غنوة ما لهاش صدى
*******
1
لموا ضفاير غنوتى
من فوق السطوح
ماتخلوهاش مفرودة
في وش العصارى
خلوها تسكن كهفها
وتنحبس داخل جداري
خايف عليها تموت
من غير ما قلب يضمها
وألقى الديابة كلهم
واقفين بياخدوا في العزا
يشهدوا ساعة انكساري
2
لما الغراب
يا خد مكان العندليب
وأما الغنا
يصبح نشيد
من غير وتر
والحرف يبقى على الطريق
ملهوش أثر
والليل يصاحب خطوتة
من غير قمر
ولا هدمة تستر جتتة
ولا تحمى جسمة من الخطر
ولا فيش مشاعر تحضنة
وقت السفر
ولا فيش لقا
ولا فيش وداع
يبقى حرام
اللحن يفضل للأبد
يخبط دماغة في الحجر
3
لما الغيطان
وقت الحصاد
ماتعرفش المواسم
ولا كفها يملا المناجل
والعود مايطرحش الثمر
وأما السواقي
تهجر عناوين المساقى
والتلاقى يحتضر
وأما الكافور ينسى الكفور
ويطاطى للريح الهفية
والضل يتحدى الشجر
يبقى على الدنيا السلام
4
لما المسائل كلها
تصبح سراب
والأسئلة ملهاش جواب
والمسطرة والمنقلة
ينسوا قوانين الحساب
يبقى مانيش محتاج مكان
*******
كلمات
ملك الحروف
عضو اتحاد كتاب مصر