حلمنا الوردى

وتتشابك أيادينا ..
ينبت حلمنا الوردى
على سور الأمل خايف...
لكن شايف
أكيد إنك صحيح دارسة
كتاب العشق بالكلمة
على السبورة والتختة ..
يدوب اسمك ..معاه اسمى ..
وليه رسمى ..
تملى يكون ..
ملامح وشك الخمرى ..
وليه باسكر
وعقلى يغيب عن الدنيا ..
بنظرة منى لعنيكى ؟
سواد الليل .. دانن العين
وعين الخلق
حاسدنى
على إنى بقيت منك ..
وقلبك ليا أنا لوحدى
بعسلك يمتزج شهدى..
واحساسى بإن الكون
على أدى ..أنا وأنتى ..
وتتشابك أيادينا ..
ينبت حلمنا الوردى ..
على سور الأمل حالف ..
بحبك كل يوم
أكتر من الأول بميت مرة ..
أنا دايب ف تكوينك ..
أنا الذرة ..
أنا عطارد أنا المريخ أنا الزهرة ..
يا كوكب حب جوه القلب متدارى ..
وبالقوة عشان يرجع
يدور من تانى فى مدارى
أنا جايلك .. تضمينى ..
خدينى ف حضنك الدافى
ولجل ما يقوى مجدافى ..
تكونى لى ..
وتبقى بحرى مع نيلى ..
ونتلاقى مع القسمة ..
تملى قلوبنا مبتسمة ..
ونزرع حب جوانا ..
ونحضن شط مرسانا ..
قرينا الفاتحة أنا وأنتى
ولجل ما تلبسى الطرحة ..
يا ريت ترجع مع الفرحة
وتتشابك أيادينا ..
ينبت حلمنا الوردى ..
على سور الأمل عارف ..
منيش خايف ..
مادمتى عايشة بهواكى معايا
وقلبك الحانى ...
أسمعلك غناويا وألحانى ..
وعنوانى يكون انتى ..
يا نبض القلب والنشوى
ياحبى الغالى والنجوى.....
وتتشابك أيادينا ..
ينبت حلمنا الوردى
على سور الأمل
مشتاق
مشتاق
لحلمنا الوردى

المبدع محمد...

استحضار جميل لمكونات التكوين وتسخريها من اجل رسالة واضحة المعالم والهدف..

دمت بهذا الالق

محبتي لك
جوتيار

الى كل من شارك بالمشاهدة أو بالرد أو التعليق على أى من قصائدى المتواضعة
شكرا جزيلا وأنا أسف جدا لأنى مقل فى الردود وجزاكم الله كل الخير ووفقنا واياكم لما فيه الخير والسداد
محمد صبحى ......... أبو مهنــــــــــد

أخي محمد صبحي
كل عام وانت بخير
.......
وتتشابك أيادينا ..
ينبت حلمنا الوردى
.....
بدايه جميله لنص اجمل
تحياتي