خلاص كفاية ياغربتي
بعدت وتاهت سكتى
نفسي أخلع عبايتك
والبس عباية عودتى
عدت سنينى وانا اصارع
وحلفت للاموال جامع
وكل ماتكتر مش قانع
نسيت في الغربة اولادى
وسمعت صوتهم بينادى
انا ف وادى وهما ف وادى
وقعدت احسب ارباحي
فلوسى دى سر نجاحى
قلت كفاية ياغربتى
خلصت خلاص رحلتى
لميت هدايا ف جعبتى
راجع ياغربة لدنيتى
حجزت تذكرتي وعديت
كل الثوانى لحد البيت
فجأة لقتنى فى رجوعى
نزلت على خدى دموعى
اخيرا راح الم فروعى
فجاة لقيت كله اتغير
ابني انا سبته صغير
لقيت نظرة منه تحير
وبناتي نظراتهم اخطر
بتقول الغربة هنا اكبر
ورجعت من غربة لغربة
عطشان ومالقيتش القربة
مالقيتش مكانى وسطيهم
جوابين وشيك يكفيهم
وبعد الغربة والزيطة
لقيتنى برواز ع الحيطة