قطع مشاوير الغربة
ف رجلك
وكفاية معاندة مع الترحال
وكفاية حمول على كتف الصبر
السهرة خلاص ..
والعالم بيلم عزاله
والمطرب لملم كلماته ف اخر موال
ومراكبك كلت م الغربة
والخوف والقهر
معدتش بتفرق ايامنا
ان كنا هنعيشها جهنم
او كنا هنعيشها ف مصر
يا بابور الاهل اللي مقبل وفيتني وراك
عشرين سنه فاتت من عمري
وانا بستناك
هتجيني خلاص وانا وشي ملامحه
بتتخفى خلف التجاعيد
والباقي ف ايامي يدوبك
شهقه وتنهيد
ورثنا الفقر
مرارة الدنيا وضيق الحال
لكن للحق
علمنا ف عز الزنقة وعز الحوجه
منمدش إيد
ورثنا الخوف م الجوع
وحكاوي الاحزان الضلما
وأنين ودموع
ورثنا الاحلام الزايفه اللي بتطرح مر
والضحكة اللي بتطلع مزنوقه تشد الصخر
والرميه على كتاف القمرة
بتعري الليل
تخليه محتاس متحاوط باماني الناس
وعيون العشق العسلية المحنية سبيل
ما كفاية رحيل
قطع مشاوير الغربه يا خلي
وتعالى هنتساهر صحبة
على شط النيل
..
.