اكتب و بدَّع يا قلم

اكتب و بدّع يا قلم

شعر د. جمال مرسي

	القلب مشحون بالألم و ازاي يكون حال القلم القلب حبره من عذابْ و( البِنْ ) من إحساس و دم قلمي جرئ ما ينكسف و لا عمر سنه هينقصف لو حتى حطّوا لصاحبه سم قلمي و عارف سكته و دا مين هيقدر يسْكته فارس على صهوة جواد الحرف شايل كلمته طالع كمثل الشمس من عتمة ظلام اليأس شادد همته موجود بينزف .. مش عدم قلمي مناضل محترم في كل وادي بتلاقيه في الحب يعزف للحبايب في الهوى أحلى نغم و كأنه همس الطير لإلفه في الفضا و كأنه شقشوقة صباح الحب في ليل الظُّلَمْ و ان جه يسجل للوطن تلقى الحروف لحن الخلود اللي عبر حد الزمن تلقى الحروف متزينه بتراب بلادي بالعَلَمْ بالنخل بالنيل الجميل اللي روى كل العروق منذ القِدم و ان قال كلام ضد الفساد و الشر تلقى اللي انكتب شامخ و راسخ كالهرم قلمي بفضل الله سليم العقل مفتول العضلْ يكتب كلام يوزن بلد من فضل رب الناس بيأتيه المدد من حب كل الناس حروفه بتتولد و لأجل كل الناس هيصمد للأبد و لا يوم يخور أو ينهزم و لا يوم يخور أو ينهزم

و دمتم بخير

أخي


رائعة


نعم


فقلمك القلم الذي هو بحق قلم الحق والقوة والحرية والفضيلة



بارك الله فيك

السلام عليكم ورحمة الله وبركاته
اخى الحبيب د.جمال
ما اجمل قلمك وما ارق مشاعره
انا من عشاق هذا القلم الصادق عشان كده هفضل اقوله


يالا يا قلم الحب اتكلم غوص ف المعنى كمان وكمان
اوعى ف يوم ابدا تتالم ولا تسلم بالاحزان
خليك دايما صوتك عالى زلزل حرف الكلمه وقول
حلمك دا مش حلم خيالى ولا بيدور ع المجهول
قلبك فعلا قلب كبير مليان حب وصدق وخير
واحنا كمان بنحبك خالص بتعلمنا معانى كتير

لك منى دائما كل الحب
محمد

قلمي مناضل محترم

في كل وادي بتلاقيه

في الحب يعزف للحبايب في الهوى

أحلى نغم

و كأنه همس الطير لإلفه في الفضا

و كأنه شقشوقة صباح الحب

في ليل الظُّلَمْ

و ان جه يسجل للوطن

تلقى الحروف لحن الخلود

اللي عبر حد الزمن

تلقى الحروف متزينه

بتراب بلادي

بالعَلَمْ

بالنخل بالنيل الجميل اللي روى

كل العروق منذ القِدم

و ان قال كلام ضد الفساد و الشر

تلقى اللي انكتب

شامخ و راسخ كالهرم

قلمك ده ايه ؟
متقولش حدوته جدع جي لحبيبتو بمهرها
متقولش غنواية زمن
فِرح الزمن
لما التقاها وضمها
متقولش دمعة جدتي
الطيبة .
اللي بتحكي عن أصالة كات حقيقة في عمرها
متقولش ضحكاية امل
هربت من الخوف والألم
حلفت لتخلق جوا منّي ألف حلم يضمها
قلمك ده فعلا مشكلة ...!
متقولش عيد
شايللي فرحة عيله بفستان جديد
عارفه انو أول لحلمها
قلمك ده ريحة الصدق في سيدنا الحسين
عود البخور ع الناصية وف أول يمين
حوِّد هتلقاه في الحواري والشوارع والبيوت
صوت السكوت
عمال بيرسم من تراب العفة بكره اللي اتسرق
عمال بيرسم ع الورق
لبلادي فجر يقولها :
أنا جي تاني ومتخافيش
أنا وانتي عمر ما ينتهيش
وميتحسبش الا بقلم عايش حياتو في حضنها
والله يا صحبي يا بختك بالقلم
اللي بيكتب أغلى حاجه لأحلى حاجه في سطرها ...!!


أستاذي

وأخي الاكبر الجميل في كل سطر عرفته من خلاله

دكتور جمال مرسي

أشرف دوما لمجرد وجودي داخل حدود كلماتك

امضاء خجول في ذيل صفحات لك أن تفخر بها


تقبل تقديري

أخي الحبيب عدنان الإسلام
الرائع هو أنت
بحضورك المتميز
و بمشاركاتك الجميلة سيان بالرد
أو بنشر موضوعات جديدة
تحياتي
و دمت في الخير
د. جمال

الأخ الحبيب الأستاذ محمد سعيد
لقد توجتني إكليل حب و فخار بهذه الكلمات الجميلة
التي نثرتها على صفحتي
و ماذا يمكنني أن أقول بعدا
لن أقول إلا أني أحبك في الله
أنت أخ كريم و قريب جدا إلى نفسي
أخوكم د. جمال مرسي