قصيدة : عاش الشهيد

[د هاني ابوالفتوح]

عَاشْ الشَهيدْ
رِحلِة حياتُه كُلها مِتقَسِمَه
عايش عشان يِجمَع لنَفسُه أوسِمَه
وتشوفُه تِلقَى شَكلُه واحدُه
لُه علامَه … لُه سِمَه
……………………
قُلت أَسأَلُه
إيه اللى شُفتُه فى دُنيِتَك ؟
مين اللى زَرع الورد دا فى سِكتَك ؟
مين حَلَى شَكلُه وعَسِلُه
حَلَى مِعَاه خَطوِتَك ؟
…………………
شُفتُه فى طَريق
ماشى لوَحدُه فى أَوِلُه
والناس هناك
هُمُوم طَريقَها طَوِلُه
فِكرُه بِعيد
شارد وَحيد
عَندُه هَدَف بيكَمِلُه
الناس تِفكَر
بس بُكرَه الأَكل إِيه ؟
وهُوَ فِكرُه
هُمُوم حَياتَه هَيعمل إيه ؟
عُمرُه ما فَكَر
يُوم يِعيش ولايِمُوت
عُمرُه مافَكَر
قَطر عُمرُه واقف بِعيد
ولا يِفُوت
عُمرُه مافَكر يِبقى صُوته
أَعلى صُوت
لكن حَياتُه فى مُنتَهاه ومَبدَأُه
واللى شَغل قَلبُه وعَقلُه ومَبدأُه
إزاى يِقَابل بُكرَه رَبُه
اللى خَلَقُه ويِرزُقه ؟
هَيقُول لُه إيه ؟
هَيِعمِل إيه ؟
الدين دَا فَرض واجِب عَليه
وهو مَخلُوق لُه بإديه
…………………
مَليون سَبب
خَلُوا الشهادة تِنكَتب
خَلوا العِبادَة فيها العَجَب
شُفت اللى بيصَلى هِناك
فَاكر بركعَه صَار مَلاك
وهُوَ وَحدُه اللى نَجَى
والناس بِحالها للهلاك
ولو تِقُول فين الجهاد ؟
يِقُول دا من أغلَى المُراد
لكن دا باب مَقفُول عَلينا
وقَفَلُه حُكَام العِباد
مين اللى عَطَل فَرضِنا ؟
مين اللى قال إن الجهاد مُش مِننا ؟
إزاى بقى يِعيش الشَهيد فى وِسطِنا
يبقى طَريقُه غير طَريقنا كُلنا
إحنا طَريقنا للهلاك
هُوَ فى طَرِيقُه مِعَاه مَلاك
الجَنه لُه مِتزَينه
…………………
مَاشِى ومِعَاه مَفاتيح للجَنه ؟
شَايفُه سَعِيد فَرحان وإتهَنى
نِسِى أَفراحُه ويا جِراحُه
خَد مُفتَاحه وراح يِتحَنى
وقت الزَفَه مَلايكَه مِعَاه
واقفه هناك وبتِستَناه
بيقول رَبى أَنا أجرِى عليك
واهب رُوحى وعُمرى إليك
وقت الحرب
لابخاف ضَرب
لا هَمنى شرق
ولا هَمنى غرب
يا جِهاد يا مُنَايا
أنا بأستَنَاك
أَرضى . سَمايا
عقلى جَسَدى
رُوحى خُطَايَا
كُلُه فَداك
يِيجى الشهيد
شَمعُه مِنَوَر من بعيد
الدنيا سُودَه كُلَها
وهو واحدُه طَالِع لُه عيد
وقت الحِساب
مَفيش عَذاب
وفى دَفِنتُه
يِلقى مَلايكَه فى سِكته
شايلَه الكِتاب من فَرحِتُه
يِشفَع لسَبعِين
وِسط أَهلُه وحِتِتُه
أَصل الجِهَاد عَامِل مَزاد
بيقُول أنَا غَايةِ المُرَاد
أنا أَمر صَادِر
وقَرارُه مِن رَب العِباد
شُوف اللىِ كَان عَامِل مَلاك
وَقت الِحساب شَاف الهَلاك
إلا الشَهيد واقف بِعيد
فى الجَنة بيرَفرَف سَعيد
فى المُوت سِكُوت
النَاس تِمُوت
وهُو حَى عَندُه رِزقُه
كُل يُوم عَايش فى عِيد
فى كتَابُه قَالها رَبِنَا
وإحنا نِقُولهَا كُلِنا
عَاش الشَهيد عَاش الشَهيدٌ
عَاش الشَهيد عَاش الشَهيدٌ
شعر د. هانى أبوالفتوح
بمناسبة عيد الشهيد 9 مارس الموافق ذكرى استشهاد الفريق عبدالمنعم رياض وتحية لأرواح الشهداء في كل مكان من عالمنا العربي

[محسن البدراوى]

كلمات جميلة مؤثرة
تسلب الوجدان وتسكب السحر فيرتعش منها البنان
رحم الله جميع شهدائنا
رائعة سيدى الفاضل بكل ما تحمل من معانى وعبر
ننتظرك دائما
وبالتوفيق

[جمعة عبد العال]

الاديب والشاعر الكبير هانى ابو الفتوح يسعدنى ان اكون من المصافحين الاوائل واول المتجولين بين ابيتت قصيدتك الرائعة والت تستحق كل تقدير وطوبى لك ولكل الاقلام الحرة التى تدلفع عن كرامة الانسان والحرية والعدالة .


جمعة عبد العال /غزة المرابطة


رئيس ومؤسس رابطة ادباء الامة //غزة

[ناديه محمد الجابي]

السلام والمجد والخلود للشهداء..
هم القناديل التي تستضئ بها الأمة، والمنارة التي يهتدي بها الشعب والوطن
وهم رمز الإيثار يموتوا لنحيا وتحيا الأوطان.
قصيد جميل سامق ـ صدقت قولا وأبدعت شعرا ، وتألقت حسا وفكرا
دام حرفك يعبق بالبهاء
ورحم الله كل الشهداء.
:v1::nj::0014: