فكرتوني .. يا اولاد
توشكر .. يا حضرة الناظر
وكويس انكم
يا ولاد فاكرين
احمد واشكر ربنا
ما حذفوش مادتي
مش عارف من غيركوا
كنا رحنا فين
زمان كانت حصة الجغرافيا
في الاسبوع تلات مرات
دلوقتي يا ولداه ..
حصة كل سنتين
اقعد يا واد انت وهو
اقعدي يا بت
هما الولاد اساسا فين ؟؟
ياتري يا شباب فاكرين
عارفين اسمي
ولا نسيتو يا بني ادمين
انا الاستاذ خالد مدرس الجغرافيا
جيتكم حصة
زمااااااان من سنتين
يالا نبتدي ..
هات يابني الخريطة
هشرح لكم يا ولاد
احنا ساكنين فين؟؟؟
اعدل يابني الخريطة
ولا ايه اللي حصل ..
انتو فاهمين ولا مش فاهمين ؟
حد يدلني ع البحر الابيض
ولا البحر الاحمر
حد يقول لي الخليج العربي فين ؟؟
اهوم .. شايفهم .. بس مستغرب
استنوني .. يا ولاد
سنتكوا زي الطين
شكلهم غيروا المناهج ..
هنا كانت
في بلد اسمها فلسطين
راحت فين .. مش عارف
يكونش نسيها اللي بيرسم
يخرب بيتك .. يابن المجانين
حد ينسي فلسطين ..؟
المعالم راحت
واتكتب مكانها
قديما كانت فلسطين
دلوقتي سكنوها القرود
قولولي ..
دول متأجرين ولا خلاص متملكين ؟؟
وهنا كانت بلد عظيمة اسمها العراق
يا نهار ابيض ..
ودوا العراق فين ؟
حطوا مكانها عشر بلاد
وسرقوا منها الرافدين
فين دجلة فين الفرات
يا تري اتردموا
ولا يكونش في الخريطة تايهين
طيب ننزل للسودان نشوفها
حتي دي كمان قطعوها
دي بقيت بدل البلد عشرين
ياربي الزهايمر اشتغل
أكونشي نسيت
ياربي مخي راح فين
جرس الحصة ضرب
اشوفكم بعد سنتين