البتاعة

[أحمد عطا]

ياللي زوقتوا البتاعه

كل أفعالكم فشوش

خلُّوا بالكم م المـجاعه

كشكشوها متنفشوش

حسُّـوا بالخلق الجواعه

فرقوا بين الوشوش

اللي بيطبل فِـ ساعه

وبعد ساعه متلقهوش

واللي بيبث الإذاعه

و ١٠٠ إشاعه متكفيهوش

يا جماعه مفيش جماعه

شماعاتكو مينفعوش

والغلا أكل القناعه

والضمير بقا في الكروش

سندريلا للبياعه

سندبادنا ميلزموش

والطابور ازداد بشاعه

مين يصد ، ومين يحوش ؟

فين بقينا من الصناعه ؟

قُـوتنا ليه مبنزرعوش ؟

غرقانين ليه في الوضاعه

لو قدرنا منرحموش

فن بيبث الخلاعه

والثقافة بقت رتوش

أسطورتنا في الصياعه

عبده موته مننكروش

والفساد واخد مناعه

والحيا مش في الوشوش

ياللي طالبين الشفاعه

من اوباما وعم بوش

ياللي بتخبوا البضاعه

لاجل ما تلموا القروش

ياللي زورتوا البتاعه

صدقوني متنفعوش

[ناديه محمد الجابي]

جميل ما نثرت هنا من در الحس وندى النفس
الصدق في الكلمات والإحساس المنساب من الأعماق
مطيعة هى لك المفردة لتشكل بها معانيك.
أجدت وأحسنت. :v1::0014:

[سيد يوسف مرسي]

قصة الحال وما ينتاب الناس من هم وصعوبة العيش تحت مبررات خداعة
تطل من نوافذها المسلطة علي الناس لاإسكاتهم وإملاء كثيرا من الأفكار وهما ً
فجاءت حروفكم من فيض الكيل الذي طفح وخرج بعفوية ترتدي ثوب الحق الذي
هي أهلاً له قصيدة رائعة وشجية دام قلمك وروعتك
تقبل مروري وتحياتي

[علي قنديل]

ماشاء الله
و كأنك ترسم بيد الابداع لوحة واقعية
تناولت فيها ما يشغل العقل فى بلدنا الحبيب
راقت لى كلماتك الرائعة
تحياتى لسموك المبدع