يا مصر ، بجد وحشاني

[فريد عبدالعزيز]

يا مصر ، بجد وحشاني
واحشني تعود لياليكي
و أقول فيكي ، وأقول تاني
لحد ما شوقي يرويكي

ـــــــــــــــــــــ
شارع الهرم و الجبلاية
و صحبة حلوة فـ باب البحر
رملة بولاق ، برضه حكاية
وسط البلد ، و الليل ، و السحر

العتبة ، و الخان ، و الأزهر
و قهاوي ، للفجر بتسهر
أنا لسه و الله بافكر
إمتى الأمان يرجع تاني
يا مصر ، بجد وحشاني
ـــــــــــــــــــــ
عابدين ، و باب الشعرية
و العباسية ، و باب اللوق
سيدنا الحسين ، و الجمالية
و منها سوا على قصر الشوق

شبرا القمر ، مش عايزة كلام
و السيدة زينب ، يا سلام
حبايبها مش بتحب تنام
و الناس هناك ، شوقها معاني
يا مصر بجد وحشاني

[محسن البدراوى]

الله الله رائعة تلك الاشواق الملتهبة بسمو المفردات
نص رقيق رغم حرارة السرج وشدة الحنين
ابدعت فى استخدام ادواتك
اطربتنى حقاً
واهلاً بك دائماً
تحيتى شاعرنا الكريم
وبالتوفيق

[عايد راشد احمد]

السلام عليكم ورحمة الله

شاعرنا الافضل

كلمات عبرت بما تجيش به الصدور اليوم

فقدنا الامن والامان والله يعوض خير

قصيدة رائعه موجزة معبرة

تقبل مروري وتحيتي

[فاتن دراوشة]

مهما عكّرت النّكبات صفو هذه الأجواء الطيّبة

ستنقشع الغمّة ذات يوم لتعود مصر وأهلها كما كانت

وستعود الفرحة وراحة البال إلى القلوب التي تعبت من مكابدة الحزن

دمت بودّ مبدعنا

فاتن

[آمال المصري]

نحتاج فقط أن تطال مقلنا النوم دون سيطرة الهموم على كياننا لنعرف كيف نشتاقها
بوركت شاعرنا وانهمارك العذب
تحاياي