ألف مبروك ..... كسبت يافندم !!!

دخلت بسيارتى الى محطة بنزين ، فور توقفى أمام عامل المحطة هجم على سيارتى شاب وفتاة
صاح الشاب كمن وجد كنوز سليمان
..... مبرووووووك ألف ألف ألف مبروك يافندم ، تكسب معانا، سعادتك محظوظ اخر رقمين فى لوحة السيارة يقبلوا القسمة على ثلاثة
..... بجد ؟ ربنا يبشرك بالخير
..... إحنا بقالنا إسبوع منتظرين حد يكسب
.... أول مره أكون محظوظ
..... طيب إركن السيارة و إتفضلوا علشان إستلام الجائزة
.... هبطت من السيارة ليحتضننى الشاب مهنئا بينما إنهالت الفتاة _ ذات الملابس الساخنة والقوام الملئ بالمتفجرات _ بالقبلات على الأولاد وحملت الولد الصغير وأخذت تلاعبه ، كدت أعترض فأنا صاحب السيارة وجميع المميزات من حقى ولكن تذكرت وجود حرمنا المصون فطأطأت رأسى متحسرا على ضياع أهم مافى الجائزة
استأذن الشاب للحظة ، ووجدته يهجم على صاحب سيارة أخرى صائحا
..... مبرووووووك ألف ألف ألف مبروك يافندم تكسب معانا ، سعادتك محظوظ أول رقمين فى لوحة السيارة يقبلوا القسمة على خمسة
( غريبة إيه الصدف دى.. إثنين يكسبوا فى خمس دقائق الظاهر إنى وش السعد )
تدخلت الفتاة لتطلب منى _ بدلال _ التوجه برفقتها الى مكتب صغير ملحق بالمحطة لتسلمنى الجائزة
( صباحنا فل )
إلتفت إلى الأولاد وبابتسامة عريضة قلت
.... خليكم هنا يا أولاد أنا حستلم الجائزة وأجيب أيس كريم و أرجع
صرخ القرود
....لااااااااااااااااااااء حنيجى معاك مش حنسيبك
( مافيش فايده )
إصطحبتنى الفتاة الى مكتب وجدت به عددا من الفتيات وامام كل واحدة منهن شخص يبدو أنه بصدد إستلام جائزة !!!!
قالت الفتاة
.... إتفضل إستريح
جلست
أحضرت صندوقا متوسط الحجم من المخمل الأحمر يزدان بقلوب صغيرة وفتحت الصندوق و أخرجت الجائزة
ماهذا !!!! الجائزة عبارة عن صابونة سعرها نصف ملطوش فى كل مكان !!!!!
صحت بحنق
.... إيه ده!!! حضراتكم عاملين فرح والأخ العرقان ده عمال يبوس ويحضن فيه لما قرفنى علشان تدونى صابونه
.... هئ هئ هئ لا يافندم دى الجائزة الرمزية... الجائزة الكبيرة هى إقامة مجانية لمدة ثلاثة أيام فى قريتنا السياحية الجديده ( زورونى كل سنه مره) على أجمل شاطئ فى العالم
.... أهو كده الكلام وحضرتك حتكونى معانا
.... هئ هئ هئ إحتمال ، المهم حضرتك توقع على الإستمارة دى وتكتب بياناتك وعدد المرافقين ونأخذ من حضرتك 50 ملطوش تأمين بس لضمان الجديه وحضرتك حتستردهم أول ما تحضر الحفله النهارده
.... حفلة إيه؟
.... حفله النهارده فى فندق ( خلينا نشوفكم ) فى قاعة ( إبقى قابلنى ) الساعة 9 مساءً ، لازم تشرفنا علشان تعرف مواعيد الرحلة
.... أوكيه بس أمانة ياريت تكونى موجوده أصل أنا معرفش حد هناك يا ........ هو إسم حضرتك إيه
.... هئ هئ هئ هئ هئ ... مونيكا ... وحستناك النهارده
( ياسيدى ياسيدى يمسى ايامك بالخير يا كلينتون )
عدت الى السيارة ملوحا لزوجتى بالصابونة ورويت لها القصة _ حاذفا مايتعلق بالفتاة _ لكن أصغر القرود صرخ
.... والبنت اللى ريحتها حلوه قالت لبابا إنها حتستناه هناك
....
...
..
.
فى المساء توجهت إلى الحفل_ مصطحبا أفراد الحرس الثورى_(حسب أوامر القيادة )
دخلت الى القاعة ليستقبلنى شاب مهندم قائلا
.... أهلا وسهلا تحب حضرتك تتفرج على رسم للقرية وتختار الشاليه المناسب
.... الحقيقة أنا محرج منكم جدا معقول كل ده علشان أخر رقمين يقبلوا القسمة على ثلاثه ، دا كثير والله ، ياسيدى أى شاليه كله من إيديكم كويس
.... ههههه أيوه بس لازم حضرتك تختار المساحة والموقع المناسبين لميزانيتك
.... ميزانية إيه .... هو مش الثلاث أيام مجانا !!!
.... أيوه مجانا بس بعد حضرتك ما تشترى شاليه وعلى فكرة ده سعره مخفض 30% علشان حضرتك كسبت معانا يعنى سعر الشاليه المتوسط على البحر حيكون 215000 ملطوش بس وتسددهم بالتقسيط عل سنتين
.... نعممممممم !!!! بس أنا مش عايز أشترى شاليهات
.... صدقنى دى فرصة دا نفس الشاليه بعناه ب 300000 من شهرين
.... ياسيدى مش عايز أنا حأخذ الثلاث أيام وبس
تغير وجهه فجـأة وزم شفتيه إستحقارا وقال
.... للأسف الشراء شرط أساسى للتمتع بالثلاثة أيام
.... طيب خلاص مش عايز رجعوا لى فلوس التأمين
.... أيوه طبعا حضرتك تستلمهم من مقر الشركة الرئيسى من قسم الحسابات
.... وهو فين مقر الشركة ده
.... قريب خالص ... فى إيطاليا حضرتك
.... نعم ياخويا إنتم نصابين و أنا حوديكم فى داهيه
.... لأ لأ لأ إوعى تغلط ... إرجع لصورة الإستمارة حتلاقى مكتوب إن الإسترداد من المكتب الرئيسى ، ومكتوب فى أخر الإستمارة عنوان المقر الرئيسى فى روما وتقدر حضرتك تروح هناك وتتأكد بنفسك وحتأخذ فلوسك بالكامل

خرجت من الفندق أجرجر هزيمتى
تبخرت أحلام الأجازة الجميلة مع مونيكا ، ولم يبق لى سوى ...... الصابونه

ههههههههههههههههه

ههههههههههههه

جميـل أنهم لم يأخذوا الصابونة منك أيضا ً

أسـعدكَ الله يامصراوي

تحياتي لك ..

أخى الكريم متذوق
وأسعد الله أوقاتك
تحياتى وإحترامى

يا أخي مش كنت تصفي نيتك قليلاً وبلاش مونيكا ومتفجراتها؟!!

سبحان الله ... الناس ما تعتبرش من مصايب كلينتون.

على كل حال الصابونة مش وحشة بس حاسب عليها ... دي تمنها خمسين ملطوش عداً ونصباً.

كم يوقع الطمع أهله في حبائل النصب والاحتيال؟!


أشكر لك أخي مصراوي هذا الأسلوب السردي الشيق.


تحياتي وودي

على الأقل أخي مصراوي الصابونه دي ليها ذكرى حلوه

أنا لو منك أستحمى بيها كل يوم لحد ما خلصها وأروح آخذ واحد تانيه " واحد عيونه زايغه "

الأخ الفاضل

مصراوي
تحية بعبق الفل والرياحين

هذا هو فن التسوق ..!

كن بخير

أشتاقنا لكم أيها العزيز

تقبل أجمل التحايا

كل عام وأنتم بخير