بحبك و مدمن محبة و صبابة
و بعشق ترابك و صوت الربابة
و بعشق نخيلك
و شجرك و نيلك
و بعشق سمار الوشوش الغلابة
..
و مهما بحس
بظلمك و جورك
و مهما تقابلي
غرامي بغرورك
بحبك برغم الأسي و الكآبة
..
بحب الصحاري
و احب الرمال
و بعشق صخورك
و لون الجبال
و ابص ف عنيكي أحس بمهابة
..
بحبك و خيرك
مليش حظ فيه
و جوعي و فقري
في وشي تشوفيه
و مهما اناديكي مفيش استجابة
..
بتأسي عليا
و اقول برضه امي
اقدم حياتي
و بتمصي دمي
و تملي بحقي كروش الديابة
..
و احبك و اكحل
بحبك عيوني
و اجاهر بحبك
و لو يعدموني
و افني في حبك حروف الكتابة