كده ما يصحش
بقلم
آمال محمود كحيل
شفت كتير وقليل مجانين
لكـن زيك والله ما شفتش
عارف إيه ضرر التدخين
ولا بيهمـك ، ولا بطلـتش
كذا إعلان في التلفزيون
تعمل وكإنك ما سمعـتش
طيِّب فاكــــر من سـنتين
تعبك قلبك ، ولا حرمتش
ياما نصحتك
خفف أحسن
كده هايأثر ع الشرايين
ويجيك ضغط وسكر طبعًا
وكمان دا بيئذي الرئتين
إرحم نفسك بقى
ما يصحش
عمرك بقى فوق الخمسين
لأ وعيالنا واللي جرالهم
والله يا ظالم دول مساكين
واحد منهم خدته لدكتور
ع المستشفى يوم لاتنين
كان يشتكي من كحة وأزمة
وإدوله ابرة وبرشامتين
مانتش شايف إن دا نقمة
حلت بينا من الجهتين ؟
لازمته إيه بقى نرمي فلوسنا
ع الأدوية ، وغراب البين
دا ابنك أيهم كـان بيدخــن
في البلكونة ف نص الليل
شافني وبلم ، وبقيت ألطم
ودموعي سالت ع الخدين
ليه كده يا ابني ؟
دا اللي ذاكرته ؟
واللي فهمته ف حصص الدين
طـفى ســــيجارتك
غور على أوضتك
واهو من يومها ضاربلي بوزين
أعمل إيه دانا خايفة اولادك
بكرة يدُوروا على الهيروين ؟
شوف يا سي مدمن
إسمع مني
توب لله بقى م التدخين
وانا وياك صدقني هاساعدك
ماذا وإلا ، و ألف يمين
مانا قاعــدالك
ولا هاديلك مصروف ولا
هاتشوف مليم