مد ايدك
شد ايدي
احضن جدار وريدي
هاتلقي امل كسلان
وحلم كسيح تعبان
وجرح منقوش بدم
والختم حبيب وخان ؟؟؟
هز الامل
فوقه
وقف الحلم
اسنده
وقول للجرح بلهجة قاسيه
وهدده
ان مكانش هايطيب
هامد ايدي لجرح تاني
لحب تاني
وازوده
وبين دروب الاهة دور معايا
عن واحد كان معايا من البدايه وفجأه اختفا
يكنش اختفا ؟؟
اصل اسمه الصبر
وحكومة العَجلة مطرداه
هوا وعيل اهبل
اسمه الوفا
وزقني
زقني يمكن الحق الثانيه واسالها
هيه ليه مستهبله ؟؟؟
وعماله تجري وتهرب
كل ما احاول منها اقرب
تكنش مستعجله ؟؟
وعايزه تلحق الدقِيقة ؟؟
بس حتا لو كانت دَقيقة
مش هاتوصل الا في المٌغادرة !!!!!
ومهما تجرى
وتحاول تحصل في بٌكره
هاتلقي الزمن
والساعه
والدنيا ساكنه في بعد بٌكره
وبٌكره يجيب في بٌكره
ومش هانخلص من ديه البَكَره
الا لو مسكنا الخيط من اوله
وحاولنا بكل قوة ندلدله
في بير اللي راح
يمكن تشبط فيه حاجه من اللي جاي
توصلنا لنهاية البَكَرَه
قصدى
لبداية بٌكره
ونكمله
وانده علي اللي ماشي فوق رصيف القلب
بيقزقز حب وتسالي
وقوله ينده علي الكلمه
ما يخليهاش تهرب
يحايلها
ويقولها تعالي
وان ما ردتش تيجي مش مشكله
يعني كانت هاتبي ايه
غير حلم
او وهم
والحلم شفقو علينا منه
وقتلوه
وسابولنا الوهم يقتلنا
دا حتا الخوف اللي كان بيسكنا
طمع فينا
ونفسه يطردنا
يا اما ؟؟
نسكنه
مد ايدك
اتحرك
ولا انتا كمان باقيت كسلان والقاعده جنب الهرم عجباك ؟؟؟
زوقنا
ولا انت مش مننا
اعصر ترابك ومن بين حجارتك طلع ريحة السنين
واندهلهاااااااااااااا
انده لست الحسن
اللي ساكنة عينك ومتلفحة بالأنين
وان ما ردتضش تيجي
ادفني وياها
يمكن تطلع معايا لما تسمعني في عنيها باقول اشعار
ياللي النسيم عاشق لعينك
وعينك عاشقه للمرار
مين اللي اسمه فوق جبينك ؟؟؟
ولا انتي عشاقك كٌتار
مين السبب في نزيف سنينك ؟؟
ولا النزيف سببه انتحار
مش انتي برضه اسمك ابية ؟؟؟
طب راضيه ليه بالانكسار ؟؟؟
جابويني يالا وانفضي
عن جبينك كوم الغبار
واقفي ويايا وشدي حيلي
واقفي ويانا وشدي حيلنا
رجعه من تاني التتار
رجعه من تاني التتار