ارحل وسبنا نعيش
ارحل وسبنا نعيش
بقلم محمد نديم علي
ارحل وسبنا نعيش
ارحل وروح لبعيد
أصل الكلام منك
تهريج وكدب وغش
تلاتين وكانوا الذل
والقهر والغربة
والجوع في جوف النيل
وفي برنا عشش.
ارحل كفاية حرام
فيه مقتدر خلاق
شايف عصابة الزيف
واحنا يا سيدي خلاص
بقينا منصدقش.
ارحل وسيب الناس
ترتاح في لقمتها
وتعيش في ليل ونهار
متخاف من المماليك
وعصابة الخافيش
وديابة ما مبترحمش.
اسكت ..... ما تتكلمش
سيب الكلام لينا
سيبو ولو لحظة
ودي مصر ولادة
ع الحق ما بتسكتش.
اسكت ..وشوف الناس
فاقت من الغمة
والشمس أهي طلعت
وانزاحت الضلمة
والدنيا أهي صحيت
ما بلاش مكابرة خلاص
إنت الوحيد مصحتش؟
إرحل وسيبنا نشوف
دا الأرض عطشانة
ارحل وسيب النيل
يرقص بمواله
يفتح بيبان الخير
النيل دا لا ما يخنش.
ارحل
كفاية خلاص
وبلاش من النهنهة
على مجد حرب قديم
لا هو منة أو صدقة
دانتا ولي الأمر
والشعب كله دا جيش.
والناس ما تتهددش.
ارحل وسيب العدل
يفخر بأحكامه
ويدوس حيطان السجن
ويدك أصنامه
ويزيح جحافل شر
على برنا ما وردش.
ارحل بلاش فرعنة
والسحر مش حيفيد
فرعون عماه الكبر
والشعب موجو غريق
والناس حتفضل هنا
ودي مصر ... ما بتغرقش.
رد مع اقتباس
