِّفْلِ العاثِرْ

صارِ فْلِسْطيني مْهَجّن

وْمِن أحَمَد خَلّوه زيمِر

وِبْجيشِ العادي تْجَنّد

يُضْرُب خيّو وعْمومَه

[عبدالكريم شكوكاني]

عاللومة اللد بتبكي
جامع دهمش والبِركة ي
قتلى والدم بيحكي
قصة شعبي المكلوما

في عكا سمّوا الميّة ي
فعل ولاد الحرامية ي
صهيوني بكرة ليي
جيشي يحرر الكروما

[فاتن دراوشة]

عاللّومة وعلى التلّة

وعا سلكِ الدَمِع يَللّي

بِكيِت جنبو الثّكالى

وماتت لِرْجالِ بْهَمّا

يا مَجْدَلْ شَمْسِ الحُرّة

يَلّي للشَّمِسْ غُرّة

دمعات عيونِ وْلادِك

عشفافِ الشَّفَقْ مُرّه

وْدَمِّ كْبادِكْ هالماتو

بِلغامِ الغاصِب جَمْرَة

رَحْ تِحْرَق جورِ الظّالِم

وتبَدّد سيلِ سْموما

والأرضِ الحرّة تِرْجَع

لشَعْبا هالمَهموما

[عبدالكريم شكوكاني]

عاللومة ومجدل شمس ي
جيتا بغياب الشمس ي
بحرب تشرين الهمس ي
سرّي صاير معلوما

يا جبل الشيخ البَرَكة ي
طلعتو بيوم الدبكة ي
التلفريك لو يحكي
جيتو بعزِّ الصوما

يا فاتن قلبي مطفي
قِدتيه بنار الزحف ي
كريات شمونا ونَحْف ي
تشهد عليا اليوما

[فاتن دراوشة]

عاللّومة وْجَبَلِ القُدْسي

طافِحْ بجْنودِ وْتِرسي

يِحْتِفلو بْقَتْلى راحو

فِدْوا للحِلْمِ المَنسي

وْشَعبي مْشَتّت يا كِبْدي

في كلّ بْلادِ العالِمْ

لا فيّو يْشوف الأقصى

ولا فِيّو يْشيلِ الغَصّة

مِنْ قَلْبو وِلِهْموما

[عبدالكريم شكوكاني]

عاللومة وهادا الببكي
خزري بملامح تركي
والحيطة لمَّا بتحكي
تلعن إدْنَهْ و شالوما

والفاتن لا ما بتشكي
شعبي تشتت بلعركة ي
دعوة للوحدة بتحكي
شعب بقلبو ملموما

الأقصى بينادينا
القيامة عم تحكينا
قصة وطن ومرتينة ا
تحرم صهيون النوما

[محمد محمود محمد شعبان]

أعجبتني تلك الزجليات
رغم أن اللهجة صعبت بعض الشئ لكني شعرت جمال حرفها
مرور أولي وأعود من بعد إذنكم
دمتم بكل إبداع


تحيتي

حمادة الشاعر

[فاتن دراوشة]

أعجبتني تلك الزجليات
رغم أن اللهجة صعبت بعض الشئ لكني شعرت جمال حرفها
مرور أولي وأعود من بعد إذنكم
دمتم بكل إبداع


تحيتي

حمادة الشاعر

أهلا وسهلا بك في صباحاتنا أخي

وبانتظار عودتك

مودّتي

[عبدالكريم شكوكاني]

عاللومة والله اشتقنا
يا فاتن تبقي معنا
كلمة منك تجمعنا
ببعادك كبست نوما

[فاتن دراوشة]

عاللّومة وكترو شغالي

وقلت بقلبي نيالي

فكّرت الشغل بيثري

لكن هدّلي حيلي

والرّاتب دوبو مكفّي

للقمي ويلهدوما

[عبدالكريم شكوكاني]

عاللومة المتلي فاضي
الفاضي بعمل قاضي
عم بوزع أراضي
من تعبو ينام محموما

شغلك والله عبادة ي
في تعليم الأولاد ي
بيعادل الجهاد ي
للي بيفهم لعلوما

يا فاتن حقك مني
لا تهتمي وتعنّي
المعلم إلو الجنة ي
دوم الراتب مجروما

[فاتن دراوشة]

عاللّومة وقالو الجنّة

للّي بالعلمِ بيِزْرَع

وْقالو إنو حَصادو

مِتلِ السَبايِك بِلْمَعْ

ونّو من بينِ كفوفو

عزّ بلادو رَحْ يِرْجَع

لكن هالجيلِ الهابِط

يا خَيّي دومِ يْلابِط

ما عَم يِقْبَل يِتْعَلّم

وْقَلبو مْنِ الجَهِل شايِطْ

وْلِمْعَلّم عندو بِدْعَة

بيضرُب نُصحو بالحايِط

يا خيّي الدّنيي انقلبت

وِتْعَرّو وْلادِ الخايِطْ

وابنِ الكندجي حافي

وابنِ المشايِخ ساقِط

يا ريت العالم يصحو

من غفلتهُم والنّوما

[عبدالكريم شكوكاني]

عاللومة وعلموني
بالمدارس حطوني
حافي ابرد كانون ي
وحَبَيْتا للعلوما

عاللومة وجيل الحين ي
هدوموا لامارتيني
بلبس زي جيمس دين ي
وعقلو صاير مخروما

بيناديني يا سيدو
باسمي بغلط ويعيدو
مهو ترباية نيدو
ومعكرونة أندوما

يا فاتن ضحكتيني=مهموم وعايف تيني
نقدك عدَّلِّي جبيني=غابت لحظة الهموما

[فاتن دراوشة]

عاللّومة وشبّ مْسَمْسَمْ

لابِسْ تي شيرت مقلّمْ

حامل كتبو عكتفو

وقال شو رايِح يتعلّم

مرّت من جنبو بنيّة

صارِ بْعِطرا عم يحلَم

لحقا والدمّ بيغلي

والعشق بقلبو تحكّم

قلّا يبنيّة دخلك

قلبي بالحبّ تشرذم

والشوق اللّي بضلوعي

من حرّو القلب تْألّم

وقفت جنبو الصبيّة

شدّت كتفو بحنيّة

وقالتلو لكْ يا بنَيّي

إيمَت رايِحْ تتفهّم

لسّاكِ صغير ولسّا

حبّك عَشجارو مبرعم

تنّك تكبر يا خيّي

لازم عقلك يتكلّم

والحبّ اللّي تنتظرو

هيصير بنضجك مغنم

لا تخلّي جهلك زرعك

لنّك لو تاكُل منّو

رح أفكارك تتسمّم

وآمالك هاللّي بْنيتا

رح تتداعى وتتهدّمْ

يا خيّي روح مدرستك

وانهل منها لِعْلوما

[عبدالكريم شكوكاني]

عاللومة وداهن شعرو
ابجل وعامل نيجرو
لسا ما بعرف بعرو
من جبنة الحلّوما

عاللومة ويا حبِّيب
راكب عربية جيب
مخ يودي ويجيب
بكره كل العلوما

يا حسرة عنب الزيني
جيل ينجس مدينة ي
بشرب عرق ومارتيني
ومازاتو بالأندوما

يا خيّة قولي مشلَّخ=ضحكة بقلبي بتصرخ
أملي بالجيل كبيرة=وانشالله غداكي بطرخ
ههههههههههههه



البطرخ/بيض السمك(الكافيار)

[فاتن دراوشة]

عاللّومة ورحتِ أتْسَوّقْ

والسّوقِ بْناسو بيِغْرَقْ

نسوانِ رْجالِ ووِلْدٍ

بِجنابِ السّوقِ مفَرّقْ

هادي بتِغْمِزْ بالبايِعْ

وذاكِ بْوِشّا بِيْطالِعْ

والكوسايِة مَخروما

بيّاعِ العطرِ مْكَحّل

وبالصّبايا بيتغزّل

تركو الخضرَة والطّبخَة

وأخدو من عِطرو كوما

وبيّاعِ اللّبسِ مْصَهْلِل

جنبو النّسوانِ بْتُنغُلْ

جَرّت زوجا يِدفَعلو

وهيّي بتضحك وتبهلل

مصروفِ الشّهرِ تبخّر

عالحُمْرا ويلِهدوما

ابنا عمْ يبكي جنبا

يا ميما من دِيادورا

هاتي الحذوِة ومن بوما

وهالرّجالِ الساحبتو

ولأغراضا محمّلتو

فوقِ غْراضا محَمّلتو

هالحَسْرَة و]لِهْموما

[عبدالكريم شكوكاني]

عاللومة وبتناديني
حلوة وتوبا فلسطيني
لا ديور وجوست وديني
بتعادل هالهدوما

شفتا بتعبي المية ي
هالبنت الكنعانية
تمشي بخفة وحنيّة ي
قمر بعالي لنجوما

بنت بلادي نشمية ي
بالحرب بتسوا مية ي
لما بتيجي الدورية ي
تزرع بالدرب لغوما

ويا فاتن هدي شوية ي=على ختيار بطاقية ي
بعدو حامل شبرية ي=وكلاشنو بالكروما

[محمد كمال الدين]

وعلومه وآني معدي
شفت لموضوع قبالي
قريته ولقيته
شعرن بالعطر محلي
قلتن أمسي عليكو
وعلقلب الصافي فيكم
يا محلى الكلمة منكم
سكنت في خلايا قلبي

[فاتن دراوشة]

عاللّومة وشعشع حرفك

بين حروفي بيحوما

وعطرو عطّرلي سطوري

وخفّف عنّا لِهموما

يا محمّد جيت لبيتك

ونفخر بوجودك دوما

وإن ضاق البيت بحرفك

رح نفتحلو لِكروما

غرّد يا خيّي وزغرد

وارمي همومك عاللّومة

[عبدالكريم شكوكاني]

أهلا بالضيف الزاير
قلبو معانا صاير
عم يرسمنا دواير
ويغني معنا اللومة

يا فاتن انتي بَركة ي
قومي استني عالبِركة ي
جايي وسلاحي بيحكي
صلياتو بقلب شلوما

عاللومة ويا عصفوري
حسون وزرعي ودوري
دير بالك ع متوري
راجع أسقي الكروما

[محمد كمال الدين]

أخويا الشاعر عبدو
واختي الكريمة فاتن
ترحابكم عطر قلبي
من نبع ها لجناين
جزاكم ربي خيرا
يملا الجناين دوما

[عبدالكريم شكوكاني]

عبدو محدش قللي
زعلان أو متجلي
وبآخر عمري تقولي
عبدو ياهالمهضوما

مبتلبقش عليي
توبا مرهرِط شوية ي
لو قلتلي يا خيي
بتكفيني على الدوما

اربيت عالخشونة ي
يا محمد نور عيوني
سِف شوية كمونِ ي
وارجع كمِّل النوما

ههههههههههههههههههه
تحياتي يا محمد

[فاتن دراوشة]

عاللّومة وزعل الشّايب

وصارِ يْلومِ الحبايِب

قلّو للشبّ النّشمي

محسوبك يبني عايش

بالحرف وجمرو يحارب

ما ينفعلو يتدلّع

ولوشّو العابس يخلع

لنّو فلسطين بتنزف

وقليبو معبّا هموما

[عبدالكريم شكوكاني]

عاللومة وجبتي الأصبع
عالجرح وعلى المنبع
فاتن كلمتها إل تنفع
اتداوي شايب مكلوما

يا فاتن بنت بلادي
لا زال الأصبع شادي
بيغرد عالزناد ي
ناسي الشيب ولهموما

الكلمة جمرة تِغلي
البارودة بترتحلي
لمّا بمشي بسهلي
يندهلي شجر الدوما

[محمد كمال الدين]

عبدو محدش قللي
زعلان أو متجلي
وبآخر عمري تقولي
عبدو ياهالمهضوما

مبتلبقش عليي
توبا مرهرِط شوية ي
لو قلتلي يا خيي
بتكفيني على الدوما

اربيت عالخشونة ي
يا محمد نور عيوني
سِف شوية كمونِ ي
وارجع كمِّل النوما

ههههههههههههههههههه
تحياتي يا محمد

ههههههههههه
يا خي أني آسف
ما بقصد غير تفرفش
كمون افقلبي ضحكك
خلالي وشي كرمش
عندنا ف مصر عادي
عبده عليه بنادي
ظنيتك زي بلادي
بتحب هالمهضوما

كلامكم صعب علي
معذور والله يا خي
ناطر أتعلم منكم
وأتعطر بالكروما

( آسف جدا أستاذي واعذر قلة معرفتي بنطق لهجتكم الجميلة فهي ما وضعتني في هذا المأزق
ولك التحية والتقدير
)

[محمد كمال الدين]

عاللّومة وزعل الشّايب

وصارِ يْلومِ الحبايِب

قلّو للشبّ النّشمي

محسوبك يبني عايش

بالحرف وجمرو يحارب

ما ينفعلو يتدلّع

ولوشّو العابس يخلع

لنّو فلسطين بتنزف

وقليبو معبّا هموما

وقليبنا معبي والله
لكنا شو هنسوي
بدي أجيكم توا
والأمر مو بيدي
فكر الصهيون منظم
غيب حقوقي عني
نسانا كلمة وحدة
علمنا نقولـ نفسي
بس الحقيقة واحدة
ينشدها دوما قلبي
الحق لازم يغلب
والأرض هي دمي
والصبح قرب يطلع
عـالقدس اللـ مظلوما

[عبدالكريم شكوكاني]

ده اانتا يا محمد عترة
بالمنيل ليك السترة
اذا راحت بكرة السكرة
سلاحك للحبشة يروما

دافع عن نيلك يابني
صهيوني عملك فتنة ي
ده المنبع مهوش استبنة ي
مبارك طنش لشلوما

تطنيش مبارك علّة
خلّا الصهيوني يعلا
لو كان الحاكم عِجلة
مسكتش وراح بنوما

[فاتن دراوشة]

عاللّومة وهبِّت نِسْمِة

مِنْ صوبِ الشّامِ وْناسا

وبْحِضْنا تْخَبِّتْ بَسْمِة

فَقْدِتْ طَعما وِإحْساسا

وْشِرْبِتْ مِنْ بيرِ العَتْمِة

وبَلّت بِسَوادو نْفاسا

قالتلي وين الأفصى

يَبْنَيّة وْوينِ سْوارو

بَدّي أشكيلو هَمّي

وَغْسِلْ بالدّمْعِ حْجارو

بَلْكي يْوَصّل للعَالَمْ

حَرْقِة قَلْبي وِهْموما

[عبدالكريم شكوكاني]

عاللومة وبكرة البسمة ي
للشام وجايي نسمة ي
تنهي من جابو العتمة ي
وتفرح حرستا ودوما

عاللومة ومهما صار ي
ومهما اشتد الحصار ي
الشام بتبقى نار ي
قلعة في وجه شلوما

بردى مياتو بتجري
يسقي الشجر والزهر ي
ياسمين الشام المغري
بيغني على اللومة

[فاتن دراوشة]

عاللّومَةْ وْشِفْتْ وْليفي
حامِلْ حِمْلِ وْمِتْحَمّلْ
وجايِبْ مِسّوق لْمَرتو
حَزْمِةْ جَرْجيرِ وْفِلْفِلْ
وْمِنْ هَمّو وْمِنْ حَسْراتو
ماشي والجِفْنِ مْسَبِّلْ
يِضْرُبْ خُمْسو بِسْداسُو
ويُضْرُبْ بِرْموشو المَندَلْ
نِزْلِتْ مِنْ عِيني الدَّمْعَةْ
وْقَلْبِي جُوّاتِي شَمْعَةْ
قِلْتِلّو لَهْ يَوْليفي
شولّي خلّاكِ مْبَهْدَلْ
كُنْتِ بْزَمَناتَكْ شَقْفِةْ
وْعَلى آخِرْ طَرْزِ مْبَدّلْ
شو يَلْ خَلاّهِ لْوَضعَكْ
بينْ يومِ وْليلِ تْبَدَّلْ
وْماشي بِهْمومَكْ تِهْدِسْ
وبأوْهامَكْ تِتْشَنْجَلْ
قَلّي والله يَقْليبي
جورِ النِّسوانِ مْغَوِّلْ
وِلِّي بْيِتْجَوَّزْ مِتْلِي
لازِم مِنْ سَمُّنْ يِنْهَلْ
ونتي يَلّي حَبّيتِكْ
وِحْظيتي بْحُبّي الأوّلْ
يِمْكِنْ لَوْ كُنتي قْبِلْتي
نِجْمَعْ شَمْلِ وْنِتْأَهَّلْ
كُنتي خَلّيتي نْهاري
بِسْرابِ نْجومو تْلَيَّلْ
وْكِنْتي خلّيتي قَلبي
يَلْ كانِ بْجَمرو مْشَعْلِلْ
يِطفي ويْصيرِ رْمادي
وْمِنْ حُزْنو وْغَمّو يِدْبَلْ
قِلْتِلّو لَهْ يا حْبيبي
إوْعَكْ هَيْكي تِتْخَيَّلْ
هَلّي بالقَلْبِ تْصونَكْ
ما رَحْ تِجْفا وْتِتْحَوَّلْ
لَنَو الحبّ اللّي بْقَلْبا
نِبْعِ لْزَرْعاتو وْمَشْتَلْ
رَحْ يِحفَظ قَلْبا وْزَرْعو
وْمِنْ مَيّاتو رَحْ يِنْهَلْ
وْمَهْما كِبْرِتْ أو شابِتْ
حُبّا جُوّاتا بْيِتْقَلْ
هيّي بْتِمْشي وْتِتْعَكَّزْ
وْهُوّي عالحِجْرِ مْدَلّلْ

[فاتن دراوشة]

عاللّومة وشفتك خيي

محمول بنعش وماشي

وشفت فلسطين بكفّك

ملفوفة بقلب قماشة

عشت وعيّشتا بقلبك

وبلادك رح بتحبّك

ولمّا تلوّحلا حروفك

رح تنسى المرّ وتضحك



مهداة لروح أخي الفقيد عبد الكريم شكوكاني الذي شاركني هذه الحواريّة لمدّة طويلة

له الرحمة والغفران

ولقلوبنا الصّبر والسّلوان

[ناديه محمد الجابي]

عاللّومَة وْبالبَوادي

يِنْشِدْ هالطّيرِ الشّادي

أرْضِ بْلادي المُحْتَلِّة

لازِمْ تِرْجَعْ لَولادي


يا غاصِبْ مَهْما يْطَوِّلْ

يومَك، ليلَكْ هَيْلَيِّلْ

وِلْأرْضِ إلْتَحْتِ رْجولَكْ

تِرْجَعْ لينا مِتْل اوّل

رحم الله الشاعر/ عبد الكريم شكوكاتي وأسكنه فسيح جناته
وبارك الله فيك ايتها الرائعة/ فاتن
سهرتي كانت رائعة معكما وجميل زجلياتكما بمعانيها الممتعة
أبدعتما وأطربتما ـ تمنيت لو سمعتها منك بصوتك الرائع وإلقائك الجميل.
كنز من الزجل الفلسطيني الجميل تركه لنا الشاعر عبد الكريم شكوكاتي
لنظل نتذكره بكل الخير رحمة الله عليه
ولك فاتنتي تحياتي وودي.
:0014::nj::0014: