الدنيا لابسه في ابتسامتها ملامح شرنقة
يا قايده ف عيون المسا
يا غنوة طارحة أرضها حب وسلام
ونهار بيضحك زي ضحكة طفل بيلاعبه أبوه
روحك يا روحي في مزروعة وطارحة بالسنابل
مزجة ملامحك في ملامحي
بكر صافية
وصوت حنانك في مشاعري الخضرا سايل
افتحي لي ورد عينك
أستحمى في عيونك
أشرب الحب اللي سارح في مداهم
أكتسي من زرقة النني
وأحلم
باحلم تضلل فوقنا جميزة ملامحك
وتْنبّت الحبة اللي عايشة ف دمنا من حب قمحك
باحلم يا غالية
بس صوتي مش مساعد
ممدوده إيدي
..
بس مش لاقية سواعد
باحلم..
وبيعذب مشاعري العاجزة (يا أم الضحى)
سحبة إديكي الهادية فوق شعري اليتيم
(2)
- آسف أنا راجع
طريقك شوك طالني
.. الحب غنوة بتتزرع، لكن بلادنا أرضها حمرا
ولا يمكن هتولد غنوتك
آسف
- وماشي!!
(3)
وغضبت يا غالية عليّه
ونهارك النعسان على جفونك
جفا صورتي وخاصم ليل عنيه
(4) ورجعت يا أمي وفي إديا قرابين المحبة
وف عنيّ وردتين مترهبنين في الحزن والموت بيقولولك:
"حنة بق ..
دي الدنيا لابسه في ابتسامتها
ملامح شرنقة
والضعف في قلبي صبي
والسكة نار والعة على جفوني
ونجمة
م السما محروقة
فوق أعتاب قصيدتي
ولهجة صعبة كانها هربانه
من جفنين إله فرعوني في حتة بعيدة
بعيدة عن غيطنا لقوه مقطعينه
وف عيونه
ابتسامة الحلم إنسانة
وعريانة
ومرمية على حافة بحيرة دم
وناب سكينة لابس غول
بيوصل بين عنيها وبين تماويج البحيرة
اللي بتولد عشبة الموت على عيونك
يا قايدة في عيون الليل سراج عربي.."
.........................
..............
ابتسمتي لي
وبوستيني على قورتي
وقولتي لي: "يا إبني اوعاك أشوف الحزن
بيدبل عنيك الوردتين دولا..."
ومشيتي إدينك دول على كتفي
وفوق راسي
وبسملتي ورتلت المعوذتين
وقولتي لي: "يا إبني اوعاك أشوف الحزن بيدبل عنيك الوردتين دولا"
ابتسمتي لي
ساعتها بكيت على إديكي
فطلعت من إديكي دمعتي زهرة
بتشبه زهرة تعبانة، تملّى أشوفها
يا أمي إذا تْعبنا بتصرخ جوه ف عنيكي
ساعتها بكيت، وخوف رفرف على وشي
وقلت يا أمي: "انا شاعر..
صحيح شاعر..
ولكن..
قلت: "يا إبني
أنا أمك
وعارفة إن فيك أنهار من العزة
فيا ولدي الجبال ما تهدها هزة "
ساعتها يا أمي حسيت اني زي الريح
بيكسرها شموخ النخل
لكن هيّ رايحة تْكرر اللعبة
عشان تكسر شموخ النخل
تسرق من جدايله
كل ما تقدر
ومزروع في ابتسامتها
أمل وعْناد صبي
فطيت ساعتها فوق حصان عربي انطلق
من جزء "عمّ" زي فيْضان الفراعنة
يْغير ويقدح صخرة الخوف في جبين الجو
فيزرع في الغبار ناره
وأأمر من فوقيه حرس الليالي الميتة
فينفذوا من تو قولي مطلبي
رايح أنادي في الخلايق يا بلادي
"إنت غنوة.. أيوه .. ممكن تتزرع في أي أرض
(الأخير)
- الله على نور فرحتك
وجناين الورد اللي ضحكت في فراديس ضحكتك
- شايف يا روحي
لما صار كفك لجام
الناس بتتنفس صوابعهم
برغبة حنينة ليه
وشايف
يا حبيبي
عْيونهم اخضرت
ومنها بتتولد شهقة نبي
رد مع اقتباس
المشاركة الأصلية كتبت بواسطة على سالم الصالحي
