الولد الصايع
صايع وعامل سنفره
وف صدره سنسال الغرام
وف إيده لابس إسوره
ناتف حواجبه زى مدام
ماشى يعاكس جوهره
وقفت تقولّو جوز كلام
******
يابن الشوارع ياعليل
الحب مش لعبة طنه
الحب عشره وبيت جميل
أسره سعيده مؤمنه
روّح لأمك ياهبيل
دوّر على غيرى أنا
******
فاتح لى صدرك للهوا
وعمللى شعرك مسخره
ومشيتك رقص ودلع
والليدنه اف تمك كره
وين الكرامه يا خِرِع
وين الشهامه يا مَرَه
******
سايب كتابك والقلم
تلهت ورا زبالة بنات
وتصاحب الوِلد الْلَمَم
يومك وليلك فى الحارات
عمرك ما تفهم يا بجم
حب العلم هو الحياة
******
ضيّعت عمرك فى الرخيص
عايز تعيش عايز تهيص
قمرك خسوف
شمسك كسوف
والدنيا حولك طلطميس
ما تدرى جمعه من خميس
******
بتموت فى تامر أو شرين
ومصطفى والعجرمه
واضّيع كنوز السنين
في حاجات رخيصه محرّمه
فكر يا خايب ياحزين
في الأخره يوم المندمة
******
دايما حياتك فى الخطر
وتقلّد اولاد البقر
تجرى ورا واحد رطن
وتنسى خالد او عمر
فكّر فى أهلك والوطن
وكون ربيع وكمان قمر
******
ابحث فى أمرك يا وَلا
وبلاش صياعه وبهدله
خلّيك نبيل زى النخيل
صاحب مروءه ومرجله
واحلم بجنه وسلسبيل
وزوجه طاهره محلّله
******
أنا بنت ناس آخر تمام
ما يهمنى حلو الكلام
بعشق كتابى والعلا
وكمان صلاتي والصيام
وأنا نجمه عاليه فى السما
ما يطولها غير الهمام