( مــــــــوت ......!!!! )
أما غريب طبعك يا موت
عليك حاجات كتير تجن
قطرك يعدى يفوت
يدوس كمان ع السن
كشف الأسامى معاك
تقرا براحتك فيه
تاخد صحيح وعليل
تنده عليه تطويه
أمرك مالوش تأجيل
ولا قرار يلغيه
بس الغريبه يا موت
ندهك على سهوه
لا الوسطه نافعه معاك
لا المال ولا العزوة
ممكن تسيب الكفن
جنب المريض أعوام
تاخد صحيح البدن
عافية بلا استئذان
معرفش ليه القلم كاتم على نفسى
خلانى امسك قلم
واكتب وانا نفسى
اكتب كلام فى الحب
فا لقيتنى باكتب " موت "
يمكن عشان اسمنا ؟
مدروج بكشف الموت
ولا عشان عمرنا
مهما يطول حنموت ؟
ممكن تكون روحك
عايشة وملهاش صوت
تبقى فى صحة أسد
عايش كما الهلفوت
الموت دا له كام اسم
واهو كله أسمه الموت
بلاش كلام فى الموت
واكتب كلام ع الحب
واهو كله يوم هيفوت
حبيبتى يا روحى
ياساكنة جوه القلب
أنا باحبك موت
حتى الكلام فى الحب
آخر درجته الموت ؟!
مداد كلامى انقلب
كله يا ناس ع الموت
هارمى القلم والورق
واترك مكانى وافوت
واحلف لكم بروحى
توبه ومش حارجع
اكتب كده تانى
م اليوم ده
لحد الموت