كلّهم نزلوا ف يناير

[محمود موسى]

كلُّهم نِزْلوا فـ يناير
اللي كان عنده المَطالب
واللي ف إدِيه المقالب
كلهم نزلوا ف يناير

اللي قام يطْلب حقوقنا
واللي داست رجْله فوقنا
كلهم نزلوا ف يناير

اللي شايف نفسه فينا
واللي كسَّر في السفينة
كلهم نزلوا ف يناير

اللي عايز يحمي دارك
واللي من شلة مبارك
كلهم نزلوا ف يناير

اللي بيداوي ف ْ وجَعْنا
واللي شاف الثورة لعنة
كلهم نزلوا ف يناير

اللي عَلِّمْنا الجَمال
واللي كان راكب جِمال
اللي في صفوفنا ابتسامة
واللي كان شرْخ وْندامة..
اللي أخْلَص.. واللي خَبَّص
واللي زي الوعد طاير
كلهم نزلوا ف يناير

اللي شاف الظلم عار
واللي كان للظلم خادم
أو مجرد كام عيار..
اللي لما تشوفه تِحْذر
واللي لما تشوفه بتشوف البشاير..
كلُّهم نِزْلوا فـ يناير

اللي عارض
لجل يكشف كل فاسد
واللي عارض
لجْل ماتبيع الجرايد
واللي وقت الهيصة يعمل فيها ثوري
واللي وقت الجد يعمل لك محايد..
واللي لما اختار يعارض
كان يَدُوب غيرةْ ضراير
كلُّهم نِزْلوا فـ يناير

اللي بيناضل مواسم
واللي كان في الرفض حاسم
اللي حِزْبك.. واللي حزبي
واللي حزب وداد مابين المستقيم
والمَشْي داير!
وبْسببهم لسة كل الشعب حاير
نِفسه يفهم بس مين صاحب يناير
كلهم نزلوا ف يناير!

[محسن البدراوى]

الله الله حروف ماسية تتقاطر من محبرة فنان
كلهم نزلوا ف يناير
بس مين لسهاه مضحى
ودمه ثاير
مين خالفنا
ومين تلفنا
ومين بايعنا
ومين مساير
كلهم نزلوا ف يناير
بس رجعوا وفوضوهم
يقتلوا الحلم اللى فاير
كلهم نزلوا ف يناير
وبعضهم اصبح شكاير


اعتذر عن الاطالة
لك منى كل الحب والتقدير
ولكلماتك اطواق الياسمين
وبالتوفيق

[الطنطاوي الحسيني]

صدقت والله
خاطفين الثورة تساوو بالثوار الحقيقيين
وكانو فاكرين الناس هينخدعو
لكن الحمد الله فاق كتير وعرفو انه انقلاب و لعب على الشوارب
ربنا ينصرنا وثبتنا امين
رائع انت يا محمود كعادتك
اغنية جميلة وانشادها يكون اجمل لو بصوت بطل من ابطال الثورة
دمت رائعا مبدعا ماسيا