وانا بينى وبينك مسافات
ومراكب دمع معبيه..
ياللي انتى شرودك يبكينى
وسكوتك بيأسر فيا ..
ايه هى حكيتك دليينى
مزعتى الضحكه ف تكوينى
متاخر فرحك للأخر
والاخر طافى الفوانيس
متاريس بتقابل متاريس
وانا تايه منك ف هويس
متشعبط قلبى ف ديل توبك
ليه توبك يتباع برخيص
كان املى أقرب لعنيكى
واستطعم حضنك والضمه
مررتى لسانى وهجيتى
ونويتى تضمى المتاهات
وانا بينى وبينك مسافات
مش فهمك
ولا قادر ادافع عن تهمك
ولا قادر ابجل ف عنيكى
متلخبط ف شعورى اليكى
وبقول لك ايه
الحاجه الدايمن شغلانى
انى هاموت فيكى
وترابك راح ياكل جسمى
من قبل ما يعرف حكاويكى
واتأمنى بأيه ..
انا لولآ ان بحب البطن الللى جابتنى
ما كنت اتنطط فى مشاعرك
ولا العب لعبة ليه ؟
ولا اسأل عن اصل سكوتك
ولا سيل الموت اللى بيجرف
فولادك واحد ورا واحد
والله بحبك مش جاحد
ولا خايف ابدا م الموت
ما الخوف جواكى ده موت
والصمت اللى ملازمك
موت ..
واحنا الاموات لو تكسرنا
حبة زنقات
وانا بينى وبينك مسافات
انا شغلى الشاغل
هو انتى
وسرورك ازاى ألقاه
لو سهمك يوم هيموتنى
انا راضى بموتى على اديكى
بس اعرف مين اللى كويكى
بالبكا والأه
ومباعد بينا المسافات