/
/
/
يا نيافة العسكر = ليه ف سكتي بتعتر
انته عرفتك ذوق = وأمينها مش أكتر
لا تحدثك نفسك = ف عرشها تعسكر
د غاية الثورة = تنهي أذى العسكر
فكر ببليون مخ = ثورتنا ليه تعكر
*********
الحكم دا أمانتك = أديها بمكانتك
عايزينها مدنية = نختم بها حكايتك
ليه تجينا بطوارئ = ترعبني يا سعادتك
على راسنا طب والعين = وأملنا بسيادتك
للعدل ودينا = حرية بمعونتك
********
لسة طريقنا طويل = والجيل يوصي الجيل
عايزين نعيش أحرار = و كتابنا لينا دليل
من سنة المختار = نتخطى شر وويل
عارفين قوي وفاهمين = المسؤولية سبيل
ومصرنا مصيرنا = والحمل يابا تقيل
**********
تطالبنا نتعقل = طب ليه بتتسرع
ف جمعة التصحيح = قاطعنا مين جمَّّع
الإلتراس ديت = دمِّل ومتجمَّع
ملناش صلة بيها = والموقف الاروع
دا كان لثورتنا = في الحكم ليه تجمع
*********
على شوكنا عدِّينا = وبحملنا مشينا
هنكمل المشوار = بقلوبنا وعنينا
هنعدِّي بيكي يامصر = دا انتي الامل فينا
احنا هنا الثوار = ما في غرض لينا
مطالبنا حرية= وعدالة تساوينا
***********
يا جيشنا ليه تعمِّم = أخطائنا فردية
فكَّرتنا برؤوس= في السجن مرمية
يا جيشنا يا حامينا = خليها حرية
اضرب بايد من نار = سارقينا حرامية
لسة ف مناصب ذل = والبلطجة حية
**********
اللي حرقكو وقتل = معروف وايه العمل
انتو رجال مصرنا = جاوبوها طب على عجل
متتهموش الثورة = بمين بحقده يذل
مصر تلاحقها منين = ومنين شوية خجل
مطالبنا تتأجِّل = لحين يقودنا بطل
********
دمتم مبدعين
نحيي موقف الاخوان والقوى السياسية التي لم تشترك في جمعة تصحيح المسار
للأسف لم تكن كما سمت نفسها
بل اعطت للمجلس سبب ان يقيدنا مرة اخرى بقانون نطالب ان نهدمه من عهد الرئيس المخلوع
نسأل الله أن يهدي الحال وأن يهدي قومنا وشعبنا لكل خير و رحمة ونصر وعدل امين