( رساله )
ــ
من مصر إلى ( أوباما )
ـــ
الأرض أرضي يا ( أوباما )
فلمّ طوفانك الهايج
ولمّ كلامك الجارح
ف ( مصر ) بكل ما فيها
شمال ويمين
وإسلامي
وعلماني
وليبرالي
وحتى اللي ما لوش مِلـَّه
وعاش فيها هيرفع لك
في كرت احمر
أنا همَّه ..
جسد واحد
رسمنا الدهر حدوته
في نن القلب مصريه
وشعبيه
ووطنيه
وعربيه
وقوميه
جسدنا من سمار الطين
وموالنا رواه ( النيل )
ودوَّارنا كبير جداً ..
يسيع العاصي والراضي
لأن الكل أولادي
فسيبنا يا ( أوباما ) ..
نعيش على حالنا
نقدَّر فينا عادلنا
نحاكم فينا ظالمنا
فمالك بينا يا أفندي
تحط في كل شئ أنفك
كأن الكون دا من شأنك
وإنك يا ( أوباما ) إله ..
هنسجدلك ..
ونرفع لك إيدينا بالدعا ترحم
وتمنحنا كراماتك
....... دا لو كان ..
يكون الموت لنا أفضل
محال شعبي ..
هيحني ضهره للأوغاد
وقطاع الطرق والعيب
محال ( المصري ) هيطاطي
وهتعدي عليه وتفوت
لأن المصري دا هوه ..
الموات والموت
فأحسن لك تشوف غيرنا
ــ