نويت أكتب ومش راجع
ومهما قلتى بزايدة كلام جارح
منيش ساجد
ومش ناسى كلامك ليَّا ف الفجرية
ولا هرجع اكون عابد
ولا ف قصرك هكون خادم
ولا ف قفصك هكون عصفور بتتسلى العيون بيا
منيش راجع لبنِّية
ولا هرجع لخد الشمس يتحامى ويشوط فيا
ولا هكشف جلود الصبر لسياطك
ولا عْضامى على بابك
بقت م الدوْرَّة محْنيَّة
ولا هرجع اقول التوبة بالنيَّة
خلاص مات الكلام فيكي
ومش ناوى اغطيكي
بنن العين كما السنتين
ولا ايديكي تعود تشبك على ايديا
خلاص طار الحمام يابا
وهجر. والغيَّة منسية
منيش راجع
ولا واجع ف قلبى غير
سهر بالليل
وحلم جميل
ضفرتهُ فوق دفاتر نيل
بعتولك مع النجمة وقلبى كان ضحية لغير
خلاص همى طفح م الكيل
وقلت البعد عنك خير
وحبك كان مجرد ذنب وطِّيتلُه وشئ فاجع
..........
نويت أكتب ومش ليكي
نويت اجمع لياليكي
واكفنها بدفاتر ويل
تكونلى دليل على ضعفى
فيوم ما حاولت افديكى
خلاص كل الكلام مبقاش
ينور ع السطور ليكي
ولا حبر الوريد عادلك
ولا نبضه بيحيى شئ بيتنفس لخطاويكى
ولا حروفى بقت تتحمل الدَّقّة
ولا التوهة وتقول لأَّ
ولو كان الكلام ليكى ازقُّه ع السطور زقَّة
فيتلون ببلاويكي
منيش كاتب كلام ليكي
ولا شعورى يعود ليكي
وانا م الوحده بتعلم
ولا قلمى على سطورك يقف سارح ولا مبلم
ولا جارح ولا مضلم
خلاص تانى مش اتْكلم
ولا هكتب ولا اتظلم
عشان ما تجينى فرحانه
تقولى شعرى تلاكيكي
منيش كاتب خلاص فيكى
لا هتلكك واصحِّيكي
خلاص شعرى نسَاكِّي زمان
ولا بحوره هتحْيكي
........
نويت أكتب ومش عاجز عن التلحين
ولا سطورى بقت شايخة
ولا حرفى يئن حنين
ولا الكلمة عادة محشورة م الدوخة
ولا الحوجة لشعر حزين
خلاص صدرى نسى همومه
وعاد يطرح بياض لونه
ولا كونه بقا يسيعه ولا يبيعه لناس خاينين
نويت أكتب لناس تانين
لناس عايشة على التقوى
وناس شايفة الحياه أحلى بدون تلوين
نويت اكتب وأزيد ف الحب
وأقول يا ليل وأقول يا صبح
ومهما بعدت الخطوة
اكيد كسبان
مادام الخطوة تبعدنى عن النيران
اكيد كسبان
مادمتى انتي هناك وحدك
وانا وسط الحياه فارد دراعى وعايش النسيان
اكيد كسبان مدام الخلق حواليا تحسسنى
بانى رجعت من تانى اعيش انسان
واشوف الفرحة فعيونهم
بتحضنى فاحضنهم
يقولوا الله على شعورى
اقول "حمداً" على النسيان