شجرة جميز.... اهداء لولدى العزيز
شجرة جميز....!
على شط الحياه واقفه
بتبصلى بلهفه
ضاربه فى قلبى جدرها
بتمدنى بحبها
سر الحياه ف قلبها
وانا ليها اول ضنا
مده فروعها للسما
متشبكه فوقى
فرع المحبه بيمد ف عروقى
يحمينى ضل فرعها
من حر ايامى
والصهد من شوقى
يمسح وراقها دمع احزانى
لاعمرى شفتها ملت
ولا عمرى شفتها مالت
مهما ان يعدى الزمن
لاعمرها كلت
ولاعمرها خانت
شايله الزمن على ضهرها
ولا ريحه عمره هزها
لاشفتك مرة سلمتى
ولامرة بعتى
مقدرش برد الشتا...
يوقع اوراقك
ولا يجنى اشواقك
ولا يحصد طرحتك منك
زعابيب الزمن دايما تميلك
زرعتى الضى فى ملامحى
محيتى الامى من جرحى
نبت فرحى
لقيت الاهه فى قلبى
جناين ورد
حاضنها الود
حمام طاير ف جنه حب
عيون الضلمه دبلانه
وندمانه
وانا نادى ف عين بكره
ولما مر صبارى
بيرويلك جبال حزنك
ماتنهزمى
ولما الصورة تجمعنا على مرايا
تصبى الدمعه ضحكايا
بترقينى بكام ايه
تزيل الحزن جوايا
وتبقى شمسى فى دربى
تدوب تلجى فى قلبى
تلفلفنى بنسيج حبك
وتحمينى من الغربة
وم التوهه
والاقى بسمتك ف الليل
قمر فارد شعاعه دليل