نفسي أرجع مصري تاني

..
نفسي ارجع مصري تاني
(قصيدة بالعامية المصرية)
--------------------------------

يا مصري بتقتل
مصري ليه..؟
والمصري دمّه
حرام عليه
فاكر أبوه
يوم جاع أبوك
قسم الرغيف
بينه وبينه
وحطّ بيته
في نيني عينه
ونصّ خيرك
من إيديه
يا ريت تقول لي
قتلته ليه..؟
يا ناس قولوا لي
جرالكو إيه..؟
وازااي بقيتوا
في يوم وليله
ديب بينهش لحم إبنه
ولحم بنته ولحم جاره..؟
آه يا ناري وآه يا نارك
وآآآآه يا ناره
كلّنا في النار إيدينا
طب بنولعْ فيها ليه..؟
فين زمانك
يا زماني..؟
مين في غير
حضنك رماني..؟
نفسي أرجع
مصري تاني
يا زماني
خدْ بإيدنا
رجّع البسمه لولادنا
رجّع الفرحة لبلدنا
وامسح الدمعه فعينيه

بقلم رفعت زيتون
ليلة دامية في مصر
8 \ 12 \ 2012

يا زماني
خدْ بإيدنا
رجّع البسمه لولادنا
رجّع الفرحة لبلدنا
وامسح الدمعه فعينيه

نتنمى معك شاعرنا الرائع أن تعود البسمة .. الفرحة .. الأمان
ونخشى أن نقول " عاوزنا نرجع زي زمان .. قول للزمان ....... "
شكرا لنبضاتك الحية التي تشاركنا بها
دام ألقك
ولك التحايا