مو بيدي البعد
لاتعتب علي البعد مو ......بالأيد
ولو بيدي ............أرد اليوم لدياري
بس غصبن علي أبعد وأظل مهموم
ويلفلفني الحزن ويغطي مشواري
شتظن سهله أعيش بغربه أني وحيد؟؟؟
وأترك ديرتي وبستاني وأشجاري
يلتعتب علي ادري أنت مامرتاح
ولا مرتاح أني وللبعد شاري
بس حكم الزمن والزمن تدري يجور
وعلي جار الزمن وأحرمني من داري
تراني لشوفتك ولهان ميت موت
واكتبلك حنين بوسط أشعاري
صحيح أني بعدت بس روحي يمكم غاد
وليليه الوطن بالطيف خطاري
مشتاگ لأهلنا وناسنا الطيبين
وانأ بالي يضل مشغول يم جاري
تره والله أكتلتني بصرختك عود
وخليت الدمع في مقلتي جاري
شلون أرجع وأخوي ألصار چن عفريت
وچن داري ألبنيته تگول مو داري
أجو غربه على بيتي وصارو أهل البيت
ومن عنده أطلعت ياخوي إجباري
دخليني بحسرتي ولا تهيج ألاه
وأنا الراضي بقسمتي ودافن أسراري
لتهيج أحزاني أحزان بيه هواي
وأنا أبلايه عتب ومشوشة أفكاري
عليك الله الرحيم العالي فوگ الناس
لتزيد أحزاني وتشعل بناري
ماناسي .......الوطن والله ماناسيك
وآنه بيكم حبيبي يزيد مگداري
ولو أصعد فرض وأسكن على ألمريخ
هم أگعد هناك وأحط منظاري
وأضل أرگب الموصل والنجف والكوت
وأدز بوسه لديالى وبوسه لأنباري
وأحن يمكم أجي وأشتم هوى بغداد
وأشتم هوى الگرنه واشم أنسام عشاري
وآنه متابع حبيبي أخباركم كل يوم
وأذا تسأل علي مو زينه أخباري
لأن عنكم بعيد وبعدي عنكم موت
وما أگدر أرد البعد إجباري
يعني آني ابد مو ناسي أبد بغداد
ويضل دوم العراق وناسه بالطاري
الشاعر حاتم الهاشمي
( مهداة للأخ الشاعر محمد الفهد)