بكل فخر أقدم من روائع الصديق المبدع ... الشاعر غانم الفياض
لقراء الواحة الافاضل
كما أكرردعوتي له للأنضمام الى واحتنا
\\\\\\\\\\\\\\\\\\\\\\\
ما بـــيه
.......................
ما بيه
قلب للشوك ... ما بيه
احن .. واتلهف واشتاك ما بيه
ولا بيه اصافح من جديد اجفوف
باعت واشترت بيه
صح ...
ماكو مثلكم نفس يحيي الروح
بس مثلي لهواكم ..... ما تصح ريه
وجــــه
......................
وجهي يشبه
كل رصيف اتبيعة خطوات الدرب
الدنية مجنونة ...
وتعب روحي لهب
انا . طبعي اوي الحزن ... ما عندي باب
منين ما رايد ..................
يطب
ليـــش
.........................
ليش
من كتلك كبل هذا الدرب
ما صدكتني
وليش من كتلك بساتين البروحي
اتريد فـــّيك ..... عاندتني
وليش .. من كتلك
تعال انصير للدنيه ورد ..ما طاوعتني
ولــيش
من بعت الاحبهم ..... واشتريتك
انته اول ما حجوا عني ...... بعتــني
صديـــق
...................
صديق !!!!
اشلون اكدر ارهم وياج
وانتي اشلون احســّــنج صديقه
وَهم كل الوجوه العاشت وياي
بس .... وجهج احسـّـنة حقيقه
تمر بية الدقايق جانت اسنين
وهسة اسنين .. تنقاس ابدقيقه
حديقة الدنية صح ........
بس انتي الاورود
وبلاية اورود ...... ما تسوة الحديقه
حــدس
........................
ادريبك علية اتدور
من اتدور .. دنياي
ومثلهم .. تنكلب ضدي
عفت شمسي وضواها .. ورحت تشري اشموع
يا شمعة التـــّــنور دربك ابكدي
يشايلني .
اعلة جفك ماي
صار اسنين
لا انته اشربتني ..
ولا ............ انا ... متبدي
جرحي بيت
....................
جرحي بيت ...... وآخي باب
وجه شايل من ملامح عمري
بس طعم العذاب
خد عليه ادموع حزني امطرزات
اوخـضّر ابروحي العطش
بالوحشة .... ناب
لا تحاسبني اذا طال الغياب
ولا تعاتبني ..
وتحط فوك الجرح .. ملح العتاب
جان كل الماي بيدي
بس ... جفيت الماي ...
من شفت الســــــراب
قــبل
....................
قبل جانت اعيونك تشبه اعيوني
وقبل حتى الطيوف العاشرت جفنك
نفسهه امعاشرة اجفوني
وقبل واحد حملنه .. ومو مهم لو جان
ينشال اعلة متنك
لو على امتوني
ابدونك .. ما اعيش
ولا تظن هيهات ..
مدري اشلون حي
وعايش ابدوني
فــــرق
..................
الكل سجين ايموت باسوار السجن
والموت بالعزة ..........ولادة
الموت بالغربة شهادة
الكل سجين ايصيرله اتراب السجن
اترف وسادة
الكل ظهر ما روض الجلاد اصراره وعناده
للنخل ... للماي .....لتراب العراق
وكل عراقي .... يعشك اتراب الوطن
حد العبادة
والفرق كلش جبير
ابين واحد مات .. من اجل العراق
وبين واحد عايش ....... وخاين بلاده