شوية حاجات

شوية حاجات
نصوص قصيرة

بتعرف تغني ؟
وعارف وحافظ طقوس التمني ؟
بتحلم وتحزن وتضحك ساعات ؟
متكدبش وتقول
بتحزن وبس

________

إيمانك ملازمك وراصد آمالك ؟
وقادر من الصبر تفتل حبالك ؟
تحاصرك مخاوفك يقل امتثالك
وقادر تقاوم وتطلع لفوق ؟
هتوصل أكيد
دي النجوم مشتقالك

_______

لو اعوَجّ حالك وساءت حياتك
وحسيت بإن الهنا كله فاتك
بتحزن وتيأس وتنسى إنك انت
غفلت عن الذكر
ونسيت صلاتك

_______

عرفت البكا طعمه إيه ف الليالي ؟
ودقت الخشوع ف السجود المثالي ؟
ولما على الروح بيشتد كربك
بتهتف أكيد ربي هيحلها لي ؟
يقينك نجاتك وسكة وصولك
طريقك صحيح
كمِّله للمعالي

_______

شوية حاجات جوَّا روحك بتنبح ؟
ولما بتضعف بتسمعها أوضح ؟
حاجات منها خوفك ويأسك وهمّك
حاجات لو تسيبها هتنهش ف حلمك ؟
حابسها وخايف ف يوم ضعف تقدر
تعدّي حدودها وف القلب ترمح ؟
مخاوفك حقيقة وعزمك أحق
هَتهْلَك مهالكك
بسيف اسمه "لأ"

_______

ظنونك سعيرك ؟
وخايف من الشك ينزف ضميرك ؟
خلاصك نجاتك سعادتك تهمك ؟
وخايف على النار يحَوِّد مصيرك ؟
سؤالك ملازمك
بينخر ف عزمك ؟
وخايف تقوله لتكفر بدينك
وخايف تسيبه يبدد يقينك ؟
طب اسمع إجابة سؤالك سؤال
معمركش يوم دقت طعم المعيَّة
وحسيت كأنه هناك ف الغيوب
متشالالك هدية
وكان لما تبقي المشاكل طوفان
تحس الخلاص جيّ بعد البلية
منين الأمل جيّ غير م اللي قادر
يقلِّب قلوبنا
ويغفر ذنوبنا
وينعم ف عزّ الكروب بالعطية

مااااااااااشااااااااااااا اء الله عليك

جميل الابداع والرقي
الي الامام يا همام
نص طيب مثلك
دمت بكل ابداع
عيدكم سعيد

أستاذنا الطنطاوي الحسيني
هو الامتنان بلا آخر لكريم تشجيعكم
فشكرا إن كان يفي

نصوص محملة بالفكر والشعور والجمال
لديك الخبرة فى أساليب الكتابة المختلفة
ولديك الموهبة التى لم تحدها حدود الكتابة
نصوص قصيرة أعطت مساحات كبيرة من التأمل
للتثبيت تقديرا
وائل القويسنى