كان ياما كان
كان فيه فارس م الأساطير
قلبه كبير مليان بالخير
سيفه ف قرص الشمس بيبرق
وحصانه فى الهوا بيطير
كان بيلف بلاد الله
ويساعد فى عباد الله
كانت كل الناس بتحبه
وبتفرح لما بتلقاه
هب الظلم ف عز الليل
صمم يسقى الفارس ويل
فكر ازاى يكسر أنفه
ويخليه يبقاله ذليل
عمل الظلم وليمة كبيرة
عزم الفارس ويا الجيرة
حط لهم فى الأكل مخدر
حيلة قديمة لئيمة حقيرة
بدل الظلم ما يكرم ضيفه
سرقه وسلبه حصانه وسيفه
قام الفارس م النوم أدرك
غدر الظلم ومكره وزيفه
ضحك الفارس قال للناس
حلمى هو حصانى يا ناس
والسيف صلب ارادتى وعزمى
أما الظلم ما لوهش أساس