يعني فاضل أد إيه ؟!

يعني فاضل أد إيه ؟!
بقلم
آمال محمود كحيل

يعني فاضل أد إيـه ؟!
شهر ، أسبوع
أو يادوب يوم أو ساعات ؟
مش هاتفرق .. لما يبقى
قلبي متخم بالآهـــات
لما يبقى الماضي كله
سطر في كتاب ذكريـات
واما يبقى بكـرة غامض
أو مجــرد أمنيـــات
واما أبقى ...
عايشة دلوقتي وكإني
ميتة ف عــالم مــوات
يبقى رحمة ربي أرجى
للي عاش عمره ف سبات

يعني فاضـل أد إيـــه ؟!
واللي فاضـــل
إيه هايغني ؟!
ياما لازم .. حـزني قـلبي
ياما ضــلّ الســعـد دربي
ياما وعـد الفرحة خـانني
يامـا غـــاب الضي عـني
حاسـة إني ظــل شارد
وان نبـض القـلب بارد
وان روحي تايهة مني
وان شـوقي لنوره قايد
وان حتى الخوف خاصمني
والزمن عـدى وسرقني
بس فاضــل حسـن ظني
إن رب الكــون راحمني

يعني فاضـل أد إيـه ؟!
مين يجـاوب
ع السؤال ؟!
مين مُلِمّ بعـلم غيبه ؟!
غير خالقنا - بدون جدال -
دي النهايـة أمر حتمي
والحيــاة آيـْـلة لــزوال
يبقى ليه نحزن ونبكي
والخلود دا شيء محال
راحـة القلب ف إيمانـــه
باللي مكـتوب ع الجبين
مهما صبري طال زمانه
فالأمـــل حبــلي المـتين
موش هادوب
في اليأس ، واغرق
أو أخاف م الموت يجيني
واما اغمض جفـن عيني
النهارده ، بكـره ، بعـده ،
بعــد بعـــده
أي لحظة إيه هاتفرق ؟!
المهم اقـدر في حينهــــا
بالشـهادة لساني ينطـق

الله .. معزوفة إنسانية من وحي وجع فاض حرفا
قطعة شعرية عذب حسها ، خلاب حرفها
قصيدة جميلة بمعانيها ـ ساحرة الصورة، عذبة الإيقاع
جميلة الوقع.
دمت مبدعة متألقة.

سلسه رقيقه أنيقة
دام الإبدااااع
...

أختي الحبيبة الشاعرة الجميلة د.آمال
فاضل الصبر والأمل بالله وأنه سبحانه وتعالى يكشف الغم بإذنه
ويبدل ستائر الأحزان ويجعل النور سراجا في قلبك وبوحك المتخم بالذكريات
وفقك الله ولا حرمنا الله بوحك الجميل

مقطوعة شعرية رائعة بالغة العمق بأحاسيس ومشاعر رقيقة
جرس رشيق، وأداء انيق، وعذوبة في الطرح
سلمت وسلم حرفك الماتع.

أحسنت بارك الله فيك لقد رسمت المعنى بمشاعر جياشة وسليقة شاعرية ورسمت الصورة بإتقان ,,خالص التقدير