" علاء عيسى " واخد على خاطره

الإهداء
هنا القاهرة ...وهناك
باقى البنى أدمين
كأن هُمَّا البشر
واحنا اللى ناس ...
... تانيين
حتى فى سوق الأدب
قسموا البلد ... بلدين
كتابه فى العاصمة ...
... وكتابه فى الأقاليم .
علاء عيسى
نوفمبر 2002

	واحد واخد على خاطره

أنا واخد على خاطرى كتير منك –
مانا منك
ومهما ابعد فى يوم عنك ..
باتوه فى السكه واشتاق لك
بحس بحاجه جوايا بتندهلى
وباسمع لك
وبارجع لك ..
واقول منك
وبحلم إنى بين حضنك
كأنى حته من حضنك
ولّما احزن ..!
بلاقى الحزن جاى ...
...مِّنك
ولّما افرح ..!
بلاقى الفرح دا ...
...مِّنك
خلاصة كل شئ ...
... مِّنك
مَّنا مِّنك ،
وغصبٍ عنى أو عنك
أنا منك
رضيتى ما رضيتيش ..
منك
رضيت ما رضيتشى انا
... منك
عموماً ...
كل شئ قسمه
وقسمة قلبى إنى اشعر وانا فْ حضنك
ببرد شديد
وتدى حضنك الدافى
لقلب الغير
وانا اللى قلبى كان مخلص ماليه الخير
أنا الطيب يا ست الناس
مش الشرير !
أنا الشمعه اللى قادتلك طريقك نور .
وانا اللى وعدى كان ليكى صريح جداً
وكان على نور
وفى الآخر ..
أنا الغلطان !
عشان باوعد وكان وعدى على أدى
أكون غلطان ؟
عشان الصدق كان ردى
أكون غلطان ؟
عشان ما قدرتش ازرعلك جناين كدب
مرويه بأحلى كلام
عشان ما عرفتش ابنيلك قصورجدرانها
م الأوهام
عشان ما رضيتشى أتجمل
ولا اتحمِّل
أشوف الحب متعزب
خيوطه دايبه فى الأحلام
أكون غلطان ؟
عموماً ..
كل شئ قسمه
وانا القسمه ..
أكون عايش قصاد مِّنك أنا الظالم
واكون عايش وحيد واغرق
فى بحر هموم
وانا المظلوم
رفضت انى أشوف الورده دبلانه ...
فْ جناين شوك .
محبتشى تعيش النسمه بردانه
فى ليل ضلمه ونهار مخنوق .
بحق الله أنا المظلوم
بحق الملك والملكوت
أنا المظلوم !
باكون عايش على أرضك ..
واشوف خيرك ...
... واموت محروم !
دانا أصعب قرار عندى ..
أكون عايش بعيد عنك
وأتنفس هوا بايت
ماهوش منك
بعيد عنك ..
أنا عايش كما الميت
بَعِد الساعه بالثانيه عشان تِخلَصْ
باقول للعمر يالله اخلَصْ
ولا بْيخلَصْ
كأن الوقت داينِّى ..
وبادعى انُّه فى يوم يخلَصْ
عشان أخلَصْ
مانا المخلِصْ ..
بدرت الحب حواليكى
جناين ورد بتزهَّر
بيطلع منها ريح المسك
والعنبر
وصفِّتها بشجر أخضر
رفعت الحب فوق منك سما عاليه ...
... وْمَلِتها نجوم
فى وقت الضلمه بتنور
وكنتى انتى الدفا والبرد
وكنتى انتى فْ صلاتى الفرض
وكنتى انتى لقلبى الأرض
بقيتى انتى الوطن ليا .
ومين يقدر يخون وطنه ؟
عموماً ..
كل شئ قسمه
وقسمة قلبى إنى افضل
مجرد كلمه فى حكايه
وقسمة قلبى إنى احزن
وامّوت حزنى جوايا
وجايا تقولى دلوقتى
لولاكى انتى ..
ما كنت فْ يوم هاكون شاعر!
ولا هابقى مابين الناس
أنا الشاعر !
وإيه يعنى ...
مانا منك
وكل كلامىكان ليكى
... وكان منك
هاتيلى حد فى مكانى يشوفك زى ماشفتك
ولا يتوهشى فى لون عينك ويتغرب
ويتعذب
ولا يكتب ؟
عموماً ..
كل شئ قسمه
وقسمة قلبى إنى ابقى قصاد عينك
أنا المذنب ... !
وانا اللى فتحت لك قلبى
وسكنتك
وانا اللى عنيِّه مالِتلك
وعدِّتلك
وعاهدتك بطول العمر إنى اخلص
مانا المخلص
ركبت المركبه بيكى ومقدرتش أكون ريس
لمحت الموجه بتعافر وقصدانا تفرقنا
وبصيت لك ..
لقيت نفسى بقول نفسى أنا الأول
لابد البادى يتحمل
ويومها ..
حْلفت لك إنى هارسيكى
لقيت الموجه بتعافر وقصدانا تغرقنا
رميتك بره مركبتى لأبعد شط
وكان بينى وبينك خط
قطعت الخط بإديه وخدتى قلبى وياكى
وكان قصدى أعديكى
وأفديكى
وكان فى النيه إنى اغرق
وانجيكى
ماكنشى القصد اكون البادى فى عذابك
ياريت السهم كان صابنى ...
...ولا صابك
عموماً ..
كل شئ قسمه
وقسمة قلبى إنى افضل قصاد عينك
أنا الجانى
قوليلى ازاى ..؟
إيديه ازاى تكون قاتله ؟
إيديه دى اللى كانت لك
فى وقت البرد تتنفس هوا بارد
ويطلع صهد فوق إيدك
يسيبنى ويمشى فى وريدك
ويرسم لك حمار خدك
ووقت الحر تتنفس هوا ساخن
وتعرق تلج فوق إيدك
يدوب ويمشى فى وريدك
ويبقى نسمه بتهفهف على شعرك
عموماً ..
كل شئ قسمه
وبالقسمه ..
تكون إيدى قصاد منك ..
إيدين قاتله
وتبقى عيونى قدامك ..
عيون قاسيه
قوليلى ازاى تكون قاسيه ؟
عينيه دى اللى عاشت لك
تشوف الناس فى أوصافك
وأوصافك فى كل الناس
ولا مره وحشها الناس ..
وهى واقفه قدامك
ولا مره فارقتيها ..
وهى شايفه كل الناس
قوليلى ازاى تحس الناس ..
وكنتى انتى البياض والننى ...
وِالْجفن اللى حاويها ؟
قوليلى ازاى تفارقيها ..
وكنتى انتى الشعاع ليها ؟
عموماً ..
كل شئ قسمه
وبالقسمه ..
تكون عينى قصاد مِّنك
عيون قاسيه
ويبقى لسانى قدامك
لسان أخرس
قوليلى ازاى ؟
لسانى ازاى بقى أخرس
لسانى دا اللى كان أول ماكان ينطق ويتعلم
بيتهجى حروف اسمك ؟
وكان بيسمى كل الناس على اسمك !
وفى الآخر أنا الخاين !
وانا الجانى وانا المجرم وانا الظالم !
ياريتنى كنت ...
ماكنتش
ياريت قلبى اللى كان حبك
يكون قاسى ولا يدقش
دانا باسمع تقولى الآه
بتتردد فى قلبى آهات
ولّما القى صراخ بيكى
بيتحول فى ثانيه سكات
وفى الأخر..
أنا اللى خلفت لك ظنك ؟
أنا اللى عاش بعيد عنك ...
...وانا منك !
عموماً ...
كل شئ قسمه
وقسمة قلبى إنى اْخلِصْ ..
ولاتحبش
وأقول حبى قليل جداً
ولا يكفَّى
وبارهن كل أيامى فدا ليكى
وأقول العمر مايكفَّى
وفى الآخر ..
باعيش فيكى كما المنفى !
وباتغرب بعيد عنك
وانا الأقرب قريب منك
عموماً ...
كل شئ قسمه
وبالقسمه..
أكون مذنب ...
... واكون البادى فى عذابك !
وكل الناس تسامحيهم
وانا الواقف على بابك
عموماً ...
كل شئ قسمه
وقسمة قلبى إنى ابقى
مجرد ذكرى ع الهامش
وصفحه سودا فى كتابك !

وكنتى انتى فْ صلاتى الفرض
وكنتى انتى لقلبى الأرض

\

أبى خلق الدنيا حبيبا" تديمه ... فما طلبي منها حبيبا" ترده


\

شكرا" لهذا الابداع

	واحد واخد على خاطره

!

بتاخد ليه على خاطرك
مين الى قال دى مش ارضك؟
مين الى قال دى مش منك؟
لانك حتة من كبد النبات والارض
لانك كنت شايلها ف صلاتك فرض
لانك قلبها الاخضر
على توبها بتتمخطر
هتبقى انت ف الاول
وف الاخر
اوعاك ع الجنب تتاخر
وتاخد جنب
بعادك عنها راح يبقى دا اكبر ذنب

تحياتى لك يامبدع

ياااااااااااااااااااااااا ااه
كانت حلوة من البداية
ولما خلصت ما تمنيت انها النهاية
رجعت قريتها من تاني
ووصلت بردوا للنهاية

رائعة جدا وفيها احساس رائع بحب الارض والوطن

تحية لك اخي علاء عيسى

احتراماتي

ميـــــــــــنا

الأخ الأديب / علاء عيسى ..

وإبداع جديد أيها الشاعر المتألق .

عموماً ...
كل شئ قسمه
وقسمة قلبى إنى ابقى
مجرد ذكرى ع الهامش
وصفحه سودا فى كتابك
هكذا نحن دوما ،،، كعين عذارى ....

أغنية شجية في حب الوطن ،،، ورغم الحزن ،،، رااااااائعة .

دمت مبدعا متألقا ..
أقبل مروري .....

دخــون .

كده يا صاحبي صار شعرك
مقامه فوق بينده لك
وبيقول لك هناك..:
شبيك
أنا خادم علاء الدين
أنا خادم علاء عيسى
وأمري كله ملك إديك

سلامة يا صاحبي ع الماشي
ولاجل حلاوة الكلمات أنا علقت ع الماشي

بجد يا صاحبي تستاهل
تكون شاعر
ولا تنفع تكون يا صاحبي غير شاعر
دي روحك في السما طايرة
وقولك بالحروف ساحر
ومهما الدنيا دي دايرة
أنا لكلامك المعزوف على وتر العروض شاكر

من يطاول هذا الإبداع
السهل الممتنع من الرائع " علاء عيسى "
نبيل مصيلحي

فعلاً رائعة من روائع ... علاء عيسى التى عهدنا قراءتها

عندما أقرأ الاسم أعلم أننى سوف أقرأ ابداعاً من قلب وقلم علاء الشاعر

حقاً جميلة جداً

تقولى أنسى بس ازاى

وحبى ليك ده العنوان

أعشق غيرك

بس ازاى

واسيب فى عينيك الأحزان

دانت يا بلدى

حبى الأول

جوا النينى والوجدان

ترابك ده البستان

ونهرك الأوطان

ونسمة هواك

تغنى الألحان

وحبك الأمل والأحلام

فى عينيك يا أرضى العنوان


مشاركة على قد حالها من أختك منى

دمت شامخ الحرف والمعنى

الجميل علاء عيسى
بقولك ايه
ماتنساها ... ماتستناش
ولو كانت بتوحش غنوتك آهه
ولايهمك ..
رح اصرفلك سنين ببلاش !!!
أخوك حلمى عمر

وكنتى انتى فْ صلاتى الفرض
وكنتى انتى لقلبى الأرض

\

أبى خلق الدنيا حبيبا" تديمه ... فما طلبي منها حبيبا" ترده


\

شكرا" لهذا الابداع

	الأخ الأكبر الأستاذ / خليل حلاوجى مرورك على سطور عملى أعطى له جواز مرور أرجو أن لا تحرمنى من طلتك التى أنتظرها على الدوام شكراً لكم