قصيدة من الأرشيف
كتبتها غاضبة ذات يوم من شخص في أحد المنتديات طلب نقدا وعندما نبهه الأعضاء للخلل في قصيدته ثار وغضب متهما إياهم بالعنجهية والانحياز لبعضهم ، وكان هذا دأبه حتى مل منه الأعضاء ولم يعودوا يردون عليه فثار أيضا لأن أحدا من كبار الشعراء لا يعقب عليه وإنما الجدد والمبتدئين فقط
أؤمن بأنه ليس عيبا أن نخطيء
الخطأ محطة للتعلم
لا عيب أن نحاول
من المحاولة نخطو أول خطوة نحو الهدف
فقط نحتاج للرغبة
والإرادة
والتواضع للعلم والعلماء
أما التكبر والغرور فهما نهاية البداية
من زمان أسمع يقولوا عنك شاعر
تكتب حـْروف الذهب بالحس
وتعبي من احساسك دفاتـر
من زمان اسمع يقولوا إنْ اصابيعـك
إليمن جت تخط ابيات
باوراق الشعرترسم
بدل الأبيات
أروعها مشاعر
:
من زمان اسمع اذا قلت القصيد
تـِرهَـف الآذان لك بالسمع
ويفلّ الحديد
والدفا بصوتك يـِذ َوب الثلج
ويرخـّي لك القاسي العنيد
والمحبة تـنـتـعـش بـقـلوب فيها الحب
عوانه مسافـر
:
واسمع بـْدال الحبر دمك تعـبــيـه بالقلم
واسمع انّ الجرح من بلسم شفاهـك يـلـتـئـم
واسمع انْ همسك مثل هـبهاب طيفْ
أو سحابة مطر في وهجة الصيف
نخلة في واحة اذا يقصدها ضيف
أو حـِصـِـن بـَهْ يلتجي الملهوف من جلّ المخاطر
:
هو صحيح انّ انت شاعر؟؟؟؟
والا تـتـشـيـعـر؟؟
وتـتـصنع شعر؟؟
هو صحيح انّ انت شاعر
والا ما عندك فكـر
هل تظن إنّ بخرابـيـشـك علينا
تـْـلفْ !!
تِـدور!!
تعتـقـد إنّ الشخابـيـط اللي تكتبها
جوازك للعبور
صدّق انك واهم وغفلان
ماخذك الغرور
وِبـْـغرورك صار الك ياويح قلبي
للشـِعـِر قاموس
بـَهْ أفكار مغلوطة
وبفن السخافة دروس
كالبالون
ماغير الهوا متروس
وبدبوس
آه ياقلبي وبدبوس
ضاعت هيبة البالون
والخلان لو يدرون
آه ياليت لو يدرون
كان تــْـهون
تدري!!!
أنصَحـِك إبعد بعيد وْلا تغامر
:
أنصحك واسمعني وآنا اختك يخلْ
الشـِعـِر ماهو كلام بـْلا فـِعـِـل
الشـِعـِر إحساس ماهو مفتعل
الشـِعـِر يا صاحبي ماهو حروف
الـشـِـعِـرماهو قصايد بالألوف
الشـِعـِـر فرحة وْحـِزِن
الشـِعـِر خوف
الشـِعـِر وانت مْغمض !! بـَهْ تشوف
وْ تِـكتشف أسرار غاصت بالمحاجــر
:
الشعر ماهو بضاعة مْـكدسة (ف) سوق الحراج
الشـِعـِر ياشاعري مو بيت مبني من زجاج
الشـِعـِر قلعة حصينة محصـّـنة بأقوى رِتـَاج
الشـِعـِر ياصاحبي ميدان
ينزل ساحته الفرسان
هذا بـْلامته مجـهـّز
وذاك من العطش ذبلان
حسرة مضيع دروبه
تايه ما إله عنوان
والشـّمْس بـْضياها فرّقت غيمه
وْصارت للحقيقة لـْسان
يا غفلان
ياغفلان
من حلمك توعىّّ وعيش واقع
عيش حاضر
:
الشـِـعـِر ماهو كلام(ن) تنثره فوق السطور
تتضح فيه الركاكة ( الله يكافي )
الشـِعـِر ميزان
وْ تـفـعـيـلــة
وْ قـوافـي
وانتَ حافي
وش يـِفـَهـْمـِك بالعلل ؟؟
وش يـِفـَهـْمـِك بالزّحـافِ ؟؟
وش يـِـفــهـْمك بالضرورات اللي منها
تقدر تخالف قواعد ؟؟
وْليه اذا جا ينقِدك فاهم ويعلـْمـِك
له تبربر؟؟
له تعاند؟؟
تبغى تـتـفـلـسـف ؟؟
تشـد الحبــِل جامـد
ليه تحس نفسك بْــقدامه صغيـر ؟
ليه تـِحـِب تـْخالف العـقـْـل وْ تخالـف للضميـر ؟
ما تبي تِـشـكِــر؟
أجـل خلـّك محايــد
ماهي أخلاق الـشـِعـِـر والشاعـرانّ انت تكابــر
صدّق انك تنتهي
صّق انك تنتهي
صدّق انك تنتهي
أول
وْ آخر
وسلامتكم