على ضفاف الحروف فارد قلوعي

[د.جمال مرسي]

على ضفاف الحروف فارد قلوعي


شعر د. جمال مرسي

يا شاعر قول و لا يهمك
أنا سامعك
و غيري كتير بيأسرهم كلامك لما بتقوله
و تتحرك مشاعرهم
عشان حسك
عشان صوتك
عشان نبضك
عشان اسمك
عشان الحرف زي السيف
في وقت يعز فيه السيف
كلامك كلنا نحبه
عشان بيقوله قلب نضيف
مهوش ممزوج بكبر و زيف
كلام يخرج
من الوجدان إلى الوجدان
و يفضل حي جوانا لكل زمان
كلام في الحق
و من غيرنا يقول ال " لأ "
في وش الظلم و الظالم
يا شاعر قول أنا فاهم
و كل اللي قراك فاهم
و بستناك
على ضفاف الحروف فارد قلوعي ليك
اقول لبيك
عيوني لما تطلبها
أقول تفديك
عشان غيرت فيا كتير
و خلتني أكون بالشعر أحلى أمير
تعالى معاك أشيل همك
تعالى لصدري هيضمك
و أقولك قول
أقول لك قول و لا يهمك .

و دمتم بخير

[محمد محمد سعيد]

هقول طبعا وليه اسكت

دا قلمى مداده م المعنى

هقول واحكى

عشان الكل يسمعنا

دا نا شاعر

ولو لسه الطريق واعر

همهد بالقلم دربى

ولا هقبل الين وارضى باى هوان

لانى حقيقه بتدور على اللى كان

وبتصصح قلوب عايشه

ومتعايشه مع الوجدان

بتحلم بالضمير لما

يكون صاحى وما ينامشى

بيرفض اى شىء ممكن

يدمر صورة الانسان

ويعشق كل قلب حنون

يصون عرضه

ويزرع بالوفا ارضه

عشان تطرع مبادىء خير

يقدم قلبه لجل الغير

ولا يندم ولا يحلم

بغيرضله ولقمايه

بغير هدمه وقلب معاه

يعيش فرحُه

يلملم ف الصعاب جرحه

يهون كل الاسى وياه

يا كل المعنى وحرفه

يا كل النبض ف وريدى

خلاص قلمى نسى خوفه

وزى السيف اهوه ف ايدى

***




اميرى الغالى د. جمال مرسى

اراك اليوم تثتثير حفيظة كل الشعراء بكلماتك الرائعه التى اخذت قلمى معها الى بحور الشعر دون ان يعبأ بشدة الرياح ولا ارتفاع الامواج

هكذا انت دائما استاذى الراقى فى كل شىء

دمت بكل خير وسعاده

محمد

[د.جمال مرسي]

أخي الحبيب و شاعر العامية الأول و بلا منازع
أخي محمد سعيد
ما نحن إلا تلامذة في مدرستك
يسحرنا حرفك و إحساسك فنحاول تقليده
أشكرك على مداهلتك الأكثر من رائعة و كل عام و أنت بخير و أسرتك الكريمة
أخوك د. جمال

[مريم العموري]

فارد قلوعي للهوا= للبحر للشطآن
وافضل كدا رغم النوى=بغنّي للإنسان
أيوة بغني لو شجن=للحب للطير عالفَنن
وفقلبي بيعرّش وطن=جنّة من الإيمان
***
فارد قلوعي للهوى=للشمس للأيام
لو كنا في المركب سوا=حنحقق الأحلام
إنتا وأنا رغم الألم=حنحوّل الجرح ال قلم
ونكتب على القلبين قسم=إحنا فدى الإسلام
***

منذ زمن وخواطر الشعر تلوح وتناديني لهذه القصيدة الرائعة..
حتى قررت اليوم أن لا أؤجلها مهما كانت المشاغل..
مقطوعة صغيرة أنتم ملهموها لا تسمو إلى مقام شعركم.. لكنها محاولة أخرى للتعبير عن إعجابي باللهجة الحبيبة وشعرائها
وأغلى تحية لكم أستاذي الكريم الدكتور جمال

وتحية عطرة للشاعر الكبير محمد سعيد على شعره الرائع أيضا
أبقاكما الله لنا..
وكل عام وأنتما بألف خير

[على درويش]

وصلت خلاص غنوتك للقلب يا بن النيل = نبضك هنا يعزفه حرفك بلحن جميل
جمعت كل الطيور فوق شاطىء الكلمات = وصنعت من صفحتك بستان عنب ونخيل
مريم برغم الألم فارده القلوع للريح =وسعيد بكل الوفا يرسى مبادىء جيل
وأنا طفت بين القمم أنهل وأتعلم = وتركت أهه بصمتى بينكم لحبى دليل

تحياتى لأستاذى الرائع د/جمال

[د.جمال مرسي]

و هفضل مهما شاب شَعري أقول و أقول

و مش ممكن يحيدني غروب و أفول

و لا لسع السياط فوق ضهر كلمتنا

يخلي الحرف في بقي يكون مشلول .

**

يا حرف اطلع و لا يهمك

و قول الحق لو صلبوك على الجدران

و اوعك يوم تعيش خانع

ذليل و جبان

و اوعك عن قضايانا تكون مشغول

و لا ترخّص في يوم قيمتك

و لا تحني في يوم قامتك ..

لمستعمر و لا مسؤول

**

يا حرف اطلع من الوجدان

و طير بيا لكل مكان

و خبط ع. البيبان يا ناس

أنا الإحساس

أنا الإنسان

انا مقدرش أكون محبوس ما بين جدران

و لازم للوجود أطلع

عشان كل الوجود يسمع

و يعرف يعني ايه شاعر

بيعصر قلبه بيمينه

عشان غيره يكون فرحان

و هوَّ من الأسى مقتول


احبائي الشعراء المبدعون
محمد سعيد ..
رائعة قصيدتك


مريم العموري ..
تحفة أجدت سبكها رغم اللهجة المختلفة هي قصيدتك


علي درويش
أنت أخ جميل أحبك و قصيدتك ولا أروع


تقبلوا الود جميعا

د. جمال

[د. فوزى أبو دنيا]

:os: :tree: :os:

وثار خاطرى
لقيت الشمس مشرقة ف سطرى
بتغسل م الهموم شعرى
وتغزل من شعاعها تيجان
وكات غايبة بفالها زمان
وقام شعرى
وراح شاعر
ودربى كله كان واعر
بتقتلنى ساعات الكلمة فى مشاعر
وطول عمري وانا ماشى تبع امرى
وطول عمر الشوك فرشتي ودربي
وانا ماشى بيجرح جوة فى قلبى
ومابيرحم ضمير انسان
:noc:

[د.جمال مرسي]

أخي الكريم د. فوزي
ما أسعدني بك و بمشاركتك الجميلة
أعتذر لك عن تأخري في الرد
و تقبل مودتي
د. جمال

[د. فوزى أبو دنيا]

افرد حروفك قلوع فى بحر الشوق
خلى الكلام يحلو يالى كلامك زوق
وخلى الكلام مجاديف
الحرف فيها نضيف

سالمت لنا وسلم لنا قلمك
د.فوزى ابودنيا

[د.جمال مرسي]

افرد حروفك قلوع فى بحر الشوق
خلى الكلام يحلو يالى كلامك زوق
وخلى الكلام مجاديف
الحرف فيها نضيف

سالمت لنا وسلم لنا قلمك
د.فوزى ابودنيا



أعجزت حرفي و شعري أيها الرجلُ=فانثر شذاك و دعني منه أنتهلُ
للشعر طعمٌ إذا ( فوزي ) يرددهُ =يزهو الفصيحُ و يشدو بعدًه الزجلُ


و سلمت لأخيك و محبك يا دكتور
تقبل ودي و امتناني

[د. فوزى أبو دنيا]

كده انا دخلت التاريخ من أوسع أبوابة
شوف بقى لما شاعر كبير كده زى د.جمال مرسى
يقول فيا شعر بالعربي الفصيح

سلمت لنا ولبلدك واسرتك
تمنياتى لك بدوام التوفيق

اخوك د.فوزى ابودنيا

[د.جمال مرسي]

كده انا دخلت التاريخ من أوسع أبوابة
شوف بقى لما شاعر كبير كده زى د.جمال مرسى
يقول فيا شعر بالعربي الفصيح

سلمت لنا ولبلدك واسرتك
تمنياتى لك بدوام التوفيق

اخوك د.فوزى ابودنيا

أخي الحبيب د. فوزي
ليتها كانت قصيدة طويلة فأنت تستحق أكثر
شكرا لك و دمت بخير و نعمة