لكل واحد في الميدان

[سامى عبدالعال]

رباعية
لكل واحد في الميدان
.
..............................
فتح عنيك الحلم لسه في الميدان
واوعاك تنام
حلمك قريب بين إيديك
احميه بقلبك م اللصوص
من بين نياب الغول ومن الغيلان
ومن اللي همه يبعدك
عن سكتك
ويتوهك
انت وصحابك والجيران
وخدلي بالك م اللي فوق
العرش
فووووق ياصاحبي فوق
دا البرج عاجي وبرج عالي
واللي في قلبه
أصدي ياعني بيسكنه
إزاي يشوف الشعب
غير حبة ديدان
ماهو في الحقيقة كل شيء
بان وانكشف
ولا حد فيهم اختشي ولا انكسف
ولاحد فيهم منهم
له طبع عنهم اختلف
يامصر دول مش مننا
دول طينه معجونه بقرف
ياصاحبي صح النوم وفوق
شوف مصنعك فيه صوت مكن
أو نور برق
وانت اللي عزمك كان
يلين منه الحديد
زي مايلين الورق
حلمي وحلمك لوسهيت
مني ومنك يتسرق
والريح تغرق مركبك
قصدي اللي هي مركبي
ومصيرنا هايكون الغرق.
نسيت جنودنا عالحدود
ونسيت كمان قطر الصعيد
وقطر موت البدرشين
والصيادين
عايشين مآسي
ولطم دايم عالخدود
راجع ياصاحبي التلميحات
والتصريحات ولا الردود
تلقاك هناك عايش بعيد
في عصر جايلك من بعيد
يشبه تمام عصر الجليد
والعصر ده عصر الديدان
وفي وسط غابه من القرود
واوصيك
ياصاحبي في النهايه بكلمتين
الحلم لسه ف مركبك
وبين ايديك المجدافين
وخلي عزمك من حديد
قلبك جديد
واهتف وغني للحياة
لجلن مايكبر حلمنا ويلمنا
ونعيش معاه
يانموت معاه
وارمي حمولك ع الإله

[أحمد الأستاذ]

رسالة جميلة المضمون,
تحمل الوجع المصري, وما يدور حوله من مصائب, ووجوه الذئاب التي تختبئ خلف الأقنعة
حمى الله مصر وأهلها
سيتم نقلها إلى قسم أدب العامية العربية
دمت بخير أستاذ سامي

[الطنطاوي الحسيني]

حلمي وحلمك لوسهيت
مني ومنك يتسرق
والريح تغرق مركبك
قصدي اللي هي مركبي
ومصيرنا هايكون الغرق.



و هوا دا بيت القصيد
لا وربي اللي خلق
عنه ما يوم ابدا نحيد
احنا اتخلقنا نعزها
لو حد خانها مننا
مش مننا ومش ابنها
ولا عمرو يرضع صدرها
اخي حبيبي العبد عال
كرهنا يا خلي السكات
سكاتنا كان سكة هلاك
و الدم يرخص لاجل ما نرجع بها
شريعتنا تقفل خرقها
وسفينة الحق العفي
تجري بنا
و لو موج بحورنا كالجبال
احنا معانا ربنا
في صفنا
واللي معاه ربه
أبدا مبيهابشي المحال


اخي القدير سامي عبدالعال المبدع
شخصت الجرح و وصفت الدواء
و القيت النصح
اخي دمت مبدعا اصيلا
رجاااااااااااااااء من اخواني المشرفين
بتثبيت هذه البهية الرائعة

[سامى عبدالعال]

الأديب القدير
أحمد الأستاذ
مشرف قسم العامية
مروركم العطر أضاء متصفحي وأثرى قصيدتي
تحياتي ومودتي

[سامى عبدالعال]

أستاذي الشاعر
الطنطاوي الحسيني
حلمي وحلمك لوسهيت
مني ومنك يتسرق
والريح تغرق مركبك
قصدي اللي هي مركبي
ومصيرنا هايكون الغرق.



و هوا دا بيت القصيد
لا وربي اللي خلق
عنه ما يوم ابدا نحيد
احنا اتخلقنا نعزها
لو حد خانها مننا
مش مننا ومش ابنها
ولا عمرو يرضع صدرها
..................................................
مداخلة رائعة
أشكر عليها قصيدتي المتواضعة
والتي استفزت فيكم الشاعر الوطني ابن مصر التي تشرف بكم دائما
فهنا أجدك قد سكبت المشاعر الفياضة بحب الوطن
لك مني كل التحايا والود

[إيمان نور]

السلام عليكم ورحمة الله وبركاته

إبداع وارف شاعرنا الراقي

وما زال الحلم قائم

والامل في الله وحده

والخلاص سيكون بعون الله وإخلاصنا

دام بهاء حرفك استاذنا

تحياتي وتقديري

[نداء غريب صبري]

قصيدة جميلة ومؤثرة
وتستحق التثبيت فعلا

نرجو تثبيتها

بوركتم