ومعايا حكاوي ما تتصدق

[د. أحمد سالم]

ومعايا حكاوي ما تتصدق *** عن شعب حدقدق ومدقدق


عبعاطي راكب صواريخ *** رايح مستشفى المريخ
بيصبع كفته على السيخ *** ويطش الملوخيه ويشهق
بهلول م الجهل بيسترزق


من عشق تواضروس أو بولا *** على فتوة شيخنا أبو عين حوله
بيحضرلكو برسيم كولا *** والشعب بيشرب وينهق
يتكرع وطنية ويحزق

من بعد الثورة يا زعبوله *** وشقانا ف هز الأمبوله
كسرنا ورا الإخوان قله *** والحلم يا ريس أهو اتحقق
في الكوشة عروسه ومتزوق

و أوباما عريسك من غير مهر *** وخليجنا بيدفع تمن العهر
ونسيت الشعب ف حضن القهر *** بيدردع ذل وبيدلدق
و يبرطم مش قادر ينطق

من يوم تفويضك ع الإرهاب *** والعيشه عذاب وسواد وهباب
يا غراب البين واقف ع الباب *** بتفرق نحس وبتبعزق
ومخزن غيره وبتعتق

وفسادك عشش زي زمان *** واهو خلف فقر وضنك كمان
وشبابنا اتشنق ع العمدان *** كفران م العيشه اللي تطهق
وان فكر ف الهجره بيغرق

شغلنا يا ريس شقينا *** وادينا مرتب يكفينا
واللا انت طلعت ابن لذينه *** ف الشعب تقلوظ وتخزوق
دا مرار طافح ونهار أزرق

لوقولنا الرحمه ترد ما فيش *** وكتبت علينا نعيش حرافيش
نخدم ف بيوت ظباط الجيش *** سواق للهانم واتسوق
على كيفها تمرمط وتهزق

وهتلعب لنتخابات تاني *** بساويرس وقضاء علماني
والشعب لو اختار إخواني *** هتهد اللعبة و هتحمرق
واللي يعرضك راح يتبندق

وفاكرني هصدق ألاعيبك *** ما خلاص أنا شوفتك على عيبك
والله يا عتريس ما هسيبك *** وفؤاده لازم تطلق
والعسكر يرجع ع الخندق

[احمد المعطي]

والله يا د. هذه قصيدة موجعة ومبكية ..لله الامر من قبل ومن بعد
وسيعلم الذين ظلموا أي منقلب ينقلبون
نسأل الله المدد والعون لهذا الشعب المطحون.
تحياتي وتقديري

[د. أحمد سالم]

والله يا د. هذه قصيدة موجعة ومبكية ..لله الامر من قبل ومن بعد
وسيعلم الذين ظلموا أي منقلب ينقلبون
نسأل الله المدد والعون لهذا الشعب المطحون.
تحياتي وتقديري

شكرا لمرورك الكريم شاعرنا الفاضل أ / أحمد المعطي
دمت في حفظ الله

[عبدالله يوسف]

صدقت والله
بقينا عايشين في مرار طافح
الله المستعان
قصيدة جميلة أساذنا
تحياتي ليك