عشرين عشره

عشرين عشره



الكابتن ميمو
دا إسم الشهره
وإسمه الأصلى
شحاته ابوكف
أصبح فجأه
قيمه وسيما
وسلطه وجاه
وبنلقاه
بعد ما كان
مركون ع الرف
صبح وليل
موجود ف النشره
سافر, قابل,
صرّح, أعلن
إن الفرصه
حانت فعلاً
والأيام الجايّه
ح تبقى
قشطه ف قشطه
بعون الله
وبفضل رئيسنا
بكره نكَمِّل
اللى ناقصنا
ويبقى معانا
أحلى ملف
...........
الكابتن لف
سيجارة حشيش

خد نفسين
وعمل دماغين
وقال لصحابه
كابتن سوسو
اللى باباها
زمان كان رِف
وكابتن هيشو
العتره المجدع
أبو الهيش
المتودك
اللى بيفهم
أصل اللعبه
وأكل العيش
بكره نعيش
بكره نلف
كتير ونهيص
من مدريد
لجنيف لباريس
.................
الكابتن مال
على جانبه وقال
للباشا ف ودنه
الموضوع
محتاج أموال
رد هلال
الأموال
موجوده كتير
إنت نسيت

إنى وزير
وافهم جداَ
ف الميزانيه
وفى التدبير
إغرف
قد ما تقدر تغرف
واوعى تخاف
من أى سؤال
حط ف بطنك
بطيخه صيفى
وريح عقلك
م التفكير
رد الكابتن
بعد ما لف
سيجاره كمان
وخد فنجان
شاى وشد
تلات أنفاس
أنا مش خايف
ولا بيهم
كلام الناس
..............
ضحك الباشا
وع المكشوف
قال له شوف
ح نجيب أموال
من لحم الحى
والخير أهو جاى
بكره يعُم
وح نبقى ياعَم
فى أحسن حال
ونا من جِهتى
ح اعمل جِهدى
وكل شويه
ح اقول بؤين
عن شطارتنا
وعن حضارتنا
وماضى جدودنا
واستعدادنا
لعشرين عشره
وان بلاتر
يبقى حبينا
والموضوع
مضمون وف جيبنا
وان المغرب
دى ولا تسوى
وبالنسبه لنا
جنوب أفريقيا
مجرد حشره
وانت عليك
تعمل همه
وشغل بذمه
واجمع يلا
باقى الشله
وخد وياك
بيسو وحمو
وريعو و تيفه
وشوف كام واحد
م الطباله والزماره
والهتيفه
وما تنساش
أولاد وبنات
ترطن بلغات
بس تكون
أشكالها نضيفه
عشان ح نقابل
وفد الفيفا
.................
فات الوقت
عدّى ومر
من حفله لحفله
واحنا ف غفله
والبهوات
نازلين تخبيط
وف نفس السكه
ماشيه الزفه
زى حياتنا
بدون تخطيط
جا التصويت
دقنا معاه طعم المر
شوفنا نجوم
الليل فى الضهر
خدنا بجد
خازوق العمر
بيِّن كل عيوبنا
وسابنا
نحس بإن
حقيقى قيمتنا
مجرد صفر..........
إسكندرانى
31/5/2004