لإمتى
لإمتى هتبعدى عنى
يا وردة رويتها بدموعي
ساعات ببعد ولكني...
باهمّ لبعدى برجوعى
ما انا الغرقان فى بحر الشوق
بتلعب بيّا أمواجه
ياريتنى معاكى أبقى شروق
ضيا ... وعنيكى تحتاجه
ونبقى الغنوة والموال
وبينا الشوق يكون رحال
يا شمعه قايده فى ضلوعى
زمان كان ليا مركبتى
وكانت مركبى طوعى
لكن البعد موتنى
وكسّر عزمى وشروعى
فكيف أوصل أنا لبرك
وانا غرقان فى بحر الموت
يا إما تمدى لى جسرك
يا إما أموت
بخاف أحلم
ولكنى ساعات باحلم
بإنك شمس
أمد إيديا ما تطولك
يا نسمه فى ربوع الهمس
يا ريتهم كانوا يحكولك
عليا زمان
تلاقى عينيا بتقابلك
فى كل مكان
وتهمس لك
ما تيجى تعيشى فـ ربوعى
يا ورده رويتها بدموعى
لإمتى هتبعدى عنى؟!!
شعر: حسن صلاح حسن