عاللّومَةْ وْشِفْتْ وْليفي
حامِلْ حِمْلِ وْمِتْحَمّلْ
وجايِبْ مِسّوق لْمَرتو
حَزْمِةْ جَرْجيرِ وْفِلْفِلْ
وْمِنْ هَمّو وْمِنْ حَسْراتو
ماشي والجِفْنِ مْسَبِّلْ
يِضْرُبْ خُمْسو بِسْداسُو
ويُضْرُبْ بِرْموشو المَندَلْ
نِزْلِتْ مِنْ عِيني الدَّمْعَةْ
وْقَلْبِي جُوّاتِي شَمْعَةْ
قِلْتِلّو لَهْ يَوْليفي
شولّي خلّاكِ مْبَهْدَلْ
كُنْتِ بْزَمَناتَكْ شَقْفِةْ
وْعَلى آخِرْ طَرْزِ مْبَدّلْ
شو يَلْ خَلاّهِ لْوَضعَكْ
بينْ يومِ وْليلِ تْبَدَّلْ
وْماشي بِهْمومَكْ تِهْدِسْ
وبأوْهامَكْ تِتْشَنْجَلْ
قَلّي والله يَقْليبي
جورِ النِّسوانِ مْغَوِّلْ
وِلِّي بْيِتْجَوَّزْ مِتْلِي
لازِم مِنْ سَمُّنْ يِنْهَلْ
ونتي يَلّي حَبّيتِكْ
وِحْظيتي بْحُبّي الأوّلْ
يِمْكِنْ لَوْ كُنتي قْبِلْتي
نِجْمَعْ شَمْلِ وْنِتْأَهَّلْ
كُنتي خَلّيتي نْهاري
بِسْرابِ نْجومو تْلَيَّلْ
وْكِنْتي خلّيتي قَلبي
يَلْ كانِ بْجَمرو مْشَعْلِلْ
يِطفي ويْصيرِ رْمادي
وْمِنْ حُزْنو وْغَمّو يِدْبَلْ
قِلْتِلّو لَهْ يا حْبيبي
إوْعَكْ هَيْكي تِتْخَيَّلْ
هَلّي بالقَلْبِ تْصونَكْ
ما رَحْ تِجْفا وْتِتْحَوَّلْ
لَنَو الحبّ اللّي بْقَلْبا
نِبْعِ لْزَرْعاتو وْمَشْتَلْ
رَحْ يِحفَظ قَلْبا وْزَرْعو
وْمِنْ مَيّاتو رَحْ يِنْهَلْ
وْمَهْما كِبْرِتْ أو شابِتْ
حُبّا جُوّاتا بْيِتْقَلْ
هيّي بْتِمْشي وْتِتْعَكَّزْ
وْهُوّي عالحِجْرِ مْدَلّلْ