طلاق فى ليلة الزفاف
أنا جَىْ أحكى . ليكم حكايه
هىَّ بصحيح حصلت معايه
أنا راح أقولها ولا يمكن اكدب
دا الصدق طبعى والطبع يغلب
أنا كنت لابس بدلة عريس
أصل النهارده كان يوم خميس
بس النصيب ما فى منَّه مهرب
وعفشى زاهى ولونه فوشيا
وسريرنا داير ملايته صفره
تسر يحته حلوه مرايته عاليه
ولمبه حمره وراديو سانيو
عمال بيطرب
حكايتى يا اللى قاعد سامعنى
فى الغربه تهتِ وْضاع منى سنى
أنا قلت لازم أنزل وأخطب
قام قاللى صاحبى طب ليه هتنزل
سوق العرايس عمره ما يقفل
ومش هتخسر مادام بتحسب
الدنيا فيها كل الشطاره
والحظ برده .. دا الحظ فرصه
أصل الجواز بمزاد فى بورصه
وبالفلوس تنزل وتغلب
بجواب يوضح الصوره كامله
حبة هدايا وفلوس كفايه
هيجوزوك
يا اخويه إبعت توكيل لابوك
يا سيدى جرب
أنا قلت فكره هابعتله بكره
توكيله عنى
وافق أبويه واختارت أمى عروسه حلوه
جمالها يجذب
تليفون وجالى رديت أوام
قاللى النهارده جايه المدام
ضِحِكْلِى صاحبى وداع يا أعزَبْ
جهزت نفسى وسبت شغلى
وخدت تاكسى وصبغت شعرى
وفْضِلت أدعى السكه تقرب
قلتلها أهلاً وميت وسهلاً
مش برده حَرمِى ؟ قالتلى فعلاً
أنا أبقى جوزك يا رتنى أعجِبْ
أتارى أبوها جاى بيها مَحْرَم
وقال وجودى مشى منه فايده
ياريت تقوللى عنوان لوكانده
ما هو كان زميلى طول عمره مجدع
حركاته تعجب
دخلت أُودْتِى … وهىَّ جنبى
وقفلت بابها
لقتنى باغرق
فى بحور شبابها
مهره وعايزه خيَّال ويركب
الوش أبيض والخد وردى والدم سُكَّرْ
والعين دى خضره والشفه حمره عصيرها يسكر
الإيد تقلب والبق يشرب
رفعت ايدى فكتلى تاجها
دى موجه صفره حاضنه كتافها
ودا شعر ولاَّ حرير بيكدب
جهزت قطرى عشان هيجرى
قالتلى سرَّع خليك رهيب
دا طريقه سالك ومش هيقلب
قلتلها لأَّه لازم محطه
يفتحها هوه وبعدين يصَفَّرْ
قالت خساره يا ميت خساره
كان غيرك أشطر
قلتلها غيرى ؟ قالت ها قولَّك
بس أوعى تغضب
د كان خطيبى وكان أبويه
ولما أغلط النظره منه
ترهب وترعب
وكنت هوه .. وهوه نفسى
لو تهت خالص لشطه أرسى
لو شطه تاه أنا قلبى يتعب
فى جيّه أمك قالت لأمىَّ
وافق أبويه وقال نفلكش
بأى حجه
أنا قلت لأمى لوده هيحصل هاسيبكوا واهرب
وجه خطيبى .. وراح لأبويه .. وقالهُّ أبويَه حدد ميعاد
وقال يا عمى على اتفاقنا
أبويه قاله أسبوع كفايه لا تلوم عليه
ولا حد يعتب
أبويه قاللى كده بسلامته أكيد هيخلع
وأمى قالت وايه كمان .هيقضى عمره
يدخل وياكل .. يسهر ويطلع ؟!
دا أمر يتعب !!
دخلت أُوْدْتِى وفضلت أبكى
وأنعى حالى
وأشكى لربى مِ الِّلى جرالى
وقالت امى (بتبكى ليه)
آهين يا هبله دا حب إيه
دا الفقر يدخل والحب يهرب
رحت لخطيبى .. قصدى اللى كان ف يوم خطيبى
قلت إشترينى
باعونى أهلى
يا ريت تغثنى
وبرغبه منى إترميت فى حضنه
ودِّيُته روحى ما عادش فاضل
غير هوه جسمى
دا القلب ملكه والجسم ملكَكْ
وبمال قارون عمرى ما احبك
رفعت ايدى وْدانتنى أضرب
قلتلها طالق
أبوها جانى وقال حقوقنا
عايزين ورقها
قعدت أمضى وهوه يكتب
وادينى باكتب
طلاق فى ليله الزفاف