على باب القصيدة .. للشاعر أحمد سعيد موسى

تديني كام ..
وانهي القصيده بدون وجَع
واكسر قانون الاحتمال
واضحَك في قلب النَّص دا من غير كسوف ؟؟
واديكي كام ..
وتسيبي قلبِك أغسله
يمكِن يشوف ؟؟
خليني اضمِّك تاني للمرَّه الأخيره بدون لُقا
وابدأ في ترتيل العزوف
محتاج أجازه م الجنون الشاعري
والضحك أوقات الزعل
والدمع فوق خط الحياد
محتاج اكون مُلحِد بكل المعطيات الثابته أولهم ..عيونِك والحروف
محتاج أجازه م الوقوف ع الوهم فوق سَطح القدر
فما تزعليش..
قرَّرت افوق دلوقت من إدماني لعنيكي الفريده
واعفيكي من حَرَج المقابله المُره في السكه البعيده .. لقلب تاه
كان عزرائيل ..
- وانا جاي عشان اتنفِّسك -
واقف على باب القصيده بوردتين
بينادي عشاق الحياه
..
من كام خريف وانا بعشقك
وبداري شَكّي فـ 100 دليل
وبطارِد الحلم الجميل
خايف أغامِر " بالصداقه " اللي ف عيونِك واخسرِك
وما اكونش غير شبح الهموم
مع كل هجمة ليل طويل
..
دلوقت لازم أخلع الأخ / الصديق
وادّيكي حبة تفصيلات سهله في شرح الاحتياج
وبوكيه دموع ..
مِن كل ورده يتيمه نزفت عطرها
وقت انفصامها عن الهوى بالاندماج
حبة معاني اتسقَّطوا من كاس براندي
عكَّروا صفو المزاج
حبة حروف.. شاركوني بَعدِك وحدتي
يا تكون سبب موت القصيده ف شفِّتي
يا تكون علاج
..
فاقري الدموع بعيون سيزيف
واقري الشجر وقت الخريف
والجو وقت ما يبقي صيف
والبدر يوم ما يكون محاق
والشمس فـ عيون الكفيف
والخطوه وقت ما يفرش الشوك الرصيف
والجوع في وقت ما يغلى ع البطن الرغيف
والشهقه لما تكون وجع
والحزن لو يسكن جدع
تلقي حياتي بدون خِدَع
رقبه بترقص م الأسى على حد سيف
تلقيني عُمر ..
وراح بصمت الشوق هدَر
أنا لو بعدت ..
قوليلي مين هيراعي عطرك ف الورود
ويبوح بضلِّك للشجر
مين غيري يقدر يكتبِك
ويصيغ ملامحِك ع السُحب تراتيل مطر
أنا كل شيء تتصوريه
واحِد ملوش غيرِك شبيه
ضحكه بتحضن حزنها فـ دمع الوتر
أنـا موت بيتنفس حياه
وطريق مفيش غيرِك مشاه
وأمان موالِف رعشتُه فـ حضن الخطر
أنـا صوت شغف وانتي الصدى
بستان لَهَف وانتي الندى
طير حُر .. وعيونِك فضا
فبلاش نبيع شوقنا احتمال ساذج فـ أسواق القدر
أنـا وانتي آخر كوكبين
في مجرة الحب الحزين
والميَّه لو قدرت تقف والريح متين
فمحال ف يوم تقدر صعود المُنحدر

..

بقلم / أحمد سعيد موسى
ديوان فرض سادس

رائع في كل حالاتك ..
تقديري لهذا الانهمار الشعري العذب .

رائع في كل حالاتك ..
تقديري لهذا الانهمار الشعري العذب .

دمت جميلا يا صديقي
محبتي

شعر جميل الحرف والحس بأداء رائع
قدرة على التعبير وشاعرية عالية، وجرس جميل ، ومناجاة حارة
حرف أنيق بصورة مميزة ونص فاره الجمال
هذا هو الشعر بكماله وبهائه وسموه وجلاله
دام فيض إبداعك.

شعر جميل الحرف والحس بأداء رائع
قدرة على التعبير وشاعرية عالية، وجرس جميل ، ومناجاة حارة
حرف أنيق بصورة مميزة ونص فاره الجمال
هذا هو الشعر بكماله وبهائه وسموه وجلاله
دام فيض إبداعك.

تسلمي يا رب دا من ذوقك
ربنا يعزك